E kangai Rose: “Iai aorakin au utu ae reke irou ae e kakaiaki te maraki iai ao e okioki. E a kekerikaaki iai marurungiu.” Te bwai ae rangi n tabeaianga iai neiei, bwa n tabetai e a aikoa kona ni kaatuua ana iango i aon ana reirei n te Baibara ao ni baike a irekereke ma ana taromauri. Ma e rangi ni buokaki n ana taeka Iesu ae koreaki ni Mataio 19:26 ae kangai: “E konai bwaai ni kabane te Atua.” E reke reireian Rose bwa e bati nako te anga n reirei. Ibukina bwa e rangi ni kangaanga n tabetai te wareware ibukini marakina, e a ongongora ni warekan te Baibara ao booki aika aanaki n te Baibara, aika raweaki. * E taku: “Ngke arona bwa akea baikai ao I a aki ataia bwa ai tera arou ni kateimatoa reitakiu ma te Atua.”

Ngkana e nanokawaki Rose bwa e a aki kona ni karaoi baike e kakaraoi ngkoa, ao e kabebeteaki n taeka aika koreaki n 2 I-Korinto 8:12, ae kangai: “E butimwaeaki riki te angabwai ngkana e tauraoi te aomata ni kan anga. E aki kantaningaaki bwa e na anga are akea irouna, ma e na anga are iai irouna.” E kakauringaki Rose n taeka aikai ae e kukurei te Atua ni baike e karaoi, ibukina bwa e kabanea ana konaa iai ribuakoni mamaarana.

E ururing ni kangai Delphine are taekinaki mai mwaina: “Imwini maten natiu te aine are 18 ana ririki, ao I a rangi n rawawata, ao I a aki kakoauaa ae N na teimatoa ni maiu. A a rangi ni bitaki bwaai.” Ma e rangi ni korakora kabebetean nanona n taeka ake n Taian Areru 94:19, ike e kangai iai te tia areru nakon te Atua: “Ngkana a taonainako iango n raraoma, ao ko kabebeteai ma ni karaua nanou.” E taku neiei: “I tataro nakon Iehova bwa e na buokai ni karekei baika N na kabebeteaki iai.”

E kakatabetabea neiei ni karaoa te mwakuri n anganano ae kakawaki. Imwina riki ao e a kabotaua neiei ma aia kureiaon ataei, are e ngae ngkana e uruaki ma e boni manena naba ibukini karanakin te bwai teuana. N aron anne, e ngae ngke e rangi n uruaki nanon neiei, ma e boni kona naba ni buokiia tabemwaang. E ururing ni kangai: “I a noria bwa kabonganaan ana boto n reirei te Baibara, ao aanga n iaiango aika oti n te kibu ni kabebeteia aomata, bon ana anga naba Iehova ni kabebeteai ao ni karaua nanou.” E korei araia naake n te Baibara neiei ake a boo ma te rawawata ae rangi ni korakora ni maiuia. Ao e noria bwa “a bane n tatataro.” E noria naba bwa “ko aki kona ni buokaki ngkana ko aki wawareka te Baibara.”

E reke riki reireian Delphine man ana ukeuke n reirei n te Baibara bwa e na kaatuua iangoan taai aika a na roko, ao tiaki taai aika nako. E karaua nanon neiei te kantaninga ae taekinaki ni Mwakuri 24:15 ae kangai: “A na boni mangauti akana raoiroi ma akana aki raoiroi.” Tera aroni kakoauaan Iehova iroun neiei ni kaineti ma kautan natina? E kaeka Delphine ni kangai: “N na nora natiu n taai aika a na roko. E a tia ni baireaki ara tai ni manga kaitiboo, kaanga aron ae e a mwakoro i aon ana karenta Iehova. I bon norira raoi ngaira ni kauoman n ara onnaroka n aron naba are I noria raoi ao n tangiria man te bong are e bungiaki iai.”