E reireinia aomata Iesu bwa a na bwabwaina te rau i marenaia. Ma e a taekina aei nakoia n te taina nakoia taan rimwina: “Tai taku bwa I roko bwa N na uota te rau nakon te aonnaba, I aki uota te rau ma I uota te kabaang. Bwa I roko bwa N na karika te iraraure. E na kaitaraa tamana te nati te mwaane, ao te nati te aine e na kaitaraa tinana, ao buun te nati te mwaane e na kaitaraa tinani buuna.” (Mat. 10:34, 35) Tera ae nanonna Iesu?

E aki tangiria Iesu bwa a na iraraure utu i marenaia, ma e ataia ae e na bon riki te iraraure n utu tabeua man ana angareirei. Ngaia are a riai n atai baika a na riki nakoia naake a kan riki bwa taan rimwini Kristo ao ni bwabetitoaki, man aia motinnano. Ngkana a kaitaraaki irouia buuia, aika tiaki kaain te onimaki ke kaain aia utu riki ake tabeman, e kona ni kangaanga irouia bwa a na teimatoa ni kakaonimaki nakon ana angareirei Kristo.

A kaungaaki Kristian n te Baibara bwa a na “karekea te rau ma aomata ni kabane.” (IRom 12:18) Ma e kona ana angareirei Iesu n riki bwa kaanga “te kabaang” nakoia utu tabeua. E riki aei ngkana iai temanna kaain te utu ae e butimwaea ana reirei te Baibara, ma ake tabeman a ribaia ke a kaitaraa. Ngaia are kaain te utu akanne, a kona n riki bwa taani kairiribai nakon ane e reiakina te koaua.—Mat. 10:36.

Taan rimwini Kristo aika a maeka n auti aika kakaokoro aia Aaro kaaina, a kona n tabetai n rinanoni kangaanga, ike e a kataaki iai aia tangira ibukin Iehova ao Iesu. N te katoto, a bae ni kairoroaki irouia aia utu ake tiaki kaain te onimaki, bwa a na bukamarui boongi ni motirawa n aia Aaro. Ngkana e kataaki aia onimaki, antai ngkanne ae a na kakukureia? E taku Iesu: “Ane e tangira riki tamana ke tinana nakoiu, e aki tau n riki bwa te tia rimwiu.” (Mat. 10:37) E bon aki taekinna Iesu nakoia taan rimwina, bwa ngkana a na tau n riki bwa taan rimwina, ao a na aki tangiriia aia karo. Ma e kataia n reireinia bwa a na bwaati ni baireia bwa e nga riki ae kakawaki ni maiuia. Ngkana a kaitaraa ara taromauri ara koraki aika tiaki kaain te onimaki, ti na bon teimatoa n tangiriia, ma ti ataia ae e moanibwai riki tangiran Iehova.

E koaua bwa e kona ni kananokawaki kaitaraakira irouia kaain ara utu. Ma a riai taan rimwin Iesu n ururinga aei: “Ane e rawa n uota ana kai ni kammaraki ma n irirai ao e aki tau n riki bwa te tia rimwiu.” (Mat. 10:38) N taekana riki teuana, a iangoia taan rimwini Kristo bwa te kakaaitara mairouia aia utu aika tiaki kaain te onimaki, bon teuana naba rawawataia Kristian ae a riai n nanomwaaka iai. Ma a kona naba ni kantaningaia ae a na manga bitaki aia iango aia utu akanne, ao ni kan reiakina te Baibara.—1Bet. 3:1, 2.