Taman Reoboam bon Toromon, are e uea i Iteraera i nanon 40 te ririki. (1Uea 11:42) E mate Toromon n 997 B.C.E. Imwina e a mwananga nako meang Reoboam mai Ierutarem nako Tekem bwa e na kabiraki bwa te uea. (2Rong. 10:1) N am iango, e raraomaeakina arona teuaei ni kakairi iroun Toromon are kinaaki ibukini wanawanana ae rianako? E na kangaa Reoboam ni kaman ataia ae n te tai ae waekoa ao e na kataaki ana konabwai ni kanakoraoi kangaanga?

E bae n namakina te nakonnano Reoboam i Iteraera. Imwin tabeua te tai, a a kawaria taan tei ibukia aomata ao a kaotii tabeaiangaia nakoina ni kangai: “E karawawatai amora tamam. Ma ngkana ko kauarerekea riki te mwakuri ae rawawata are mairoun tamam, ao ko kabebetea te amo ae tinebu are e katokaa i aora, ao ti na toro iroum.”—2Rong. 10:3, 4. 

E bae n namakinna Reoboam bwa e a aki ataa te bwai ae e nang karaoia! Ngkana e karaoa are a tangiria aomata, e na bae ni kerikaaki teutana kaubwaina ma ana utu ao kaain ana baareti, ibukini kaitaraani bwaai tabeua ake a tangiria aomata. Ma ngkana e aki irii nanoia, a na bae ni karitei nakoina. Tera ae e na karaoia? E maroro moa te uea ae boou aei ma unimwaane ake taan anga te reirei ni kairiri nakon Toromon. Ma imwina, e ukeri aia taeka n reirei rorobuaka ake ana roro. E ira nanon aia taeka n reirei naakai ao e motinnanoia bwa e na karaoa ae iowawa riki. E taku: “N na karawawatai riki amomi, ao N na kauaataoa riki. E kataereingkami tamau ni kaai ni kataere. Ma ngai N na kataereingkami ni kaai ni kataere aika kakang taboia.”—2Rong. 10:6-14.

Ko nora reireiara iai? E teretere bwa e wanawana ane e ongeaba irouia aika ikawai riki, ao aika ikawai naba n te onimaki. Ibukina bwa a a mwaatai riki, a kona n ataa te bwai ae e na riki imwin te babaire teuana ao n anganira te taeka n reirei ae raoiroi.—Iobi 12:12.

Ibukin te karitei aei, e a botiia ana taanga ni buaka Reoboam. Ma e katokia Iehova rinanon te  burabeti ae Temaia, ni kangai: “Kam na tai waerake ni buakania tarimi aika tibun Iteraera. Kam riai n okiri ami auti n tatabemaningkami, bwa I boni karika te baei.”—1Uea 12:21-24. *

E na aki buakania? Ko kona n iangoa aron tabeaiangan Reoboam! E na tera aia iango aomata iroun te uea ae kakamaakuia bwa e na kataereia “ni kaai ni kataere aika kakang taboia” ao e a manga nanoraoi nakon te karitei ae korakora aei? (Kabotaua ma 2 Rongorongo 13:7.) Ma e ngae n anne ao te uea ma ana taanga ni buaka a “ongo n ana taeka Iehova ao a okiri mwengaia n aron are e tuangia Iehova.”

Tera reireiara iai? Ti wanawana ngkana ti ongeaba iroun te Atua, e ngae ngke ti na kamaamaeaki iai. E na akoira ao ni kakabwaiaira te Atua ngkana ti ongeaba irouna.—TuaKau. 28:2.

Tera are e riki nakon Reoboam? E ongeaba bwa e aki karaoa nanon ana babaire are e na buakana te natannaomata are e a tibwa tei, ma e kaatuua ana iango i aoni kateani kaawa n aonon aia baronga Iuta ao Beniamin ake e uea iai. E a manga kamatoai riki kaawa aika bati “n te aro ae moan te korakora.” (2Rong. 11:5-12) Ma ae kakawaki riki, e nimti ana tua Iehova i nanon tabeua te tai. Ngke e a rangi ni korakora taromauriani bouannanti n te tautaeka n uea ni baronga ake tebwina mai meang, ae Iteraera arana are e tautaekanna Ieroboam, a bati man te tabo anne ake a “boutokaa Reoboam” n aroia ni mwananga nako Ierutarem bwa a na boutokaa te taromauri ae koaua. (2Rong. 11:16, 17) E kakorakoraaki ana tautaeka Reoboam n ongeabana.

Ma ngke e a matoa raoi ana tautaeka Reoboam, e a karaoa te bwai teuana ae aki kantaningaaki. E kitana ana tua Iehova ibukin tangiran aia taromauri beekan! Bukin tera? E karaoa aei i aan ana kariri tinana are tibun Ammon? (1Uea 14:21) N aki ongeia bwa tera bukini karaoan aei irouna, ma e boni bane te natannaomata anne ni kakairi irouna. Ngaia are e a kariaia Iehova Uean Aikubita ae Titiaka bwa e na kataenikai kaawan Iuta aika bati e ngae ngke e a tia ni kamatoai ooia Reoboam!—1Uea 14:22-24; 2Rong. 12:1-4.

E a roko ni korakorana te kangaanga ngke e a roko Titiaka i Ierutarem, are e uea iai Reoboam. N te tai aei, e nikira ana rongorongo te Atua Temaia iroun Reoboam ma ana toka nako, ni kangai: “Kam a tia ni kitanai, ai ngaia ae I kitaningkami naba i nanoni bain Titiaka.” Tera aron Reoboam nakon te reirei ni kaetieti anne? E bon tau ni kamoamoaaki! E kangai te Baibara: “A kananorinanoia tokan Iteraera ma te uea ao a taku: ‘E raoiroi Iehova.’” Ibukin anne ao Iehova e kamaiua Reoboam ao Ierutarem ao e a aki kamaunaia.—2Rong. 12:5-7, 12.

Imwin anne, e teimatoa n tautaeka Reoboam n te tautaeka n uea mai maiaki. Imwaini matena, e tituaraoi n tibwatibwai ana bwaintangira nakoia natina mwaane aika bati ibukini kamarauan nanoia bwa a na aki karitei nakon tariia ae Abiia, are e na ruamwina. (2Rong. 11:21-23) N te aro aei, e a kaotia iai Reoboam bwa e bati ana ataibwai, ma e aki kaotiotia n te moantai.

E ngae ngke a raraoi aroaron Reoboam, ma e kabwaka ni karekea akoana iroun te Atua. E taekin ana waaki n tautaeka te Baibara ni kangai: “E karaoa ae buakaka.” Bukin tera? Ibukina bwa “e aki kamatoaa i nanona bwa e na ukera Iehova.”—2Rong. 12:14.

Iangoi baika riki aikai: E ongeaba Reoboam iroun te Atua n tabetai. Ao e karaoi bwaai tabeua aika raraoi ibukin ana natannaomata Iehova. Ma e kabwaka ni karikirakea ana iraorao ae kaan ma Iehova ao akea nanona ni kani kakukureia. Ngaia are e a karaoa ae bure ao e boutokaa te taromauri ae kewe. Ko bae n iango ni kangai: ‘Ngke e butimwaea kaetana Reoboam mairoun te Atua, e kakairi irouia tabemwaang ke ibukin ana rairannano ni koaua ao kani kakukureian te Atua?’ (2Rong. 11:3, 4; 12:6) Imwina riki, e a manga okira arona ni kakaraoa ae buakaka. Ai boni kaokorora ma tibuna ae Tawita are te Uea! Eng, e karaoi kairua Tawita, ma e ataaki bwa e tangira Iehova ni maiuna, e bane nanona nakon te taromauri ae koaua, ao e raira nanona ni koaua man ana bure.—1Uea 14:8; TaiAre. 51:1, 17; 63:1.

 Ni koauana, ti kona ni karekea reireiara mairoun Reoboam. A riai ni kamoamoaaki aomata aika katauraoi baika kainnanoi aia utu ao a kekeiaki ni kakororaoi baika manena. Ma ngkana ti kani karekea akoara iroun te Atua, te bwai ae kakawaki boni moanibwaian ao boutokaan te taromauri ae koaua ao nimtakina.

Ti na bae ni karaoa aei ngkana ti kakorakoraira ni kateimatoa tangiran Iehova. N aron ae ti karekarea kanaan te ai bwa e na teimatoa n ura, ti riai naba n teimatoa ni kakorakoraa tangiran te Atua iroura rinanon ara katoatai n ukeuke n reirei n ana Taeka, kananoan ara iangoi iai, ao botumwaakara n tataro. (TaiAre. 1:2; IRom 12:12) Ao ngkanne tangiran Iehova iroura, e na kakorakorai nanora ni kani kakukureia ni bwaai nako aika ti karaoi. E na kaungaira naba nakon te rairannano ni koaua ngkana e kainnanoaki. Ti na aki kakairi iroun Reoboam ma ti na tei n nene n te taromauri ae koaua.—Iuta 20, 21.