Tera Raoi ae Kona ni Karekea Kabwaiam n Taai Aika a na Roko?
A bati aika kakoauai baika aki nonoraki bwa a rotaki iai maiuia nakon taai aika a na roko. Ibukin anne, a a kakaraoi baike a iangoi bwa a kona ni kanakoraoi maiuia nakon taai aika imwaia.
TE BWAI AE A KAKOAUAA AOMATA AIKA BATI
KAIWANAKIN ITOI: A kakoauaa tabeman bwa e boboto maiuia n taai aika a na roko man aroni bairean itoi n te tai are a bungiaki iai. A tarai butin itoi bwa a aonga n atai baike a na riki nakoia ao a na totokoi rikia, ke ni kanakoraoi riki.
FENG SHUI: Naake a kakoauaa te aeka ni kaiwa aei, a iangoia bwa e kona n nakoraoi maiuia ngkana a katea aia auti ke ni bairei bwaina n aroni baireani baika aki nonoraki. E taku Lo Wing * mai Hong Kong: “E tuangai te tia rabakau n te feng shui bwa ngkana I kaaki te booro ae te kiraati ni nnena ae riai n au titooa, e na bati riki au karekemwane.”
TAROMAURIAIA BAKATIBU: A kakoauaa tabeman bwa a riai n taromauria aia bakatibu ake a a tia ni mate, ke atuaia riki tabeman, bwa a aonga ni kawakinaki ao ni kakabwaiaaki irouia. E taku Van mai Vietnam: “I kakoauaa ae taromauriaia au bakatibu e na karekea maiuu ae tamaroa riki ao kabwaiau ma natiu nakon taai aika imwaira.”
TE MANGA BUNGIAKI NAKON TE RABWATA TEUANA: A bati aika iangoia bwa e reitinako te maiu, ngaia are ngkana e mate temanna e na manga bungiaki. A kakoauaa ae baika raraoi ke aika bubuaka aika a rinanoi ngkai, a bon reke imwini maiuia are mai mwaina.
E ngae ngke a bati aika aki kakoauaa anne, ma a boni boutokai naba mwakuri n aron taraan rainin te nanonibai, te kaiwa, te kabuti bwatoro, kabwaraani kawaia n te kaati, ao tabeua riki. A iangoia bwa a kona ni buokaki iai n atai baika a na riki nakoia n taai aika imwaia.
TERA MWINA?
E reke te maiu ae kakukurei ao te kabwaia irouia naake a kakoauai ao ni kakaraoi baikai?
Iangoa ana katoto Hào ae mena i Vietnam. E kamanena kaiwanakin itoi, te feng shui, ao taromauriaia bakatibu, ibukini kairirana. Ma e karekea te kabwaia? E taku teuaei: “E ruuti au bitineti, I koko n taarau, e aki nakoraoi au utu, ao I a rangi n rawawata.”
E kakoauaa naba kaiwanakin itoi, te manga bungiaki, taromauriaia bakatibu, te feng shui, ao te iango ae e a kamani baireaki maium, te mwaane ae Qiuming mai Taiwan. Imwin neneran raoi baikai ao e taku: “I a ataia ae a boni kauntaba koaua ao katei aikai i marenaia, ao a kamengomengo. I noria ae e aki eti n taai nako kaiwanakin itoi. Ao ni kaineti ma te manga bungiaki, ngkana arona bwa ko aki uringa maium are mai mwaina, ko nang kangaa ni karaoi bitaki ao ni kanakoraoa riki maium are imwina?”
“I a ataia ae a boni kauntaba koaua ao katei aikai i marenaia, ao a kamengomengo.”—QIUMING, TAIWAN
A ataia imwina riki Hào, Qiuming, ao tabeman riki, bwa e aki karekea kabwaiara nakon taai aika imwaira te koaua ae e a kaman tia ni baireaki maium, butin itoi, ara bakatibu aika a tia ni mate, ao te manga bungiaki. Nanona ngkanne bwa ti aki kona ni karaoa te bwai teuana ibukini maiura nakon taai aika imwaira?
A bati aika iangoia bwa te anga ae a kona iai ni karekea te kabwaia nakon taai aika imwaia, bon uaiakinan te reirei ae rietata ao te kaubwai. Tera ae a karekea naake a uaiakina anne?
^ bar. 5 A a tia ni bitaki aara tabeua n te kaongora aei ao are imwina.
^ bar. 16 E taekinaki anne n te Baibara ae Tabu n I-Karatia 6:7. Titeboo te iango anne ma aia taeka n rabakau kaain Atia ae kangai: “Unika te meron ao ko na taia te meron. Unika te biin ao ko na taia te biin.”
Ko Bae Naba n Tangira
TE TAUA-N-TANTANI
Kaiwanakin Itoi ao Taai Aika a na Roko—Ti Kona Iai n Atai Kanoan Taai Aika Imwaira?
Ko kona n onimakini aeka ni katautau aikai?
TE TAUA-N-TANTANI
Te Bae Taekinaki n te Baibara Ibukin te Maiu ao te Mate
Ma te koaua bwa iai te bwai teuana iroura ae teimatoa ni maiu imwini matera? Bon iai te taamnei iroura ae aki mamate? A mena ia maate?
