“E Nga te Atua?”
“I AKI TOKI N TITIRAKI NI KANGAI: E NGA TE ATUA?”—Pope Benedict XVI, ngke e kawara te tabo ni kaikain ngkoa i Auschwitz, i Poland.
NGKANA A RIKI KABUANIBWAI, KO A TIA N TITITIRAKI NI KANGAI, ‘E NGA TE ATUA?’ KE E A TIA N RIKI TE BAE KAMMARAKI NI MAIUM IKE KO A TITIRAKI IAI BWA E MUTIAKINIKO TE ATUA KE E AKI?
Tao titeboo am namakin ma Sheila ae maeka n te United States. E ikawairake n te utu ae taua te Aro ao e taku: “Man uarerekeu ao e anaaki nanou iroun te Atua kioina ngkai bon te tia Karikira. Ma I aki roko n te kaaniaki ma ngaia. Irou e tii tataraai mai kiraroa. I aki iangoia bwa e ribaai te Atua, ma I aki naba kakoauaa ae e mutiakinai.” E aera Sheila ngke e nanououa? E kabwarabwaraa ni kangai: “A rinanon te kabuanibwai teuana imwin teuana au utu, ao n taraana e bon aki roko n te buokira te Atua.”
N aron Sheila, ko bae ni kakoauaa ae iai te Atua ae Moan te Mwaaka. Ma ko bae naba n titiraki bwa e mutiakiniko ke e aki. E nanououa naba te mwaane ae raoiroi are Iobi ae onimakina mwaakan ao wanawanan te tia Karikiriki. (Iobi 2:3; 9:4) Imwin orean Iobi n te kabuanibwai teuana ma teuana ike e a taraa iai n akea kabebeteana, ao e a titirakina te Atua ni kangai: “E aera ngkai ko karabaa matam ao ko iangoai bwa aiam?”—Iobi 13:24.
Tera ae e taekinaki n te Baibara? E na bukinaki te Atua n rikin te kabuanibwai? Iai te bwai ni kakoaua bwa e boni mutiakinia aomata te Atua ao ngaira n tatabemanira nako? Iai iroura ae e kona n ataia raoi bwa e tabeakinira te Atua, e atai rawawatara, e nanoangaira, e buokira n ara kangaanga, ke e aki?
Ni kaongora aika imwina ao ti na nora reireiara man te karikibwai ni kaineti ma mutiakinara iroun te Atua. (I-Rom 1:20) Ti na rinanon naba ana taeka te Baibara ni kaineti ma anne. Ngkana ko a ‘ataa’ riki teuaei rinanon ana karikibwai ao ana Taeka, e na rau riki nanom n ataakin ae e boni ‘mumutiakiniko.’—1 Ioane 2:3; 1 Betero 5:7.
