1. Ti kangaa n ataia bwa karekeaia taan rimwini Kristo bon te mwakuri ni kakamaiu?

BON te mwakuri ni kakamaiu karekeaia taan rimwini Kristo! Ti kangaa n ataia? Ngke e anga ana kaetieti Iesu ni Mataio 28:19, 20, e boni kangai: “Naako, reireinia . . . bwa a na riki bwa taan rimwiu ao bwabetitoiia.” Tera ae ti ataia ibukini kakawakin te bwabetito? Ti bon riai ni bwabetitoaki ngkana ti kani maiu n aki toki. E riai te aomata ae kani bwabetitoaki ni kakoauaa bwa e kona ni karekea te maiu are aki toki tii mani maten Iesu ibukira ao mangautina. Anne bukina are e tuangia iai raona ni Kristian te abotoro Betero ni kangai: “E kamaiuingkami naba ngkai te bwabetito . . . rinanoni mangautin Iesu Kristo.” (1Bet. 3:21) Ma ngkana e a bwabetitoaki te tia rimwini Kristo ae boou, e a kona ngkanne ni kantaningaa te maiu are aki toki.

2. Tera aron te tia angareirei ae taekinaki n te 2 Timoteo 4:1, 2 ae ti riai ni kakairi iai?

² Ibukini karekeaia taan rimwini Kristo, ti riai ni karikirakea ‘rabakaura n angareirei.’ (Wareka 2 Timoteo 4:1, 2.) Bukin tera? Ibukina bwa e tua Iesu ae kangai nakoira: “Naako, reireinia aomata . . . bwa a na riki bwa taan rimwiu.” E taekinna te abotoro Bauro bwa ti na “teimatoa” n te mwakuri anne, ‘bwa ngkana ti karaoa aei, ti kamaiuaki iai ma ake a ongo iroura.’ Imwina e a manga kangai: “Teimatoa n tarataraa raoi . . . aron am angareirei.” (1Tim. 4:16) Kioina ngkai iai irekereken te angareirei ao karekeaia taan rimwini Kristo, ti tangira ara angareirei bwa e na nakoraoi riki.

3. Tera ae ti na rinanona n te kaongora aei ibukini kairan te reirei man te Baibara?

³ Ti katoatai n reireinia aomata aika mirion ma mirion koaua man te Baibara. Ma n aron ae taekinaki n te kaongora are imwain aei, ti kan ataia bwa tera arora ni buokiia aika bati bwa a na riki bwa taan rimwin Iesu Kristo aika bwabetitoaki. N te  kaongora aei, ti na rinanoi aanga riki aika nimaua ake e riai ni karaoi te tia kaira te reirei bwa e aonga ni buoka ana aomata bwa e na rikirake nakon te bwabetito.

4. E aera bwa e riai te tia kaira te reirei n te Baibara ni bwaina te taotaonakinnano ngkana e kaira te reirei? (Nora naba te kabwarabwara mai nano.)

⁴ Ti tangira te bwai ae ti reiakinna man Ana Taeka te Atua, ao ti boni bae ni bwaina atin te maroro. Ngaia are ni kairan te reirei n Te Taua-n-Tantani, te Reirei n te Baibara n te Ekaretia, ke te reirei n te Baibara ni mwengan ane ko reirei ma ngaia, e riai te tia kaira te reirei n aki bwaina atin te maroro. Ngkana ti na kamanena te Baibara n ara angareirei, e riai te tia kaira te reirei ni bwaina te taotaonakinnano, bwa e na aki kataia ni kabwarabwarai bwaai ni kabane ake e atai ibukini kiibu tabeua ke te reirei teuana. * (Ioa. 16:12) Kabotaua te bwai ae ko ataia man te Baibara ngke ko bwabetitoaki ma ae ko a ataia ngkai. N te tai anne, ko boni bae n tii atai moan reirei aika kakawaki man te Baibara. (Ebera 6:1) Ko bae naba ni kabanei ririki aika bati ibukini karekean am atatai ae ngkai. Ngaia are tai kataia n reireina am aomata anne bwaai ni kabane n te tai ae tii teuana.

5. (a) Ni kaineti ma 1 I-Tetaronike 2:13, tera ae ti tangiria bwa e na ataia ara aomata man ana reirei? (b) Ti na kangaa ni kaungaia bwa a na tataekini baike a reiakin?

⁵ Ti tangiria bwa e na ataia ara reirei n te Baibara bwa te bwai ae e reiakinna, e bon nako man ana Taeka te Atua ae kairaki koreana. (Wareka 1 I-Tetaronike 2:13.) Ti na kangaa ni karaoa anne? Kaungaa am aomata anne bwa e na tataekini baike e reiakin. N oneani mwin are ko kabwarabwarai n taai nako kiibu man te ­Baibara nakoina, tuangnga bwa e na kabwarabwarai tabeua nakoim. Buokia bwa e na ataia bwa tera aron irekereken Ana Taeka te Atua ma aroarona. Tabeki titiraki aika kona ni buokia bwa e na kaota ana iango ke ana namakin ibukin te kibu are e warekia. (Ruka 10:25-28) N te katoto, titirakinna ni kangai: “Ko kangaa ni buokaki n te kibu aei n nora iai aroaron Iehova teuana?” “Ko na kangaa ni buokaki mani baika ko a tibwa reiakini man te Baibara?” “Tera am namakin ni baika ko a tibwa tia n reiakin?” (TaeRab. 20:5) Te bwai ae moan te kakawaki riki, tiaki ana atatai ae bati am aomata anne, ma bon tangiran ao maiuakinan te baere e reiakinna.

6. E aera bwa e raoiroi kairan te tia angareirei ae mwaatai ngkana ti reirei ma ara aomata?

⁶ Ko a tia ni kairiia taan uarongorongo aika mwaatai n angareirei ngkana ko karaoa te reirei n te Baibara? Ngkana ko a tia, titirakinia bwa tera aia iango  iroum ni kairan te reirei ao e nakoraoi arom ni kabongana te Baibara ke e aki. Ko riai ni bwaina te nanorinano ngkana ko kan riki bwa te tia reirei ae rabakau riki. (Kabotaua ma Mwakuri 18:24-26.) Imwina, titirakina te tia uarongorongo ane mwaatai anne bwa tera ana iango ibukin am aomata, e ota n te bwai ae e reiakinna ke e aki. Ko kona naba ni butiia te tia uarongorongo anne bwa e na reirei ma am aomata anne ngkana ko na mwananga nako i nanon teuana te wiki ke e nako riki. Ni karaoan anne, e a kateimatoaaki iai te reirei ae katoatai ao e na ataa kakawakin ana reirei am aomata anne. Tai iangoia bwa bon “am” aomata aei ao akea riki ae kona ni kaira te reirei ma ngaia. Ni koauana, ko tangiria ni kabanea am konaa ibukina bwa e aonga n teimatoa n reiakina ae bati riki ibukin te koaua.

7. Tera ae e na buoka te aomata ae reirei n te Baibara bwa e na tangiri baike e reiakin?

⁷ E riai am aomata n noria bwa ko tangiri ao ni kakoauai koaua aika n te Baibara. (1Tet. 1:5) Ao ane e na bae n tangiri riki baike e reiakin. Tao ko kona naba n taekinna ae a a tia ana boto n reirei te Baibara ni buokiko ni kanakoraoa maium. Ao ane e na ataia bwa e kona naba te Baibara ni buokia.

8. Tera riki ae ko kona ni karaoia ibukini buokan am aomata, ao bukin tera ngkai ko karaoia?

⁸ Ngkana ko reirei ma am aomata, taekini katoto ni kaineti ma rongorongoni maiuia aomata ake a a tia ni kaaitarai kangaanga, ake titeboo ma ana kangaanga ao a a tia naba n tokanikai i aoia. Ko kona naba ni kaira temanna man te ekaretia are e kona ana katoto ni kakabwaiaaki iai am aomata anne. Ke ko kona naba ni karekei rongorongo aika rereitaki n te jw.org ae kangai atuna, “The Bible Changes Lives.” * E na boni buokaki am aomata n taian taamnei ao rongorongo aikai n ataia bwa e kona te Baibara ni kanakoraoa maiuna.

9. Ko na kangaa ni kaungaa am reirei bwa e na tibwai baike e reiakin nakoia ana utu ao raoraona?

⁹ Ngkana arona bwa e a tia ni mare am aomata anne, e reirei naba n te Baibara buuna? Ngkana e aki, weteia bwa e na raoningkami n te reirei. Kaungaa am reirei anne bwa e na tibwai baike e reiakin nakoia ana utu ao raoraona. (Ioa. 1:40-45) N te aro raa? Ko kona n titirakinna ni kangai: “Ko na kangaa ni kabwarabwaraa te koaua aei nakoia am  utu?” ke “Tera te kibu ae ko na kamanena ibukini kakoauaan aei nakon raoraom?” Ni karaoan aei, ko bon reirei ni kataneia iai am reirei anne bwa e aonga n riki bwa te tia angareirei. Ao ngkana e a katauaki, e a kona ngkanne n uarongorongo ma kaain te ekaretia. Ko kona naba n titirakinna bwa iai ae e ataia ae e kan reirei n te Baibara ke akea. Ngkana iai, taetae ma ana aomata ane e kan reirei anne ngkekei naba ao tuangnga ae ko kan reirei naba ma ngaia. Kaota nakoina te taamnei ae E Kangaa Aroni Kairan te Reirei n te Baibara? *?

10. N aron ae taekinaki n 1 I-Tetaronike 2:7, 8, e na kangaa te tia kaira te reirei ni kakairi n ana katoto Bauro?

¹⁰ A riai taani kaira te reirei ni kaota tabeakinan raoi aia reirei n te Baibara. Iangoiia bwa tarim n te onimaki n taai aika a na roko. (Wareka 1 I-Tetaronike 2:7, 8.) E na boni kangaanga irouia kitanakia raoraoia aika kaain te aonnaba ao karaoani bitaki aika riai ngkana a na beku ibukin Iehova. Ti riai ni buokiia bwa a na karekeia raoraoia ni koaua n te ekaretia. Karikia bwa raoraom am reirei anne n arom ni kabatiaa am tai ma ngaia tiaki tii n ami tai n reirei ma n taai riki tabeua. Ngkana ko tareboonia, ko kanakoa am text ke ko kawaria i marenan tai n am tai n rereirei ma ngaia, e oti iai bwa ko bon tabeakinna.

11. Tera ae ti tangiria bwa a na noria i nanon te ekaretia naake ti reirei ma ngaiia n te Baibara, ao bukin tera?

¹¹ E tataekinaki ae kangai: “A kainnanoaki kaain te kaawa ni kabane bwa a na ibuobuoki ibukini kaikawaan te teei.” Ao ti kona n taekina aei: “A kainnanoaki kaain te ekaretia ni kabane bwa a na ibuobuoki ibukini karekean te tia rimwini Kristo.” Anne bukina ngkai taan angareirei n te Baibara aika mwaatai, a kairiia aia aomata bwa a na kinaia tabeman n te ekaretia ake a kona naba ni buokiia bwa a na kaaniaki riki ma Iehova. A a kona ngkanne naake a reirei n te Baibara ni kukurei n ikoikotaki ma ana aomata te Atua ake a kona n anga aia ibuobuoki ni kaineti ma aia onimaki ao aia namakin. Ti tangiriia ara aomata bwa a na namakinna ae titeboo ma ai boni kaain te ekaretia ngaiia ao kaain naba ara utu n taamnei. Ti tangiriia naba bwa a na katikaki nakon ara botaki n itaritari ni Kristian ae tatangira. Ao e na bebete riki iai katokan ana iraorao ma aomata ake a aki kona ni buokia bwa e na tangira Iehova. (TaeRab. 13:20) Ngkana a a riribaia raoraona ake rimoa, e bae n noria ae e kona ni karekeia raoraona ni koaua n ana botaki Iehova.​—Mareko 10:29, 30; 1Bet. 4:4.

12. E aera bwa ti riai ni mamaroroakina te katabu ao te bwabetito nakoia ara reirei n te Baibara?

¹² Katoatai ni maroroakina kakawakin te katabu ao te bwabetito. Ni koauana, tiara ni  kairan te reirei n te Baibara, boni buokan te aomata anne bwa e na riki bwa te tia rimwini Kristo ae bwabetitoaki. Ngkana e a tia ara aomata anne ni moana te reirei ao ni kakaaei bobotaki i nanon tabeua namwakaina, e a riai n ataia bwa ti kani buokia bwa e na riki naba bwa temanna Ana Tia Kakoaua Iehova.

13. Tera ae riai ni karaoia te aomata ae reirei n te Baibara bwa e aonga ni bwabetitoaki?

¹³ Iai bwaai tabeua ake e riai ni karaoi ara aomata are kani bwabetitoaki! E riai moa ni kinaa Iehova, e na tangiria ao n Onimakinna. (Ioa. 3:16; 17:3) E a riki ngkanne bwa raoraon Iehova ao raoraoia naba taari n te ekaretia. (Ebera 10:24, 25; Iak. 4:8) N tokin te tai, e a kaaki mwakuri aika bubuaka ao e a raira nanona man ana bure. (Mwa. 3:19) Imwina riki, e a kairaki man ana onimaki bwa e na tibwaanako te koaua nakoia tabemwaang. (2Kor. 4:13) Imwina e a katabua maiuna nakon Iehova ao ni kaotia rinanon te bwabetito. (1Bet. 3:21; 4:2) Ai kakukureira te bong anne nakoia taari ni kabane! Ngkana e karaoi bwaai ni kabane akanne te aomata anne bwa e aonga ni bwabetitoaki, e riai ni kamoamoaaki ao ni kaungaaki bwa e na kateimatoa rikirakena.

14. E na kangaa te tia kaira te reirei n te Baibara n tutuoa rikiraken ana aomata?

¹⁴ Ti riai ni bwaina te taotaonakinnano ngkana ti buokiia ara aomata bwa a na rikirake nakon te katabu ao te bwabetito. Ma ti bon riai naba n ataia bwa e kani beku ibukin Iehova ae te Atua ke e aki. E kaotia n aroarona am aomata anne bwa e kekeiaki n ongeaba n ana tua Iesu? Ke e bon tii kan atai baika kakaongora man te Baibara?

15. Baikara kanikinaean te rikirake ae e riai n noria te tia reirei n te Baibara iroun ana aomata?

¹⁵ Katoatai n tuoa rikiraken am aomata. N te katoto, e kaotiota ana namakin ibukin Iehova? E tatataro nakon Iehova? (TaiAre. 116:1, 2) E kani wawareka te Baibara? (TaiAre. 119:97) E katoatai n iriri bobotaki n taromauri? (TaiAre. 22:22) Iai bitaki ni maiuna ae oti iai bwa e maiuakini baike e reiakin? (TaiAre. 119:112) E a tia ni moana tibwaakini baike e reiakin nakoia ana utu ao raoraona? (TaiAre. 9:1) Ao ae kakawaki riki, e kan riki bwa  temanna Ana Tia Kakoaua Iehova? (TaiAre. 40:8) Ngkana akea te rikirake ae ko noria iroun am aomata anne n itera aikai, kakaaea am anga ae ko na ataa iai bukina ao maroroakina ana kangaanga ma te akoi ao n akea te imamaakin. *

16. N ningai ae ko a riai ni katoka iai te reirei n te Baibara ma am aomata?

¹⁶ Titirakiniko ni katoatai bwa ko riai n reitaanako am reirei ma te aomata anne ke ko na aki. Titirakiniko ni kangai: ‘E aki kakatauraoi imwain te reirei? E aki rangi ni kakaaei bobotaki n taromauri? E teimatoa ni kaotiotii aroaro aika aki raraoi? E teimatoa naba ni kaaina te aro ae kewe?’ Ngkana te kaeka iai eng, teimatoam ngkanne n reirei ma ngaia, titeboo iai ma ko kataia n reireina te aomata aron te uaua ao e aki kani kamwaimwaia! Ngkana e aki ringaki nanon te aomata anne ni baike e reiakin ao e aki tauraoi ni karaoi bitaki, ko a aki riai ngkanne n reitaanako te reirei ma ngaia?

17. Ni kaineti ma 1 Timoteo 4:16, tera ae a riai ni bane ni karaoia taani kaira te reirei n te Baibara?

¹⁷ E rangi ni kakawaki bwa ti na kakororaoa mwiokoara ae karekeaia taan rimwini Kristo, ao ti kani buokiia ara reirei n te Baibara bwa a na rikirake nakon te bwabetito. Anne bukina ngkai ti kamanena te Baibara n ara angareirei ma te ingaingannano ao kakoauaan te bwai ae ti taekinna. Ti na kaungaa ara aomata bwa e na karekeia raoraona n te ekaretia. Ao ti na kaatuua taekan te tia ae te katabu ao te bwabetito, n arora ni katoatai n tutuoa rikiraken ara aomata. (Nora te bwaoki n iteraniba 13, ae “ Baika A Riai ni Karaoi Taani Kaira te Reirei n te Baibara Ibukia Aia Reirei Bwa A na Tau Nakon te Bwabetito.”) Ti kukurei ngkai ti kona n uataboa te mwakuri ni kakamaiu aei! Ti kani karaoa ara kabanea ni konaa ni buokiia ara reirei n te Baibara bwa a na rikirake nakon te bwabetito.