A MARE Daniel ao Miriam n Tebetembwa n 2000, ao a maeka n te kaawa ae Barcelona i Tibein. E taku Daniel: “Ti maiu n aron ae tataneiai te aba iai. Man ara kareketianti, ti kona n amwamwarake n taiani kirabu, n nanako tinaniku, ao ni bwaini kunnikai aika tamaroa. Ti katoatai naba n uataboa te mwakuri ni minita.” Ma n te taina e a riki te bitaki.

N te bwabwaro n 2006, e rangi n rotaki nanon Daniel n te kabwarabwara ae tabekaki iai te titiraki aei: “Ti karaoa ara kabanea ni konaa ni buokiia naake a ‘tatanako nakon te tiringaki’ bwa a na toua te kawai nakon te maiu n aki toki?” (TaeRab. 24:11) E katuruturuaki iai kakawakin te mwioko ae tibwaan te rongorongo ni kakamaiu man te Baibara. (Mwa. 20:​26, 27) E ururing ni kangai Daniel: “Irou, e a bon taetae nakoiu Iehova.” E taekinaki naba n te kabwarabwara anne bwa e kakimwareirei riki karababaan te mwakuri ni minita. E ataia Daniel ae e boni koaua aei. E a kamani moana ana bwaiania Miriam ao e karekei kakabwaia aika kakukurei.

E taku Daniel: “I motikia bwa I a riai ni karaoa te bitaki ae korakora.” Ao e boni karaoia. E kauarerekea ana aoa ni mwakuri ni kareketianti, e moana ana bwaiania, ao e iaiangoa te kimwareirei are e kona n reke irouna ma Miriam ngkana a beku n te tabo ae korakora riki iai kainnanoaia taan tataekina te Tautaeka n Uea.

Ni Mei 2007, a kitan aia mwakuri ni kareketianti Daniel ma Miriam ao a nako Panama, ae te aba ae a a tia n roko iai mai mwaina. Aia aono ae boou aei bon abamwakoro aika kakaokoro n te Bocas del Toro Archipelago n te marawa ae te Caribbean, ae angia kaaina bon taian Guaymi aika kaain te aba. A iangoia Daniel ma Miriam bwa a kona n tiku i Panama tao wanua namwakaina man aia kaikomwane.

A mwamwananga n aaba aikai n te booti ao n te bwatika, ao a uringa raoi moani bwatikaia ae tao 20 te maire (32 te kiromita) ni kawai aika karabee i aani kabuebuen taai. E kuri n tong Daniel bwa e a rangi ni kua. Ma a butimwaeaki raoi n auti ake i aoni kawaia irouia utu ake kaain te aba, moarara riki ngkai a a tia te taanga aei n reiakin taeka tabeua n aia taetae. E aki maan ao a a kairi reirei n te Baibara aika 23.

Ngke e a bane aia kaikomwane te taanga aei ao a taonaki n te nanokawaki. E ururing ni kangai Daniel: “Ti bon tang ngke ti a iangoa okira nako Tibein. Ti rangi n nanokawaki ngkai ti nang kitania ara reirei n te Baibara.” Ma teuana te namwakaina imwina, e a roko irouia te rongorongo ae kakukurei. E taku Miriam: “Ti a kaoaki bwa ti na beku bwa bwaiania aika okoro. Ai kimwareireira ngaira ngkai ti a kona n tiku n ara tabo ni mwakuri aei!”

Imwini bitaki ake a karaoaki n ana botaki Iehova n 2015, a tuangaki Daniel ma Miriam bwa a nang manga beku bwa bwaiania aika katoatai. Tera ae a karaoia? A onimakina te berita are n Taian Areru 37:5: “Angan Iehova arom, onimakinna ao e na karaoi bwaai ibukim.” E reke aia mwakuri ni kareketianti ibukini boutokaaia ni bwaiania, ao a a beku ngkai n te ekaretia n aonon Veraguas i Panama.

E taku Daniel: “Imwaini kitanan Tibein, ti aki koaua bwa ti kona ni kabebetei maiura ke ti aki. Ma ti boni karaoia ngkai, ao akea te bwai ae ti tare iai ae kakawaki.” Tera ae karekea kimwareireia ae moan te bati? A taku: “E karekea te kimwareirei ae akea kabotauana, buokaia aomata aika nanorinano n reiakina taekan Iehova!”