IBUKIA AKE A ATAEI RIKI
10: Te Onimakinaki
AE NANONAKI IAI
Naaka a onimakinaki, a onimakinaki irouia aia karo, raoraoia, ao aia tia kammwakuri. A irii tuua, a kakororaoi aia berita, ao a kaokaota te koaua.
BUKINA NGKAI E KAKAWAKI TE KONA N ONIMAKINAKI
N angiin te tai ao e irekereke riki te inaomata ae ko anganaki ma aron onimakinam.
“Te anga ae te kabanea n raoiroi ae ko kona n onimakinaki iai irouia am karo, boni mani kaotan ae ko a ikawai ao ko kona ni mwiokoaki, e ngae naba ngkana a aki mena i rarikim.”—Sarahi.
TE BOTO N REIREI MAN TE BAIBARA: “Teimatoa n tuoingkami bwa tera aromi.”—2 I-Korinto 13:5.
TE BWAI AE KO KONA NI KARAOIA
Ngkana ko kani karikirakea onimakinam ke ni kaoka onimakinam, ko kona ni buokaki ni baika i nano.
Bwabwaina te koaua. Akea te bae e kona ni waekoa ni bua iai onimakinam irouia aomata, bwa bon tii te kewe. Ma ngkana ko bwabwaina te koaua ao ko aki kakarabai am kairua, ko kona n onimakinaki iai irouia aomata.
“E bebete bwabwainan te koaua ngkana a nakoraoi bwaai. Ma taekinan te koaua e ngae ngke ko na taekanabuaka iai, e na karikirakea riki onimakinam irouia aomata.”—Caiman.
TE BOTO N REIREI MAN TE BAIBARA: “Ti kani bwabwaina te koaua ni bwaai ni kabane.”—Ebera 13:18.
Bwaina te kakaonimaki. N te kakaae teuana man te U.S. ao 78% mai buakoia naake a tabe ma rikirakeia taani mwakuri, ae a taekinna bwa te kona n onimakinaki “bon teuana mai buakon aroaro aika tenua aika rangi ni kakawaki ibukin te kareke mwakuri.” Reiakinani bwainan te kakaonimaki ngkai e na buokiko ngkana ko a ikawai.
“A noria au karo bwa I a kona ni mwiokoaki ao I a kakaraoi tabeu ni mwengau n aki tutuangaki. Ngkana I biririmoa ni karaoa tabeu n aron anne, ao a a onimakinai riki.”—Sarah.
TE BOTO N REIREI MAN TE BAIBARA: “I koroboki nakoim bwa I onimakiniko . . . I ataiko bwa ko na boni karaoa ae raka riki nakon ae I taekinna.”—Biremon 21.
Bwaina te taotaonakinnano. E kona ni kai noraki ikawaia ataei, ma e kangaanga noran ae a a wanawana ao ni kona ni mwiokoaki. Ibukin anne, a riai n taotaon nanoia naake a ataei riki.
“A aki kona n onimakiniko am karo ao tabeman riki tii man te bae ko karaoia ae tii teuana. Ma ko kona ni karekea onimakinam teutana imwin teutana ngkana ko kakaraoa mwiokoam.”—Brandon.
TE BOTO N REIREI MAN TE BAIBARA: “Karina i aomi . . . te taotaonakinnano.”—I-Korote 3:12.
