Ni katoa ririki, ao birion ma birion aroka aika koreaki, bwa e na kaitiakaki te aba ibukin unikani kaai n amwarake. Man raabanen 1940 tabun, ao a a tia ni bua iterani mwaitini buakonikai n te aonnaba.

Ngkana e kanakoaki te buakonikai teuana, a a bane naba ni mauna aroka ma maan ake a maeka iai.

N aaba tabeua ake a aikoa buakonikai, a kona ni manga moani bwebwerake iai buakonikai. N taai aika tibwa nako ao a mimi taan rabakau ni bwain aon te aba, n aroni waekoani manga rikirakeni buakonikai n aaba ake a koreaki iai aroka. Iangoi katoto aikai:

• E karaoaki te kakaae i aon aaba aika buakonikai ake a kaitiakaki ibukin te ununiki ao imwina a a manga kitanaki. E oti n te kakaae i aoni buakonikai aika 2,220 i aon Amerika ao Aberika Maeao, bwa a kona ni manga moan rikirake buakonikai ikanne i nanon tebwina te ririki.

• Ni kaineti ma te kakaae are boreetiaki n te maekatin ae te Science, a katautaua taani kakaae bwa tao i nanon 100 te ririki, a kona buakonikai akanne ni manga okira aroia are imwaini korean aroka ake iai.

• N taai aika tibwa nako, ao a karaoa aia ukeuke taan rabakau ni bwain te aonnaba mai Brazil, n noria bwa a kona ni waekoa n rikirake buakonikai ngkana a a manga unikaki aroka aika boou ikanne ke a aki.

• Ni kaineti ma mwin aia ukeuke taani kakaae, e ribootinaki ae kangai n te National Geographic: “A kukurei ni kaotia bwa e aki kainnanoaki manga unikan aroka.” I nanon tii nimaua te ririki, ao a onrake n aroka aika riki i bon irouia, taabo ake a tutuoaki ake a aki unikaki iai aroka.

Ni katobibia te aonnaba, ao e karaoaki te mwakuri korakora ibukini kamanoani buakonikai aika teimatoa n tiku, ao ni manga kaoki aroni buakonikai ake a uruanaki. Ibukin anne, e taekinaki n ana rongorongo Aia Botaki te Botannaomata bwa “e a riaon 50 te katebubua uarerekeni korean aroka n te buakonikai ni katobibia te aonnaba,” i nanon 25 tabun te ririki.

Ma mwakuri aikai a aki naba tau ibukini kamanoan ara buakonikai. E taekinaki ae kangai n te ribooti are boreetiaki man te botaki ae te Global Forest Watch, “Akea te bitaki ae riki ni mwaitini buakonikai aika koreaki i nanon tabeua te ririki n nako.”

A karekei aia mwane ae bati kambwana ake a korei kaai n akean ana kariaia te tautaeka, ao aei raoi bukina ngkai a a kanakoaki buakonikai.

“E karikirakei kaai nako mai aontano aika kan taraakia Iehova a ae te Atua, ao kaai aika raoiroi ibukin te amwarake.”—Karikani Bwaai 2:9.

E karaoi buakonikai ni kabane te tia Karikiriki bwa ti na kona n teimatoa ni kakabwaiaaki mai iai. E tangiria bwa e na kamanoi ao ni kateimatoai ara buakonikai ma baika maiu aika kamimi ake iai.

E kaotaki n te Baibara bwa te Atua e na katoka aroni kabonganaani kaubwain te aba n te aro ae aki riai, bwa e aonga n teimatoa ara buraneti ao baika maiu ake iai. Nora te kaongora ae “E Berita te Atua Bwa E na Teimatoa Ara Buraneti,” n iteraniba 15.