KO NORA matan am reirei n te Baibara bwa e mata ni kimwareirei ngke e a ota n te kibu are kam a tibwa tia ni warekia. Ao akea bwa e a kangai, “Ko nanonna ae e reiakinaki n te Baibara bwa ti boni kona ni maiu n aki toki n te Bwaretaiti ikai i aon te aba?” E wingare toam n te mwakuri ni minita ao e taku: “Ao tera ae ko noria n te Baibara?” E rotaki te aomata are reirei arei ao e ioioa atuna ibukini mimina ao e taku: “I a bon aki kakoauaa ae I tuai man reireinaki te baei mai mwaina!” Ko uringnga bwa e taekina naba aekakin aei tabeua te wiki n nako ngke e moan reiakinna ae aran te Atua bon Iehova.

Ko a tia n rinanon naba aei? A bati ana aomata te Atua ake a a tia. A kona bwaai tabeua ni kauringira taekan te bwaintangira ae kakawaki ae ti a tia n anganaki ae ataakin te koaua! Iangoa moa aei: E kangaa n reke te bwaintangira aei iroum? N te mwakoro aei, ao ti na rinanon te titiraki anne. Aroia ana aomata te Atua n ririkirake n ota ni kaineti ma te onimaki, bon te bwai ni kakoaua bwa bon te koaua ana Tautaeka n Uea te Atua. E a tia te Uea iai ae Iesu Kristo n taraia raoi i nanon tebubua te ririki, bwa a reireinaki ana aomata te Atua te koaua.