E maroroakin taian tangitang bon i marenaia kaain te onimaki te abotoro Bauro n aron are koreaki n 1 I-Korinto 6:1-8. E kaotia bwa e nanokawaki irouia Kristian tabeman i Korinto ake a “kona n nako matan aia kaboowi aomata aika aki  raoiroi.” (Te kibu 1) E kaotii bukina aika matoatoa Bauro bwa e aera ngkai a aki riai Kristian n tei bon i marenaia i matan aia kaboowi aomata, ma a na kanakoraoa itabararaaia n aroia n irii babaire ake i nanon te ekaretia. Ti na rinanoi ngkai tabeua bukin anganakira te reirei aei iroun te Atua, ao ti a iangoi naba waaki tabeua ake a aki irekereke raoi ma te kaetieti aei.

Ngkana iai itabararaara n ara waaki ni bitineti ma raora n te onimaki, ti na ukoukora moa karaoan ae boraoi ma kawain Iehova, ao tiaki oin nanora. (Taeka N Rabakau 14:12) N aron ae e kaotia Iesu, e raoiroi riki ngkana ti waekoa ni karekea ae riai imwain ae e na bubura te kangaanga. (Mataio 5:23-26) Ma e kananokawaki bwa iai tabeman Kristian ake e a riao itabararaaia ao a a uota tangia nakon te boowi. E taku Bauro: “Kam boni konaaki ngkai kam uotii ami tangitang i marenami nakon te boowi.” Bukin tera? Bukina ae moan te kakawaki bwa a kona ni kabuakakaa te ekaretia waaki aikai ao te Atua ae ti taromauria. Mangaia ae ti riai ni mutiakina ana titiraki Bauro ae kangai: “E aera ngkai kam aki kataua karawawataami?”—Te kibu 7.

E kamataataa naba Bauro bwa iai te babaire ae raoiroi i nanon te ekaretia ae katauraoaki iroun te Atua ibukini kaetan itabarara aika mwaiti. Unimwaanen te ekaretia boni mwaane aika Kristian aika kawanawanaaki n aia atatai ni koaua man te Baibara, ao e taku Bauro bwa a “kona ni motikitaeka i buakoia . . . [taari]” ni kaineti ma “aroni bwain te maiu aei.” (Te kibu 3-5) E kaotia Iesu bwa a riai ni kanakoraoaki itabarara aika irekereke ma buure aika kakaiaki n aron te uarao ao te babakanikawai, n aanga aika tenua aikai: te moan, a na boni kataia moa naake a itabarara ni karekea ae riai i marenaia, te kauoua, ngkana e aki nakoraoi a na kaira temanna ke uoman taani kakoaua, ao te katenua, ngkana e aki naba nakoraoi a na uota te kangaanga nakoia unimwaane ake a tei ibukin te ekaretia.—Mataio 18:15-17.

Bon tiaki rooia ke taani bitineti unimwaanen te ekaretia ao  tiaki tabeia te angareirei i aon te tua ke te waaki ni bitineti. Tiaki ngaiia taani katei tuua ni kaineti ma kaetani kangaanga i marenaia taari aika uaia ni bitineti. Ma n oneani mwin anne, a kakaaea buokaia koraki nako ake a irekereke iai ni kabongana te Baibara ao n uataboa karekean ae riai. Ngkana e a kangaanga kaetana, a kona n reitaki ma te mataniwi n te aono ae uarereke ke aia aobiti n tararua Ana Tia Kakoaua Iehova. Ma iai waaki tabeua ake a aki irekereke ma ana reirei Bauro. Baikara tabeua mai buakoni baikai?

Ni keiti tabeua, e kona ni kabaeaki te tangitang n te boowi bwa bon te bwai ae kakaraoaki ke e boni kainnanoaki ibukini karekean ae riai i aan te tua ao kateimatoaan te rau. N te katoto, tao te tangitang bon tii ngaia te waaki ae kona n angaraoi iai reken te beeba ni buuraure, baireaia naati n te tua bwa a na mena iroun antai, kabwakaan te mwane nakon te buu bwa maiuna, karekean te mwane ni kaboomwi man te mwane n tabwi ibukin te kamanomano, karekean tibwangam man te kambwana teuana ae ruuti ae ko bwaibwai naba iai, ao karekean tibwangam n te kaburebwai. Iai naba keiti tabeua ake e riai n tangitang iai te tari bwa e aonga ni kamanoa mani kabureana n ana tangitang temanna. *

Ngkana a karaoaki tangitang aikai n akea te nano ni kan itabarara, e aki ngkanne kakeaaki bongan ana reirei Bauro are kairaki koreana iroun te Atua. * Ma e ngae n anne, e riai te Kristian ni moanibwaia katabuan aran Iehova ao te rau ma te katiteuanaaki n te ekaretia. E moamoa kinaakia taan rimwini Kristo n aia tangira, ao “te tangira . . . e aki ukera oini kabwaiana.”—1 I-Korinto 13:4, 5; Ioane 13:34, 35.