Nakoia te koraki aika tangira Iehova ae te Atua ao ana Taeka ae te Baibara:

E taku Iesu: “Ane kam na ataa te koaua, ao e na kainaomataingkami te koaua.” (Ioane 8:32) Iangoa am namakin ngke ko moani kunea te koaua man te Baibara! E kakukurei ataakin ae ti boni kona n reiakina te koaua n te aonnaba ae taabangaki iai te kewe.​​​—⁠2 Timoteo 3:⁠1.

E tangiria Iehova ae te Atua bwa ti na ataa te koaua. Ao ibukina bwa ti tangiriia aomata, ti kan tuangia te koaua aei. Ma e bati riki ae kainnanoaki n te beku ibukin te Atua. Ti na kabanea ara konaa ni maiuakina ae katauaki ibukin te Kristian ibukina bwa ti karinei raoi ana boto n reirei Iehova. E kabwarabwaraa Iesu te anga ae kakawaki ae ti kona ni kaotia iai nakon te Atua bwa ti tangiria. E taku: “Ngkana kam kakairi n au tua nako ao kam na teimatoa n tangiraki irou, n aron ae I kakairi n ana tua nako te Tama ao I teimatoa n tangiraki irouna.”​​​—Ioane 15:10.

E rangi n tangira Tamana Iesu ao e karaoi bwaai nako ake e tuangnga Tamana bwa e na karaoi. Ngkana ti kakairi iroun Iesu ni maiura, e na bon tangirira Iehova ao ti na kukurei ni koaua, n aron are e taekinna Iesu ni kangai: “Ngkana kam atai baikai ao kam a kukurei ngkana kam karaoi.”​​​—Ioane 13:17.

Ara kantaninga bwa e na buokiko te boki aei ni kona ni maiuakina te koaua man te Baibara ao n riki bwa raoraon te Atua. Bon ara tataro bwa ko na rikirake i nanon tangiran te Atua ao n teimatoa “n tangiraki iai iroun te Atua . . . ni kariaa . . . te maiu are aki toki.”​​—Iuta 21.