A bati aomata aika a iangoa te ara ae Ana Tia Kakoaua Iehova bwa te Aro ae boou. E ngae n anne, e raka i aon 2,700 te ririki n nako, ao a kabwarabwaraaki naake a toro iroun te Atua ae koaua ae tii temanna bwa “taani kakoaua” ibukina. (Itaia 43:10-12, BG) Man te tai anne ni karokoa 1931, ti kinaaki n arara ae Taan Reirei n te Baibara. Ma e aera ngkai ti a ingoanaki n te ara ae Ana Tia Kakoaua Iehova?

E kaotaraeaki iai Atuara. N aron ae taekinaki n taian nira ni boki rimoa, e noraki aran te Atua ae Iehova nga ma nga te tai n te Baibara. N rairai aika bati, e a tia n oneaki mwin te ara aei n nakoa aika te Uea ke te Atua. Ma e ngae n anne, e a tia te Atua ae koaua ni kaota arana nakoni Mote ae Iehova ngke e kangai: “Bon arau aei n aki toki.” (Te Otinako 3:15, BG) Ni karaoan aei, e a kaota iai okorona ma atua nako aika kewe. Ti rangi ni kakatonga ni kaotiotan aran te Atua ae tabu.

E kaotaki iai mwiokoara. A rangi ni bati aomata ngkoa, ni moa mairoun te mwaane are raoiroi ae Abera, ake a a kakaotiota onimakinan Iehova. N tienture aika nako, a a riki naba Noa, Aberaam, Tara, Mote, Tawita ao tabeman riki bwa “taani kakoaua aika uanao.” (I-Ebera 11:4–12:1) N aron are e kona n riki temanna bwa te tia kakoaua n te boowi ibukin te aomata ae akea ana bure, ti motinnanoia naba bwa ti na kaotiota te koaua ibukin Atuara.

Ti kakairi iai iroun Iesu. E aranaki Iesu n te Baibara bwa “te tia kakoaua ae kakaonimaki ao e koaua.” (Te Kaotioti 3:14) E bon taekinna Iesu ae e a ‘tia ni kaotiota aran te Atua’ ao e teimatoa naba n ‘tataekina te koaua’ ibukin te Atua. (Ioane 17:26; 18:37) Ngaia are a riai taan rimwini Kristo ni koaua ni kabongana aran Iehova ao ni kaotiotia nakoia aomata. A kakorakoraia naba Ana Tia Kakoaua Iehova ni karaoa aei.

• E aera ngkai a ingoanaki Taan Reirei n te Baibara bwa Ana Tia Kakoaua Iehova?

• E moa man ningai kaotakia taani kakoaua ibukin Iehova i aon te aba?

• Antai te tia Kakoaua ae te kabanea ni kakannato ibukin Iehova?