REIREI 17

Te Aeka n Aomata Raa Iesu?

KAMAIUA

Ngkana ti reiakin baike e taekin ao ni karaoi Iesu n te aonnaba, ti a nori iai aroarona aika kona ni kaanira riki ma ngaia ao Tamana ae Iehova. Baikara tabeua aroarona aika anainano? Ao ti na kangaa ni kakairi iroun Iesu ni maiura?

1. N aaro raa aika titeboo iai aron Iesu ma Tamana?

Ngke e mena Iesu i karawa, e tataraa Tamana ae tatangira ao n reirei mairouna i nanoni birion ma birion te ririki. Ibukin anne, e a titeboo iai aroia n iaiango, n namakin, ao ni karaoi bwaai. (Wareka Ioane 5:19.) E kaotiotii raoi aroaron Tamana Iesu n te aro are e a kangai: “Ane e a tia n norai ao e a tia naba n nora te Tama.” (Ioane 14:9) Ngkai ko reiakina aroaron Iesu, ane ko na kinaa riki iai Iehova. N te katoto, aron Iesu n tabeakinia aomata e kaotaki raoi iai aron Iehova n tabeakiniko.

2. E kangaa Iesu ni kaotia bwa e tangira Iehova?

E taku Iesu: “I karaoa nanon te tua are e anganai te Tama, bwa a aonga n ataia kaain te aonnaba ae I tangira te Tama.” (Ioane 14:31) Ngke e mena Iesu n te aonnaba, e kaota tangiran Tamana ae korakora n arona n ongeaba irouna, e ngae naba ngkana e a kangaanga karaoana. E kani mamaroroakina naba taekan Tamana ao ni buokiia tabemwaang bwa a na karekea aia iraorao ma Tamana.—Ioane 14:23.

3. E kangaa Iesu ni kaotia bwa e tangiriia aomata?

E taekinna te Baibara bwa Iesu e “rangi n tatangiriia natiia te botannaomata.” (Taeka n Rabakau 8:31, te kabwarabwara mai nano) E kaotiota ana tangira n arona ni kaungaia ao n tatauraoi ni buokiia aomata. E karaoi kakai aika aki tii kaota mwaakana ma bon ana atataiaomata naba. (Mareko 1:40-42) E akoiia aomata ao n aki inanonano. E reke te kabebeteaki n ana taeka ao te kantaninga ae raoiroi nakoia aika a raoiroi nanoia ake a ongora irouna. E tauraoi Iesu ni maraki ao ni mate ibukin tangiraia te botannaomata. Ma e rangi n tangiriia riki aomata aika kakairi n ana reirei.—Wareka Ioane 15:13, 14.

REIAKINA AE BATI RIKI

Reiakina riki aroaron Iesu. Ao iangoia bwa ko na kangaa ni kaotiota te tangira ao te tituaraoi n aron are e karaoia.

4. E tangira Tamana Iesu

Ti reireinaki n ana katoto Iesu arora ni kaota tangiran te Atua. Wareka Ruka 6:12 ao Ioane 15:10; 17:26. Imwini warekan te kibu teuana ma teuana, maroroakina te titiraki aei:

Ti na kangaa ni kakairi iroun Iesu, ao ni kaotia bwa ti tangira Iehova?

E tangira Tamana are i karawa Iesu ao e teimatoa n taetae nakoina n te tataro

5. E tabeakin Iesu kainnanoia aomata

E tabeakin riki Iesu kainnanoia aomata nakoni kainnanona. E ngae ngke e kua, ma e boni kabongana naba ana tai ao korakorana ni buokiia aomata. Wareka Mareko 6:30-44, ao maroroakin titiraki aikai:

N te rongorongo aei, baikara aanga aika e kaota iai tabeakinaia tabemwaang Iesu?—Nora kibuna 31, 34, 41, ao 42.
Tera ae e kaira Iesu bwa e na buokiia aomata?—Nora kibuna 34.
Kioina ngkai Iesu e kaotiotii aroaron Iehova, tera ngkanne reireiam ibukin Iehova?
Baikara aanga tabeua aika ti kona iai ni kakairi n aron Iesu n tabeakinia tabemwaang?

6. E tituaraoi Iesu

E tituaraoi Iesu e ngae naba ngke a karako ana bwai, ao e boni kaungaira naba bwa ti na tituaraoi. Wareka Mwakuri 20:35, ao maroroakina te titiraki aei:

Ti na kangaa ni kukurei n aron ae e taekinna Iesu?

Kaota te TAAMNEI, ao maroroakina te titiraki aei.

TAAMNEI: “E Kakukurei Riki te Anga Nakon te Anganaki”—Mwakorona (4:00)

Baikara aanga tabeua aika ti kona n anganga iai, e ngae ngkana a karako ara bwai?

Ko ataia?

E reireinira te Baibara bwa ti na tataro nakon Iehova n aran Iesu. (Wareka Ioane 16:23, 24.) Ngkana ti tataro n te aro aei, ti kaota iai ara kakaitau n te baere e a tia ni karaoia Iesu ae buokira iai n riki bwa raoraon Iehova.

A TAKU TABEMAN: “E aki tabeakina rawawatara te Atua.”

Kioina ngkai e boni kaotiota aroaron Tamana Iesu, e kangaa n oti man ana mwakuri bwa e bon tabeakinira Iehova?

KAKIMOTOTOANA

E tangira Iehova Iesu, ao e tangiriia naba aomata. Ngkana ko a kinaa riki Iesu, ko na kinaa riki Iehova, ibukina bwa Iesu boni katotongan raoi Tamana.