N tain te rongo i Iteraera, ao e mwananga nakon te aba ae Moaba tibun Iteraera temanna ae Naomi ma buuna ao natina mwaane aika uoman. Imwin tabeua te tai, e a mate buun Naomi. A mare natina mwaane ma Ruta ao Orebwa, aika kaaini Moaba. E kananokawaki bwa imwina riki ao a a mate natin Naomi ake mwaane.

E ongo Naomi bwa e a toki te rongo i Iteraera, ao e a baireia bwa e nang okira abana. Bon raona Ruta ma Orebwa ni mwananga n oki, ma i aoni kawaia ao e taku Naomi nakoia: ‘Boni buuaine ngkami aika kam kakaraoa ae raoiroi nakoia natiu mwaane ao ngai. I tangiringkami bwa kam na manga karekeia buumi. Naako oki nako Moaba.’ A taku aine aikai nakon Naomi: ‘Ti tangiriko! Ti aki kani kitaniko.’ E teimatoa n tuangia Naomi bwa a na oki. N tokina, e a oki Orebwa, ma e tiku Ruta. E taku Naomi nakoina: ‘E a okinako Orebwa nakoia ami koraki ao nakoia atuami. Naako iria.’ Ma e taku Ruta: ‘N na aki kitaniko. A na riki am koraki bwa au koraki, ao Atuam bwa Atuau.’ N am iango, tera ana namakin Naomi ngke e taekina anne Ruta?

A roko Ruta ma Naomi i Iteraera n taini moanakin taiakin te baare. N te bong teuana ao e nako Ruta n rikoi nikiran taiani baare n ana tawaana te mwaane ae Boati, are natin Raaba. E ongo teuaei ae Ruta bon te I-Moaba ae kakaonimaki ni koaua are e tiku i rarikin Naomi. E tuangia ana tia mwakuri bwa a na katikui baare riki tabeua n te tawaana bwa e na rikoi Ruta.

 N te tairiki anne, e a titirakina Ruta Naomi ni kangai: ‘Antai ana tawaana ae ko rikoriko iai n te bong aei?’ E taku Ruta: ‘Ana tawaana Boati.’ E taku Naomi nakoina: ‘Boati bon ana koraki naba buu. Teimatoa n rikoriko n ana tawaana ma ateiaine riki tabeman, bwa ko aki kona ni bwainikirinaki iai.’

E teimatoa Ruta n rikoriko n ana tawaana Boati ni karokoa tokin te tai. E noria Boati bwa e mwakuri korakora Ruta ao bon te aine ae tamaroa. Ni boong akanne ao ngkana e mate te mwaane ao akea natina mwaane, e riai ni mare ana koraki teuare mate ma neiere buuna. Ngaia are e a mare Boati ma Ruta. E a riki natiia te mwaane ae arana Obeta, are e riki imwina bwa tibun te Uea ae Tawita. A rangi ni kukurei raoraon Naomi ao a taku: ‘Te moan, e anganiko Iehova Ruta, are e kakaraoa ae raoiroi nakoim, ao ngkai e a reke tibum. E bia neboaki Iehova.’