E berita ni kangai Iehova: ‘E nang akea riki te tang, te maraki, te aoraki, ke te mate. N na kaoi rannimataia aomata ni kabane mai mataia. E na mwaninga te aba taekani baika buakaka ni kabane ake bwain rimoa.’

E kamaekaia Atam ma Ewa Iehova ma te rau ao te kukurei n te onnaroka are i Eten. A riai n taromauria Tamaia are i karawa ao ni kaona te aonnaba irouia natiia. A aki ongeaba Atam ma Ewa iroun Iehova, ma e aki bitaki ana kantaninga. Ti noria n te boki aei bwa a bane ni koro bukin ana berita nako te Atua. E na karokoi kakabwaia nako aon te aba Ana Tautaeka n Uea n aron are e beritanna nakon Aberaam.

A na waekoa ni kamaunaaki Tatan ma ana taimonio ao aomata nako aika buakaka. A nang taromauria Iehova aomata ni kabane aika maiu. Ti na aki manga aoraki ke ni mate. Ma ti nang uti ni katoabong ma te korakora ae bati ao te kukurei ibukina bwa ti maiu.  E na riki te aonnaba bwa te bwaretaiti. A na bane aomata n reke kanaia aika kangkang ao aia auti aika mano raoi. A na akoi aomata ao a na aki iowawa ke n tiritiri. A na aki mamaakuira maan aika aki manana ao ti nang aki maakuia naba.

Ti na rangi ni kimwareirei ngkana e a kautiia aomata Iehova. Ti nang butimwaeiia aomata ake kaain rimoa n aron Abera, Noa, Aberaam, Tara, Mote, Ruta, Etita, ao Tawita. A na raonira ni karika te buraneti ae te Aonnaba bwa te bwaretaiti. E na bati n taai nako te mwakuri ae kakukurei ae ti na karaoia.

E tangiriko Iehova bwa ko na roko naba iai. Ane ko nang kinaa Iehova n aaro aika ko tuai n iaiangoia mai mwaina. Ti bia kaanira riki ma Iehova ni katoabong, ngkai ao n aki toki!