A ongeaba abotoro n ana tua Iesu are a na tataekina te rongorongo ae raoiroi ni kabutaa te aonnaba. N 47 C.E., a kanakoia Bauro ma Barenaba taari i Antioka bwa a na mwamwananga n uarongorongo. A mwananga taan uarongorongo aika ingainga aikai n tataekina te rongorongo ni kabutaa Asia Minor n taabo aika Terebe, Rutetera, ao Ikonio.

A uarongorongo Bauro ma Barenaba nakoia aomata nako aika kaubwai ma aika maiu ni kainnano, ataei ao kaara. A bati aika butimwaea te koaua ibukini Kristo. Ngke a uarongorongo naakai nakon Terekio Baurati ae te kowana i Kubero, ao e kataia ni katokiia te tia tabunea temanna. E taku Bauro nakon te tia tabunea aei: ‘E ekikonako Iehova.’ Ao e a rina naba ni mataki teuanne. Ngke e nora anne te Kowana ae Baurati ao e a riki naba bwa te tia onimaki.

A uarongorongo Bauro ma Barenaba n taabo nako, man te auti teuana ma teuana, ni mwakete, n te kawai, ao n tinakoka. A kamarurunga te mwaane ae mwauku i Rutetera ao a a iangoia naake a nora te kakai aei bwa bon atua mwaane aikai, ao a a kan taromauria. Ma a katokiia Bauro ma Barenaba ao a taku: ‘Taromauria te Atua n tii ngaia! Bon aomata ngaira n aromi.’ Imwina a a roko tabeman I-Iutaia n anai nanoia aomata aika bati bwa a na kaitaraa Bauro. Ngaia are a a karebanaa Bauro n atibu ao a katikitikia nako tinanikun te kaawa, ao ni kitanna bwa a taku bwa e a mate. Ma e boni maiu Bauro! A waekoa n roko taari ni buokia ao ni kairia n oki nakon te kaawa. Ao e a oki Bauro nako Antioka.

N 49 C.E., e a manga waakina mwanangana teuana Bauro. Imwin okina n noriia taari i Asia Minor, e a kabutaanako riki te rongorongo ae raoiroi  nako Eurobe. E nako Atenai, Ebeto, Biribi, Tetaronike, ao taabo riki tabeua. Bon raona ni mwananga Tira, Ruka, ao te rorobuaka n ataei ae Timoteo. A kaai ni mwakuri ni katei ekaretia ao ni buokiia kaaina bwa a na korakora n te onimaki. E tiku Bauro ni kakorakoraia taari i Korinto teuana ma te iterana te ririki. E uarongorongo iai, e reireinia aomata ao e korei reeta nakon ekaretia aika bati. E kakaraoi naba umwanrianna. Ao imwina e a okira Antioka.

Imwina riki n 52 C.E., e a waakina mwanangana Bauro ae te katenua ni moa mai Asia Minor. E mwananga nako meang ao e rokoroko i Biribi ao imwina e nako Korinto. E tiku Bauro i Ebeto tabeua te ririki ao e angareirei iai, e katoki aoraki ao e buokiia kaain te ekaretia. E anganga naba taiani kabwarabwara n te umwanreirei ni katoabong. A bati aomata aika ongora ao a bitii aroia. N tokina, ngke e a tia n tataekina te rongorongo ae raoiroi Bauro n aaba aika bati, e a nako Ierutarem.