E angareirei Iesu ao e katoki aorakia aomata i Iutaia ao Ierutarem. E a rinanon ngkanne te Karaanga ae Ioretan bwa e na angareirei n te kaawa teuana ma teuana n aononi Berea. Ma e na waekoa n okira Ierutarem.

Ni menan Iesu i Berea ao e a titirakinna te mwaane temanna ni kangai: “Te Uea, te koaua ae a karako aika a na kamaiuaki?” Tao e atai aia kakauntaeka mataniwin te Aro te mwaane anne i aon ae a bati aika a na kamaiuaki ke e na karako. E bita te maroro anne Iesu nakon te bae ti riai ni karaoia bwa ti aonga ni kamaiuaki. E taku: “Kakorakoraingkami n rin n te mataroa are wariki.” Eng, e kainnanoaki te korakora ae te kabokorakora. Bukin tera? E kabwarabwaraa Iesu ni kangai: “I tuangingkami bwa a bati aika a na ukoukora te kan rin, ma a aki kona.”​—Ruka 13:23, 24.

E kaikonaka riain te kakorakora Iesu ngke e kangai: “Ngkana e teirake teuare ana auti te auti ma n rokana te mataroa, ao ane kam na tei i tinanikun te mataroa ma ni karebwerebwe, ni kangai, ‘Te toka, kaukia nakoira.’ . . . Ma e na kangai nakoimi, ‘I aki kinaingkami. Naako mairou, ngkami ni kabane aika taani kakaraoa ae buakaka!’ ”​—Ruka 13:25-27.

E kaikonakaki n aei ana kangaanga te aomata ae rimwi n roko, tao n te tai are e angaraoi irouna ao e noria bwa e a in te mataroa ao n rokanaki. E riai ni moantaai n roko, e ngae naba ngkana e angabuaka irouna anne. Anne aroia aomata aika bati ake a kona ni kakabwaiaaki ni menan Iesu i rarikia n reireinia. A kabwaka ni kamanena te tai anne ni moanibwaia te taromauri ae koaua ni maiuia. ­Angia te koraki ake e roko Iesu ibukia a aki butimwaea te bwai are e katauraoia te Atua ibukini kamaiuaia. E taekinna Iesu bwa a na ‘tang ma n tenai bukini mwangaia’ ngkana a a karenakoaki nako tinaniku. Ma aomata “mai mainiku ao maeao ao meang ao maiaki,” eng man natannaomata nako, “a na tekateka n rarikiriki n te taibora n ana Tautaeka n Uea te Atua.”​—Ruka 13:28, 29.

E kabwarabwaraa Iesu ni kangai: “Iai aika a rimwi [aika tiaki I-Iutaia ao I-Iutaia aika karawawataaki] ae a na rimoa, ao iai aika a rimoa [I-Iutaia aika tauaninne n aia Aro aika kamoamoa ngkai kanoan Aberaam ngaiia] ae a na rimwi.” (Ruka 13:30) Ibukina bwa “a rimwi” nanona bwa a na aki rin naba teutana n ana Tautaeka n Uea te Atua aeka n aomata akana aki kakaitau akanne.

A a kawara ngkai Iesu tabeman Baritaio ao a tuangnga ni kangai: “Teirake ao naako mai ikai, bwa e kan tiringko Erote [ae Antibati].” Tao e boni moani kabutaa te kewe aei te Uea ae Erote bwa e aonga ni birinako Iesu man te aono aei. E a bae n rawa Erote ni manga irekereke ma maten te burabeti riki temanna, ngkai e bon tiringa naba Ioane te tia Bwabetito. Ma e tuangia Baritaio Iesu ni kangai: “Naako tuanga teuane te tia kamwane anne [ae te arobeke] ni kangai, ‘Noria! I kanakoia taimonio ao I kamarurungia aomata n te bong aei ao ningabong, ao e na tia au mwakuri n te katenua ni bong.’” (Ruka 13:31, 32) E bae n nanona Iesu aroia arobeke aika nanowanawana ngke e arana Erote bwa “te tia kamwane.” Ma e na bon aki kairaraangaki Iesu ke n ienikuriaki iroun Erote ke temanna riki. E na boni waakina mwiokoana are e anganna Tamana, ao e na karaoia ni kaineti ma ana kaetieti te Atua ma tiaki aomata.

E touaanako kawaina Iesu nako Ierutarem ibukina bwa e kangai: “E aki riai bwa e na kamateaki te burabeti i tinanikun Ierutarem.” (Ruka 13:33) Akea te taetae ni burabeti n te Baibara ae mwaneweaki iai bwa e riai ni mate te Mesia n te kaawa anne, ma e aera ngkai e taekinna Iesu bwa e na tiringaki ikanne? Ibukina bwa Ierutarem boni kautun te aba ike e mena iai te Tanirim ae te boowi ae rietata ae 71 kaaina ike a na kataaki iai naake a bukinaki bwa burabeti ni kewe. Irarikina bon anne te tabo are a kakaraoaki iai kareanakia maan. Mangaia are e ataia Iesu bwa akea riki te tabo ae e riai n tiringaki iai.

E bwaebwaeti Iesu ni kangai: “Ierutarem, Ierutarem, ae te tia kamateia burabeti ao te tia karebanaiia n atibu akana kanakoaki nakoina! Ai batira kani bobotaia natim irou, n aron te moaaine ngkana e botiia bunna i aani baina! Ma kam rawa iai. Noria! E a kitanaki te tembora aei ao e nang tiku iroumi.” (Ruka 13:34, 35) A rawa ni butimwaea Natin te Atua te natannaomata aei ao a na boni kaitaraa mwin aia mwakuri!

E a kaoaki Iesu iroun aia mataniwi Baritaio bwa e na amwarake ma ngaia n ana auti n te bongi n Taabati i mwain rokona i Ierutarem. A mamataukiroa Iesu te koraki ake a kaoaki bwa a na nora te bwai ae tao e na karaoia nakon teuae aorakina te tibu (bobotakin te ran ae moan te bati riki n te ranga ao n te wae). E titiraki Iesu nakoia Baritaio ao naake a mwaatai n te Tua ni kangai: “E kariaiakaki n te tua te katoki aoraki n te bongi n Taabati ke e aki?”​—Ruka 14:3.

Akea ae e kaeka. E kamarurunga teuaei Iesu ao e a titirakinia ngkanne ni kangai: “Antai iroumi ae ngkana e bwaka natina ke ana kao ae te mwaane n te mwanibwa, ao e na aki kaaerakea ngkekei naba n te bongi n Taabati?” (Ruka 14:5) A a manga aki naba kaekaa ana titiraki Iesu aei.