E tabe ngkai Iesu ni mwananga rinanoni Berea n nako Ierutarem. E biri nakoina te rorobuaka n ataei ae kaubwai ao e katorobubua i matana. Teuaei bon ‘te tia kairiri temanna’ ae tao te mataniwi n te tinakoka ke kaain te Tanirim. E titiraki ni kangai: “Te tia Reirei ae ko raoiroi, tera ae I riai ni karaoia bwa e aonga n reke irou te maiu are aki toki?”​—Ruka 8:41; 18:18; 24:20.

E kaeka Iesu ni kangai: “E aera ngkai ko atongai bwa I raoiroi? Akea ae raoiroi bwa tii temanna, bwa te Atua.” E bae teuaei ni kamanena te taeka ae “raoiroi” bwa te taeka ni karinerine, n aron are a kakaraoia taian rabi. E ngae ngke e raoiroi ana angareirei Iesu, ma e tangiria bwa e na ataia te mwaane aei bwa e tii taekinaki te taeka ae “Raoiroi” ibukin te Atua.

E anganna taeka n reirei Iesu ni kangai: “Ma ngkana ko kan rin n te maiu ao teimatoa ni kakairi n taian tua.” Ngaia are e a titirakinna teuaei ni kangai: “Tuua raa?” Ao e a taekin Iesu nimaua mai buakon Tuua Ake Tebwina​—ae taekan te tiriaomata, te wene ni kimoa, te iraa, te kaotioti ni kewe, ao karineaia kaaro. E a manga taekina te tua ae kakawaki riki ae kangai: “Ko riai n tangira raom n aomata n aron tangiram i bon iroum.”​—Mataio 19:17-​19.

E kaeka teuaei ni kangai: “I bane n toui mwini baikai, tera riki ae I kabwaka iai?” (Mataio 19:20) E bae n iangoia teuaei bwa akea irouna aroaro tabeua aika moan raraoi are e na kona iai ni katauaki nakon te maiu are aki toki. Kioina ngke e ataa ingaingan nanon teuaei Iesu ibukin ana bubutii, e a bon “namakina tangirana.” (Mareko 10:21) Ma bon iai te bwai ae tutuka teuaei.

E rangi n tangira te kaubwai teuaei, ngaia are e a taku Iesu nakoina: “Iai riki te bwai teuana ae ko riai ni karaoia: Naako kaboonakoi am bwai ao angania akana maiu ni kainnano mwanena, ao e na reke iai am bwai ae kakawaki i karawa, ao nakomai riiki bwa te tia rimwiu.” Eng, e kona teuaei n tibwai ana mwane nakoia akana maiu ni kainnano, ake a aki kona ni manga kabooa mwina, ao n riki bwa te tia rimwin Iesu. Ma e nanoangaia Iesu ngke e a teirake n taonnako ma te nanokawaki ae bati. Ibukin tangiran ‘ana bwai aika bati,’ e a kamatakiaki nakon te kaubwai ni koaua. (Mareko 10:21, 22) E taku Iesu: “Ai kangaangara rinia aomata aika kaumwane n ana Tautaeka n Uea te Atua!”​—Ruka 18:24.

A rangi ni mimi taan rimwina n taeka aikai ao n ana taeka naba Iesu ake imwina riki: “Ni koauana, e bebete riki iroun te kamero bwa e na rin i nanoni bwangabwangan te neiran n itutu, nakon rinin te aomata ae kaubwai n ana Tautaeka n Uea te Atua.” Ibukin anne ao a a titiraki taan rimwina ni kangai: “Antai ngkanne ae e nang kona ni kamaiuaki?” E koaua bwa e rangi ni kangaanga reken te kamaiuaki ao e aki konaaki te baei irouia aomata? E tataraiia Iesu ao e taku: “Baike a aki konai aomata, ao e konai te Atua.”​—Ruka 18:25-​27.

E katerea Betero bwa a a tia ni karaoa aia motinnano ae kaokoro ma teuare kaubwai ngke e kangai: “Noria! Ti a tia ni kaaki bwaai ni kabane ao n rimwim, tera ngkanne ae e a mena imwaira?” E a taekina mwin aia motinnano Iesu ae raoiroi aei ni kangai: “Ngkana a a kaboouaki bwaai ngkana e a tekateka Natin te aomata i aon ana kaintokanuea ae mimitong, ao ngkami aika kam irirai, kam na tekateka naba i aoni kaintokanuea aika 12, ni motiki taekaia aia baronga tibun Iteraera aika 12.”​—Mataio 19:27, 28.

E mataata bwa e iangoa Iesu te tai ae e na roko i aon te aba ike a nang kaboouaki iai aroaro n aron ake n te onnaroka are i Eten. E na anganaki kaniwangana Betero ma taan rimwin Iesu ake tabeman are a nang uaia n tautaekana te aonnaba ae Bwaretaiti ma Iesu, ae te kaniwanga ae a na bon tauraoi n anganako bwaai ni kabane iai ibukini karekeana irouia.

Ma e ngae n anne, a na aki bane n reke kaniwanga akanne n te tai ae e na roko ma a karekei naba tabeua taan rimwina ni boong aikai. E taku Iesu: “Akea ae e kitana mwengana ke buuna ke tarina ke ana karo ke natina ibukin ana Tautaeka n Uea te Atua, ae e na aki karekei baikai aika bati riki ngkai n te tai aei, ao e na karekea naba te maiu are aki toki n te waaki ae e na roko i aon te aba.”​—Ruka 18:29, 30.

Eng, n taabo ake a nako iai taan rimwin Iesu, a boni kona ni karekea aia reitaki ae kaan ma raoia n taromauri ae kaan riki ao ae kakawaki riki nakon are a karekea ma kaain aia utu. E kananokawaki bwa e taraa n ae e nang aki reke iroun te rorobuaka ae kaubwai ae te tia kairiri, te kakabwaia ao te kaniwanga ae te maiu n ana Tautaeka n Uea te Atua ae bwaini karawa.

E reitia ni kangai Iesu: “Ma a bati akana rimoa aika a na rimwi, ao akana rimwi a na rimoa.” (Mataio 19:30) Tera ae e nanonna?

E mena te rorobuaka ae kaubwai ae te tia kairiri aei i buakoia ake “a rimoa,” ae nanona i buakoia taani kairiri irouia I-Iutaia. Kioina ngkai e mwaatai teuaei n ana tua te Atua, e a kaotia iai bwa e kantaningaaki bwa e na rangi n nakoraoi ana waaki ao n rangi ni korakora. Ma e karimoai kaubwaina ma ana bwai i aoni bwaai ni kabane ni maiuna. Ni kaitaraan anne, a ataa te koaua ao te kawai nakon te maiu aomata aika mangori man ana angareirei Iesu. A “rimwi” ngkoa ma a a manga “rimoa” ngkai. A a kona ni kantaningaa tekatekaia i aoni kaintokanuea i karawa ma Iesu ao n tautaekana te aonnaba ae Bware­taiti.