Te Minita 10:1-20
10 N aroia naango aika mate aika kamwaunga ao a kaburoburoa ana bwaa te tia karao boiarara, ao ai aron naba te nanobaba ae tii teutana, bwa e uruana te wanawana ao te karineaki.+
2 Nanon te aomata ae wanawana e kairia n te kawai ae eti,* ma nanon te aomata ae nanobaba e kairia n te kawai ae kairua.*+
3 Ni kawai nako ake e nakonako iai te aomata ae nanobaba, ao bon akea wanawanana,*+ ao e kaotia nakoia aomata nako bwa bon te nanobaba ngaia.+
4 Ngkana e urarake unin te tia tautaeka temanna iroum, ao tai kitana am tabo,+ bwa te nimamannei e kabebetei buure aika kakaiaki.+
5 Iai te bwai ae karawawata ae I a tia n noria i aan taai, ae te aeka ni kairua ae kakaraoaki irouia te koraki aika iai mwaakaia:+
6 A katokaaki n nakoa aika rietata aika bati aomata aika nanobaba, ma a tiku aomata aika kaubwai* n nakoa aika rinano.
7 I a tia n noriia tooro aika toka i aoia aoti, ma a nakonako i aoni waeia natinuea mwaane n aroia tooro.+
8 E kona te aomata ae kena te mwarua ni bwaka nako nanona,+ ao e kona n tenaaki n te naeta ane e urua te oo ae te atibu.
9 E kona te aomata ae ekei taian atibu n ikoaki iai, ao e kona ane e bwenabwenai kaai n ruanikai ni baikanne.*
10 Ngkana e a kabubu te tanai ao e aki taima wina te aomata, ao ane e na kainnanoa te kakorakora ae bati. Ma kabonganaan raoi te wanawana e kona ni karekea mwina ae raoiroi.
11 Ngkana e tena te naeta imwaini kabaean nanona, ao bon akea bongan te tia kabaea te nano* ane mwaatai anne.
12 A karekea te akoaki taeka aika nako mai win te aomata ae wanawana,+ ma rian te aomata ae nanobaba e boni karekea kamaunaana.+
13 Taeka aika moan otinako mai wina a kaota te nanobaba,+ ao ana kabanea n taeka a kaota te rangirang ae kakaiaki.
14 Ma e teimatoa n taetae te aomata ae nanobaba.+
E aki ataia te aomata bwa tera ae e na riki. Antai ae kona n tuangnga bwa tera ae e na riki imwina ngkana ai akea ngaia?+
15 E rangi ni kua te aomata ae nanobaba n ana mwakuri korakora, bwa e aki naba kona ni kunea kawaina nakon te kaawa.
16 Ai kananoangara te aba ae te uea te mwaane iai bon te teei,+ ao natinuea mwaane a a moana naba aia baka n amwarake n te ingabong!
17 Ai kukureira te aba ae te uea iai bon natiia bwaanuea ae te mwaane, ao natinuea mwaane a amwamwarake n te tai ae riai ibukini korakoraia, ao tiaki ibukina bwa a kani koro ni manging!+
18 A a bwaka tatangan te taubuki ibukin te taningaroti ae riao, ao e a raran te auti ibukini baai aika aki mwamwakuri.+
19 E karaoaki te kariki* ibukin te ngarengare, ao te wain e karekea te kimwareirei n te maiu,+ ma e katoki kainnano ni kabane te mwane.+
20 Tai taetae naba ni kamaraiaa* te uea n am iango,*+ ao tai taetae ni kamaraiaia akana kaubwai i nanon am ruu ni matu, bwa ane e na kaota te baere ko taekinna* te mannikiba,* ke a na manga taekin am taeka baika iai baia ni kiba.
Taiani Kabwarabwara Mai Nano
^ Ebera, “e mena i baina ae te atai.”
^ Ebera, “e mena i baina ae te maing.”
^ Ebera, “e aki tau nanona.”
^ Ke, “konabwai.”
^ Ke tao, “e riai n taratara raoi ma baikanne.”
^ Ebera, “te tia taua taekan te newe.”
^ Ke, “te amwarake.”
^ Ke, “taetae ni karekea kain.”
^ Ke tao, “i aoni nnem ni wene.”
^ Ke, “te rongorongo.”
^ Ebera, “manin karawa aika kibakiba.”
