Taeka N Rabakau 19:1-29
19 E raoiroi riki te maiu ni kainnano ao te nakonako n te aro ae eti,+Nakon te riki n nanobaba ao te taekini keewe.+
2 E aki raoiroi te aomata* ae akea ana atatai,+Ao e bure ane e aki tarabwai ni mwakuri.*
3 Bon nanobaban te aomata ae e bwaoua iai kawaina,Ao e a maraki nanona iroun Iehova.
4 A bati raoraoia aomata aika kaubwai,Ma e na kitanaki te aomata ae maiu ni kainnano iroun naba raoraona.+
5 Tiaki n ae e na aki katuuaaeaki te tia kakoaua ni kewe,+Ao e na aki reke birinakon ane e tataekini keewe.+
6 A bati akana ukera ana akoi te bwaanuea,*Ao a bane aomata n raoraona te aomata ae anganga taiani bwaintangira.
7 A bane tarin te aomata ae maiu ni kainnano n ribaia,+Ao ai batira riki ngkanne rarawaia raoraona nakoina!+
E ukoukoriia bwa e na bubutiia, ma akea ae e kaeka.
8 E tangiria i bon irouna ane e karekea ataakin ae riai.*+
Ane e kawakina te ataibwai ao e na nakoraoi* arona.+
9 Tiaki n ae e na aki katuuaaeaki te tia kakoaua ni kewe,Ao e na mate ane e tataekini keewe.+
10 E aki tau bwa e na maiu ni kaubwai ane e nanobaba,Ao ai batira riki aki taun te toro n taui aroia natinuea aika mwaane!+
11 Ana ataibwai te aomata e boni kakerikaaka unna,+Ao bon tamaroana tarariaoan* te bwai ae kaun.*+
12 Unin te uea kaanga ai aroni bekoraran te raian,+Ma akoan te aba irouna kaanga ai aron te aoi i aon taian aroka.
13 E karawawataa tamana te nati ae nanobaba,+Ao te buu te aine ae kakauntaeka* kaanga ai aron te taubuki ae aki kona n toki raranna.+
14 Te auti ma te kaubwai bon taian tibwanga mairouia taama,Ma te buu te aine ae wanawana boni mairoun Iehova.+
15 E karika te matunako te taningaroti,Ao e na baki te aomata* ae aau.+
16 Ane e kawakina te tua ao e kawakina maiuna,*+Ma e na mate ane e aki tarabwai n arona nako.+
17 Ane e akoiia akana kainnano ao e kataaraua Iehova,+Ao E na angan te aomata anne booni mwin* te bwai ae e karaoia.+
18 Reireina natim ni kaetia ngkai iai te kantaninga ibukina,+Ao ko na aki bukintaeka ni matena.+
19 E na kabwakaa te tuuaa te aomata ae kakaiun,Ao ngkana ko kataia ni kamaiua ao ane ko na okioki ni karaoa anne.+
20 Kakauongo n te reirei ni kairiri ao butimwaea te reirei ni kaetieti,+Bwa ko aonga ni wanawana n am bong aika a na roko.+
21 A bati ana babaire te aomata i nanona,Ma e na tokanikai ana reirei ni kairiri* Iehova.+
22 Te bwai ae tangiraki ae mena iroun te aomata bon ana tangira ae koaua,*+Ao e raoiroi riki te maiu ni kainnano nakon te riki bwa te tia kewe.
23 E kairiri nakon te maiu maakakin Iehova,+Ao ane e maakua e na motika rawana ma te kukurei n akea te kabuanibwai.+
24 E karina baina te aomata ae taningaroti nako kabin te boora n amwarake,Ma e aki kani kaokia nakoni wina.+
25 Orea te tia bwainingare+ bwa e aonga n ataibwai ane e roo nanona,+Ao boaa ane e ataibwai bwa e aonga ni karikirakea ana atatai.+
26 Ane e bwainikirina tamana ma ni kakionakoa tinana,Ao bon te nati ae kamaamaea ma ni kabwainranga te aba.+
27 Natiu, ngkana ko katoka ongoraean te reirei ni kaetieti,Ao ane ko na tiotionako iai man taeka aika kaota te atatai.
28 Te tia kakoaua ae akea manenana e kakanikoa te kaetitaeka ae riai,+Ao win ane e buakaka e ienikuri n onga te buakaka.+
29 E kawakinaki te motikitaeka ibukia taani bwainingare,+Ao te oro ibukin nukaia akana nanobaba.+
Taiani Kabwarabwara Mai Nano
^ Ebera, ne’phesh, nora Nanon Taeka.
^ Ebera, “a ienikuri waena.”
^ Ke, “te aomata ae tituaraoi.”
^ Ebera, “raoiroi.”
^ Ebera, “karekea nanona.”
^ Ebera, “riaoan.”
^ Ke, “te bure.”
^ Ke, “mwamwangaingai.”
^ Ebera, ne’phesh, nora Nanon Taeka.
^ Ebera, ne’phesh, nora Nanon Taeka.
^ Ke, “kaniwangana n.”
^ Ke, “ana kantaninga.”
^ Ke, “tangira ae kona n onimakinaki.”
