Ruta 3:1-18
3 E a taku ngkai nakon neiei Naomi are tinani buuna: “Natiu, tiaki I riai ni kakaaea mwengam,*+ bwa a aonga n nakoraoi bwaai ni kabane ibukim?
2 Tiaki bon ara koraki Boati?+ Bon ana ateiaine ake ko iririia. N te tairiki aei ao e nang kaaki kunin baare n te tabo ni kaaki kun.
3 Mangaia ae tebotebo ao kabiriko teutana n te bwaa ae boiarara, ao karin am kunnikai* ao naako nakon te tabo ni kaaki kun. Tai kaokaota rokom nakon teuarei ni karokoa ae e tia n amwarake ao ni moi.
4 Ngkana e wene, ao tarataraa te tabo are e wene iai, ao naako ieta rabunani waena ao ko a wene naba. E na bon tuangko te bwai ae ko riai ni karaoia.”
5 Ao e kaeka ni kangai neiei: “N na karaoi bwaai ni kabane akana ko tuangai.”
6 Mangaia are e ruo rikaaki nakon te tabo ni kaaki kun, ao e karaoi bwaai ni kabane ake e tuangnga tinani buuna bwa e na karaoi.
7 E a amwarake ma ni moi n te tai anne Boati ao e kukurei nanona. Rimwi e a nako ni wene i tabon taiani bwariko ni baare. Imwin anne, e a waerikiriki neiei n roko ao e ieta rabunani waena ao e a wene naba.
8 Ngke e a nukanibong ao e a rurubenebene teuarei, mangaia are e a tekateka, ao akea bwa e a nora te aine ni wene i rarikini waena.
9 E taku teuarei: “Antai ngkoe?” E kaeka ni kangai neierei: “Bon Ruta ngai ae am toro. Taakina am kunnikai* n rabuna am toro, bwa boni ngkoe ara koraki ni kaan.”*+
10 Ao e taku teuarei: “Natiu, e bia kakabwaiako Iehova. Ko a tia ni kaota am tangira ae koaua* n te tai aei bwa e korakora riki nakon are rimoa,+ n arom n aki nako n rimwia rorobuaka n ataei aika maiu ni kainnano ke aika kaubwai.
11 Ao ngkai natiu ko na tai maaku. N na karaoi bwaai ni kabane akana ko taekin,+ bwa a bane aomata n te kaawa* n ataia ae te aine ngkoe ae moan te raoiroi.
12 Ma e ngae ngke e koaua ae ngai ami koraki ni kaan,*+ ma iai ae te koraki ni kaan riki nakoiu.+
13 Ko na tiku ikai n te tairiki aei, ao ngkana e na manga kabooko ningabong teuarei, ao e raoiroi! Ke e manga kabooko.+ Ma ngkana e aki kani manga kabooko, ao ngkai bon iai Iehova ao N na boni manga kabooko ngai. Weene ikai ni karokoa ae ingabong.”
14 Mangaia are e wene neierei i rarikini waen teuarei ni karokoa ae ingabong ao e teirake ngke e bon roo naba ae akea iai ae e noria. Ao e taku teuarei: “Tai kariaia bwa e na ataaki ae iai te aine ae roko n te tabo ni kaaki kun.”
15 E taku naba: “Uotaamai te ninira ane i aom ao taakinna.” Mangaia are e taakinna neierei, ao teuarei e kaaki onoua te baire* ni baare i nanona, ao e katokaa i aon neierei, ao rimwi e nako teuarei nakon te kaawa.
16 Ao e nako neierei nakon tinani buuna, are e a taku ngkai: “E uara* natiu?” Ao neierei e tuangnga bwaai ni kabane ake e karaoi teuarei ibukina.
17 E taku riki neierei: “E anganai onoua te baire ni baare ao e taku nakoiu: ‘Tai okira tinani buum n akea uotam.’”
18 Ao e taku neierei: “Tekateka ikai natiu, ni karokoa ae ko ataia bwa tera mwin te baerei, bwa ane e na aki rau teuarei ni karokoa katiaan te baerei irouna n te bong aei.”
Taiani Kabwarabwara Mai Nano
^ Ebera, “te tabo ni motirawa.”
^ Ke, “karin am kauaatao.”
^ Ke, “rabin am kunnikai.”
^ Ebera, “te tia manga kabooira.”
^ Ke, “tangira ae kona n onimakinaki.”
^ Ebera, “mataroan nako aia oo au aomata.”
^ Ebera, “te tia manga kabooingkami.”
^ Ebera, “Antai ngkoe?”
