Mwakuri 26:1-32
26 E taku Akeriba+ nakoni Bauro: “Ko a kona ngkanne n taetae i bon ibukim.” E arora baina Bauro ao e kaekaa bukinana ni kangai:
2 “Te Uea ae Akeriba, I rangi ni kukurei ngkai I a tei i matam n te bong aei ni kaekai bukinau ni kabane mairouia I-Iutaia,+
3 ai moarara riki ibukina ngkai ko mwaatai ni katei ni kabane ma kauntaeka ake a riiriki i buakoia I-Iutaia. Mangaia ae I bubutiiko bwa ko na keiaki n ongora irou.
4 “Ni koauana, a bane I-Iutaia n ataa aroni maiuu mangke te roro n rikirake ngai, ngke I kaikawaaki i buakoia au aomata* ao imwina i Ierutarem,+
5 ao a a kamani kinaai ma ni kona ni kakoauaa bwa I a tia ni maiuakina te aroaro ni Baritaio*+ ma ni karaoa ae boraoi ma taian reirei n ara Aro+ aika rangi ni mamatoa.
6 Ma I a kateaki ngkai bwa e na motikaki taekau, ibukina bwa I kantaningaa kakoroani bukin ana berita te Atua are beritanna nakoia ara bakatibu,+
7 ao a kantaningaa naba norani kakoroani bukin te berita aei ara baronga ake 12, n aroia ni kakorakoraia ni beku ibukin te Atua ni ngaina ao ni bong. Te Uea, I a bukinaki irouia I-Iutaia+ ni kaineti ma te kantaninga aei.
8 “E aera ngkai kam iangoia* bwa e aki kona ni kakoauaaki ae e kautiia maate te Atua?
9 Ngai naba ngkekei I kakoauaa raoi bwa I riai ni karaoi mwakuri aika bati ni kaitaraa Iesu are te I-Natareta.
10 Bon aei te bwai ae I karaoia i Ierutarem, ao I kamatawarikiia+ te koraki aika itiaki* aika bati, bwa I anganaki te mwaaka mairouia mataniwi n ibonga,*+ ao ngke a nang kamateaki, ao I kaota naba nanou ni kariaia.
11 A mwaiti au tai ni katuuaaeia i nanon tinakoka* ni kabane ngke I kataia ni kairoroiia bwa a na kaaki aia onimaki, ao kioina ngkai e kororake marakin nanou irouia, I rokoroko naba ni kaawa ake tabeua ni bwainikirinia ake a mena iai.
12 “Ngke I tabe ni kakaraoa aei, ao I mwananga naba nako Tamateko bwa I anganaki te mwaaka ma te mwioko mairouia mataniwi n ibonga.
13 Te Uea, i aoni kawaiu ngke e a tawanou, ao I nora te oota mai karawa ae raneanea riki nakon taai, ae otabwaniniai ma naake raou ni mwananga.+
14 Ao ngke ti a bane ni bwaka i aontano, ao I ongo te bwanaa ae kangai nakoiu n te taetae n Ebera: ‘Tauro, Tauro, e aera ngkai ko bwainikirinai? E karuanikai nakoim ngkai ko rawa ni kairaki n te kai* ae kakang tabona.’
15 Ma I taku: ‘Te Uea, antai ngkoe?’ Ao e taku te Uea: ‘Bon Iesu ngai ae ko bwainikirinai.
16 Ma ko na teirake i aoni waem, bwa I a kaotai ngkai nakoim bwa N na rineiko bwa te toro ao te tia kakoaua ibukini baika ko nori ma baike N na kaotii nakoim rimwi ni kaineti ma ngai.+
17 Ao N na kamaiuko mairouia aomata aikai ao mairouia natannaomata aika tiaki I-Iutaia ake N na kanakoko nakoia+
18 bwa ko na kaurei mataia,+ ko na kairiia man te rotongitong+ nakon te oota,+ ao man tautaekanakia iroun Tatan+ nakon te Atua, bwa a aonga ni karekea kabwaraan aia bure+ ao tibwangaia i buakoia ake a katabuaki* n onimakinau irouia.’
19 “Ma te Uea ae Akeriba, I ongeaba n te miitara mai karawa are I noria,
20 ao I uarongorongo moa nakoia te koraki ake i Tamateko+ ao imwina ake i Ierutarem,+ ao ni kabutaa te aba ae Iutaia, ao nakoia naba natannaomata aika tiaki I-Iutaia, bwa a riai n rairi nanoia ma n rairaki nakon te Atua, ni karaoani mwakuri aika boraoi ma te rairannano.+
21 Bon anne bukina are a tauai iai I-Iutaia n te tembora, ao a kataia ni kamateai.+
22 Ma ibukina bwa I karekea te ibuobuoki mairoun te Atua, I teimatoa n uarongorongo ni karokoa te bong aei nakoia akana mangori ma akana kakannato, n akea riki te bwai ae I taekinna ma tii baike a taekinaki irouia Burabeti ao Mote bwa a na kakororaoaki bukia+—
23 ae taekan are e na maraki te Kristo,+ ao boni ngaia are e na moani kautaki mai buakoia maate,+ ae e na kaotiota te oota nakoia I-Iutaia ma natannaomata.”+
24 Ngke e kume Bauro ni kaekaa bukinana, ao e taetae Beteto ni kabaibati ni kangai: “Bauro, ko a baba! E a kababako te baene korakoran am ataibwai anne!”
25 Ma e taku Bauro: “Beteto ae Ko Karineaki, I aki baba, ma I taekini baika koaua ao I taetae n te aro ae riai.
26 Ni koauana, e atai raoi baika I taekin te uea are I taetae nakoina n aki maaku, ao I kakoauaa raoi bwa akea te bwai teuana mai buakoni baikai ae e aki ataia, bwa e aki karaoaki te baei n te aro ae raba.+
27 Te Uea ae Akeriba, ko kakoauaia Burabeti? I ataia bwa ko kakoauaia.”
28 Ma e taku Akeriba nakoni Bauro: “Taraan ae ko kan anaa nanou n te tai ae kimototo, bwa N na riki bwa te Kristian.”
29 E taku ngkanne Bauro: “Au tataro nakon te Atua bwa ngkana e kimototo te tai ke e abwabwaki, ma ko bia riki n ai arou ngkoe ma aomata ni kabane aika ongora irou n te bong aei, ma tii okorou taurekereke aikai.”
30 Ao e teirake te uea ma te kowana ao Nei Berenike ao mwaane ake a tekateka ma ngaiia.
31 Ma ngke a nako, ao a taetae i marenaia ni kangai: “Akea te bwai ae e karaoia teuaei ae riai matena iai ke kamatawarikana.”+
32 Ao e taku Akeriba nakoni Beteto: “Ngke arona bwa e aki bubutii teuaei kateana i matani Kaitara,*+ ao e na kona ni kainaomataaki.”
Taiani Kabwarabwara Mai Nano
^ Ke, “natannaomata.”
^ Nora Nanon Taeka.
^ Ebera, “motikia.”
^ Nora Nanon Taeka, “Mataniwi n ibonga.”
^ Ke, “tabu.”
^ Nora Nanon Taeka.
^ Te kai ae kakangiaki tabona ae kabonganaaki ibukini kairan te man.
^ Ke, “kaokoroaki ibukin te Atua.”
^ Nora Nanon Taeka.
