Itaia 2:1-22
2 Aio te bwai ae e noria Itaia are natin Amoti ni kaineti ma Iuta ao Ierutarem:+
2 Ni kabaneani boong*Ao e na kateaki ni kamatoaaki i aon taubukini maunga,Maungan ana auti Iehova+Ao e na karietataaki i etan taian tabuki,Ao a na raanga natannaomata ni kabane nako iai.+
3 Ao a na mwananga botannaomata aika bati ao a na kangai:
“Nakomai bwa ti na ararake nakon ana maunga Iehova,Nakon ana auti Atuan Iakoba.+
E na reireinira taekani kawaina nako,Ao ti na nakonako ni kawaina nako.”+
Bwa e na otinako te tua* mai TionAo ana taeka Iehova mai Ierutarem.+
4 E na momotikitaeka i buakoia natannaomata,Ao ni kaetii bwaai ni kaineti ma botannaomata aika bati.
Ane a na ororei aia kabaang ni bitii bwa bwaai ni kamarautano,Ao aia kainiwai naba ni bitii bwa bwaai ni koromwaanga.+
Ane e na aki manga tabeka te kabaang te natannaomata teuana n ekaanako te natannaomata teuana,Ao a na aki naba manga reireinia te buaka.+
5 Ngkami aika tibun Iakoba,Nakomai bwa ti na nakonako n ana oota Iehova.+
6 Bwa ko a tia ni kitania am aomata aika tibun Iakoba,+Ibukina bwa e a onrake te aba ni bwaai mai Mainiku.
A tatabunea+ n aroia I-Biritia,Ao a a rangi ni bati natiia ianena i rarikia.
7 E onrake abaia n te tirewa ma te koora,Ao akea tiani mwaitin aia bwai aika kakawaki.
E onrake abaia n taian aoti,Ao akea tiani mwaitin aia kaa ni buaka.+
8 E onrake abaia n atua aika akea manenaia.+
A bobaraaki nakon aia mwakuri baia,Nakoni baika karaoaki n tabonibaia.
9 Mangaia are e bobaraaki te aomata, ao e a kamangoraki iai,Ao ko aki kona ni kabwarai aia bure.
10 Riin i nanon te bwaa ao karabako i buakon te tano,Ibukin aron Iehova ae kakamaakuAo rianakoni mimitongina.+
11 E na karinanoaki matan te aomata ae kainikatonga,Ao a na bobaraaki* nanorietaia aomata.
E na karietataaki Iehova n tii ngaia n te bong anne.
12 Bwa bon ana bong Iehova ae Atuaia taanga ni buaka.*+
E na roko i aoia aomata nako aika kainikatonga ma n nanorieta,I aoia aomata nako ake a karietataaki ke a mangori,+
13 I aoni kaai aika tiira ni kabane ake i Rebanon ake a rangi n rietata ma ni karietataaki,Ao i aon aroka aika oke ni kabane ake i Batian,
14 I aoni maunga ni kabane aika rangi n rietataAo i aon tabuki ni kabane aika rietata,
15 I aon taua ni kabane aika rietata ma taian oo ni kabane aika nonoaki,
16 I aoni kaibuken Taretiti+ ni kabaneAo i aoni booti aika tamaroa ni kabane.
17 E na karinanoaki kainikatongan te aomata,Ao a na bobaraaki* nanorietaia aomata.
E na karietataaki Iehova n tii ngaia n te bong anne.
18 A na boni maunanako raoi atua aika akea manenaia.+
19 Ao a na rin aomata i nanon taian nangananga ni bwaa,Ao i nanon taiani bwangabwanga ake i aontano+Ibukin aron Iehova ae kakamaakuAo rianakoni mimitongina,+Ngkana e a teirake ni kakamaakuia kaain te aonnaba n te aro ae korakora.
20 N te bong anne ao aomata a na anai atuaia aika akea manenaia aika karaoaki man te tirewa ao te koora,Ake a karaoi i bon ibukia bwa a na bobaraaki nakoia,Ao a na karenakoi nakoia kimoa* aika uarereke ao nakoia taiani baate,*+
21 Bwa a aonga n rin i nanoni bwangabwanga ake n taiani bwaaAo i nanon tabwenani bwaa aika rietata,Ibukin aron Iehova ae kakamaakuAo rianakoni mimitongina,Ngkana e a teirake ni kakamaakuia kaain te aonnaba n te aro ae korakora.
22 Ibukini kabwaiami, kam na katoka onimakinan te aomataAe bon tii te ikeike ae mena i nanoni bwangabwangani bwairina.*
Tera te kabwaia ae e na reke mairouna?
Taiani Kabwarabwara Mai Nano
^ Ke, “Ni boong aika kaitira.” Nora Nanon Taeka.
^ Ke, “kaetieti.”
^ Ke, “a na kananorinanoaki.”
^ Ke, “Tabaota.” Nora Nanon Taeka.
^ Ke, “a na kananorinanoaki.”
^ Kimoa aika rangi n riao amwarakeia.
^ Nora Nanon Taeka.
^ Ke, “Ae e mena ikeikena i nanoni bwangabwangani bwairina.”
