Ieremia 35:1-19
-
Aia ongeaba ae rianako tibun Rekaba (1-19)
35 Te taeka ae roko iroun Ieremia mairoun Iehova n ana bong Ieoiakim+ are natin Iotia, are uean Iuta, ae kangai:
2 “Naako nakon aia auti tibun Rekaba+ ao taetae ma ngaiia ao kairiia nako nanon ana auti Iehova, nako nanon teuana mai buakon taabo n amwarake,* ao angania te wain bwa a na nimma.”
3 Mangaia are I kaira Iaatania are natin Ieremia are natin Abatinia, ma tarina nako, natina mwaane ni kabane, ao tibun Rekaba ni kabane
4 nako nanon ana auti Iehova. I kairiia nako nanon aia tabo n amwarake tibun Aanan are natin Ieketaria, ae ana aomata te Atua ae koaua, ae e mena i rarikin aia tabo n amwarake tooka, ae e mena i etan ana tabo n amwarake Maateia are natin Tiarum are te tia teiakina te mataroa.
5 Ao I kaaki mwangko ma mwangko ni wain aika on n te wain i mataia mwaane ake tibun Rekaba, ao I taku nakoia: “Moi n te wain.”
6 Ma a taku: “Ti na aki moi n te wain ibukina bwa e anganira te tua ae kangai Ieonataba*+ are natin Rekaba, are ara bakatibu, ‘Kam aki riai ni moi n te wain n aki toki ao a aki riai naba ni moi natimi.
7 Ao kam aki riai ni katea te auti, n uniki koraa, ke n ununiki ke ni karekea ami nne ni kureebe. Ma kam riai ni maeka n taian umwanrianna n taai nako, bwa e aonga n abwabwaki maiumi n te aba ike kam maeka bwa iruwa iai.’
8 Mangaia ae ti teimatoa n ongo ni bwanaan Ieonataba are natin Rekaba are ara bakatibu, ni bwaai ni kabane ake e tua nakoira, n arora n aki moi n te wain naba teuana, ngaira ma buura ao natira mwaane ma natira aine.
9 Ao ti aki katei auti ao ni maeka iai, ao akea naba ara nne ni kureebe ke ara tawaana ke ara koraa.
10 Ti teimatoa ni maeka n taian umwanrianna ao ti ongeaba ni bwaai ni kabane ake e tua nakoira Ieonataba* are ara bakatibu.
11 Ma ngke e roko Nebukaneta* are Ueani Baburon n ekaanako te aba aei,+ ao ti taku, ‘Nakomai bwa ti na nako Ierutarem ni birinako mairouia aia taanga ni buaka I-Kareria ma I-Turia,’ ao ngkai ti a maeka i Ierutarem.”
12 Ao e roko ana taeka Iehova iroun Ieremia, ae kangai:
13 “E kangai ana taeka Iehova ae Atuaia taanga ni buaka,* ae Atuan Iteraera, ‘Naako ao kangai nakoia mwaane aika tibun Iuta ao nakoia kaain Ierutarem: “Tiaki kam teimatoa ni kaumakaki ngkoa bwa kam na ongeaba n au taeka?”+ bon ana taeka Iehova.
14 “E tua Ieonataba are natin Rekaba nakoia kanoana bwa a na aki moi wain, ao a kakororaoi ana taeka n aroia n aki moi iai ni karokoa te bong aei, mangaia ae a ongeaba n ana tua aia bakatibu.+ Ma I okioki n taetae* nakoimi ma kam aki ongeaba irou.+
15 Ao I teimatoa ni kanakoia ni kabane au toro ake burabeti nakoimi, I okioki ni kanakoia*+ bwa a na kangai, ‘Rairaki taiaoka, ngkami n tatabemaningkami nako mani kawaimi aika bubuaka+ ao karaoa ae raoiroi! Tai kakairi irouia atua riki tabeman ma n toro irouia. Ao kam na teimatoa ni maeka n te aba are I anganingkami ma ami bakatibu.’+ Ma kam aki katanimai taningami ke n ongo irou.
16 A kakororaoa te tua kanoan Ieonataba are natin Rekaba are a anganaki iroun aia bakatibu,+ ma a rawa n ongo irou aomata aikai.”’”
17 “Mangaia are e kangai ana taeka Iehova ae Atuaia taanga ni buaka, ae Atuan Iteraera: ‘Noria ae I a karokoa te kabuanibwai ni kabane i aoia kaain Iuta ao i aoia kaain Ierutarem ni kabane, are I anga te kauring ngkoa iai nakoia,+ bwa I a tia n taetae nakoia ma a aki ongo, ao I teimatoa ni weteiia ma a aki kaeka.’”+
18 Ao e taku Ieremia nakoia aia utu tibun Rekaba: “E kangai ana taeka Iehova ae Atuaia taanga ni buaka, ae Atuan Iteraera, ‘Ibukina bwa kam ongeaba n ana tua ami bakatibu are Ieonataba, ao kam teimatoa ni kawakin ana tua ni kabane, ma ni karaoa raoi te baere e tua nakoimi,
19 ao e kangai ana taeka Iehova ae Atuaia taanga ni buaka, ae Atuan Iteraera, “E na teimatoa n iai kanoan Ieonataba* are natin Rekaba ae e na bebeku i matau.”’”
Taiani Kabwarabwara Mai Nano
^ Ke, “taian ruu.”
^ Ebera, “Ionataba,” kauarerekean Ieonataba.
^ Ebera, “Ionataba,” kauarerekean Ieonataba.
^ Ebera, “Nebukareta,” aroni koreana teuana.
^ Ke, “Tabaota.” Nora Nanon Taeka.
^ Ebera, “utimwaaka n taetae.”
^ Ebera, “utimwaaka ni kanakoia.”
^ Ebera, “Ionataba,” kauarerekean Ieonataba.
