I-Karatia 2:1-21
2 Imwin 14 te ririki ao I a manga nako Ierutarem ma Barenaba+ ao I kaira naba Tito.+
2 I nako ikekei ibukin te kaotioti mai karawa, ao I kaota taekan te rongorongo ae raoiroi are I tataekinna i buakoia natannaomata aika tiaki I-Iutaia. I kaotia nakoia taari ake a karineaki n tii ngaiia, bwa I aonga ni kakoauaa ae e aki matebuaka te mwakuri ni minita* ae I tabe ni karaoia ao ae I a tia ni karaoia.
3 Ma e ngae n anne, e aki naba kairoroaki Tito+ are raou ni mwananga bwa e na korotobibiaki,+ e ngae ngke bon te I-Kuriiti ngaia.
4 Ma e ueke taekan anne ibukina bwa iai taari ni kewe ake a rin n te ekaretia n te aro ae aki ataaki,+ ake a karaba n rin bwa a na mamataukiroa inaomatara+ ae ti karekea, kioina ngkai taan rimwini Kristo Iesu ngaira, bwa a aonga n tautoronira.+
5 Ti bon aki irii nanoia n aantaeka nakoia,+ eng, ti bon aki naba i nanon teutana te tai,* bwa e aonga n teimatoa iroumi te koaua ae reke man te rongorongo ae raoiroi.
6 Ma ibukia te koraki ake a taraa ni kakannato+—n aki ongeia bwa tera aroia ngkekei, ma bon akea te kaokoro irou, bwa e aki tabe te Atua ma taraan tinanikun te aomata—irou ngai, aomata akana karineaki akanne, a aki taekina te bwai ae raka.
7 Ma ni kaitaraan anne, ngke a noria bwa I mwiokoaki n te rongorongo ae raoiroi ibukia te koraki ake a aki korotobibiaki,+ n aroni Betero ni mwiokoaki ibukia ake a korotobibiaki—
8 bwa teuare kakorakoraa Betero ibukin te nakoa n abotoro nakoia ake a korotobibiaki, e kakorakoraai naba ibukia natannaomata ake tiaki I-Iutaia+—
9 ao ngke a a ataia Iakobo+ ao Keba* ao Ioane ae I anganaki te akoi ae rianako,+ ake naake a ataaki bwa bouan te ekaretia, ao a kaotia nakoiu+ ma Barenaba bwa a boraoi naba n iango n ae ti riai n nako nakoia natannaomata aika tiaki I-Iutaia, ngke a anganira baia ae te atai bwa ti na iobai ma ngaiia, ma a na nako ngaiia nakoia te koraki ake a korotobibiaki.
10 Ma a tii tuangira bwa ti na iaiangoia taari ake a maiu ni kainnano, ao bon aei ae e ingainga nanou bwa N na kakorakoraai naba ni karaoia.+
11 Ma ngke e roko Keba*+ i Antioka,+ ao I waimataia ni kaota aki kukureiu irouna, kioina ngkai e bure arona.*
12 Bwa imwain rokoia aomata ake mairoun Iakobo,+ ao e amwamwarake ma aomata ake tiaki I-Iutaia,+ ma ngke a a roko, ao e a katoka karaoan aei ao ni kaokoroa, bwa e maakuia te koraki ake a korotobibiaki.+
13 A iraraang naba irouna I-Iutaia ake nikiraia n arona te aro ni mwamwanaa te aba aei, n te aro are e a rekenako naba Barenaba irouia n aia mwamwanaa te aba.
14 Ma ngke I noria bwa a aikoa nakonako ni kaineti ma koauan te rongorongo ae raoiroi,+ ao I taku nakoni Keba* i mataia ni kabane: “Ngkana te I-Iutaia ngkoe ae ko maiu n aroia aomata ake tiaki I-Iutaia, ao ko aki maiu n aroia I-Iutaia, ao ko aera ngkai ko tangiriia aomata aika tiaki I-Iutaia bwa a na maiuakina ae a kakaraoia I-Iutaia?”+
15 Ngaira aika ti bungiaki bwa I-Iutaia, ao tiaki taani bure mai buakoia natannaomata ake tiaki I-Iutaia,
16 ti ataia bwa e aki atongaki te aomata bwa e raoiroi ni karaoan are taekinaki n te tua, ma tii rinanon onimakinan+ Iesu Kristo.+ Ngaia are ti onimakina Kristo Iesu bwa ti aonga n atongaki bwa ti raoiroi n onimakinani Kristo, ao tiaki ni karaoan ae taekinaki n te tua, bwa bon akea te aomata* ae e na atongaki bwa e raoiroi ngkana e karaoa are taekinaki n te tua.+
17 Ao ngkana ti kuneaki naba bwa taani bure ngkai ti ukoukora atongakira bwa ti raoiroi rinanoni Kristo, nanona ngkanne bwa e kaungaira Kristo nakon te bure? Tiaki ngaia anne!
18 Ngkana I a manga katei baike I a tia ni kabwakai ngkoa, I kaotai iai bwa te tia riaon te tua ngai.
19 Bwa I mate ni kaineti ma te tua rinanon te tua,+ bwa I aonga ni maiu ni kaineti ma te Atua.
20 I bobitiaki naba ma Kristo+ i aon te kai. Ai tiaki ngai ae I maiu,+ ma e maiu Kristo ao e katiteuanaaki ma ngai. Ni koauana, te maiu ae I maiuakinna ngkai n rabwatau, I maiu iai n onimakinan Natin te Atua,+ are e tangirai ao e anga ngaia ibukiu.+
21 I aki kakeaa* ana akoi ae rianako te Atua,+ bwa ngkana e reke te raoiroi rinanon te tua, ao bon akea uaani mateni Kristo.+
Taiani Kabwarabwara Mai Nano
^ Kuriiti, “biribiriu.”
^ Kuriiti, “teuana te aoa.”
^ E aranaki naba bwa Betero.
^ Ke, “e riai kabuakakaan arona.”
^ E aranaki naba bwa Betero.
^ E aranaki naba bwa Betero.
^ Kuriiti, “te iriko.”
^ Ke, “kakenakoa.”
