2 Rongorongo 22:1-12
22 Ao kaain Ierutarem a kaueaa natina are te bina are Aatia n onea mwina, bwa taani kuribwai ake a roko ma I-Arabia nakon te kaembwa are i Iuta, a tiringia ni kabane ake a ikawai.+ Mangaia are e a tautaeka Aatia are natin Ioram bwa te uea i aon Iuta.+
2 Bon 22 ana ririki Aatia ngke e riki bwa te uea, ao e tautaeka i Ierutarem i nanon teuana te ririki. Aran tinana Atariia+ are tibun* Omri.+
3 E nakonako naba teuaei ni kawaia ana utu Aaba,+ bwa e riki tinana bwa te tia anga te taeka n reirei nakoina ni karaoan ae buakaka.
4 Ao e teimatoa ni karaoa ae buakaka i matan Iehova, n aroia ana utu Aaba, bwa a riki bwa taan anga te taeka n reirei nakoina imwini maten tamana, ni karekea kamaunaana.
5 E kakairi n aia taeka n reirei ao e mwananga ma Ioram are natin Aaba are Uean Iteraera bwa a na buakana Atiaera+ are Uean Turia i Ramotakireata,+ ike a kaikoaka iai Ioram taani katebe.
6 E a oki nako Ietireera+ bwa e na kamarurungnga man ikoakina are a kaikoakia iai i Rama, ngke e buaka ma Atiaera are Uean Turia.+
Ao Aatia* are natin Ioram+ are uean Iuta e ruo rikaaki nako Ietireera bwa e na nora Ioram+ are natin Aaba, ibukina bwa e ikoaki* teuaei.+
7 Ma te Atua e karokoa bwakan Aatia ngke e kawara Ioram, ao ngke e roko ao e otinako ma Ioram bwa a na kawara Ieu+ are tibun* Nimti, are e kabiria Iehova bwa e na katiai aroia* ana utu Aaba.+
8 Ngke e motiki taekaia ana utu Aaba Ieu, ao e boo ma tokan nako Iuta ao natin tarin nako Aatia aika mwaane, ma taani beku iroun Aatia, ao e tiringia.+
9 Ao e ukoukora Aatia, ao e reke irouia n te tabo are e karabaa iai i Tamaria, ao a kairia nakon Ieu. Imwina ao a kamatea ao a kaiia+ bwa a taku: “Bon tibun Ieotiabata teuaei, are e ukoukora Iehova ma nanona ni kabane.”+ Bon akea temanna ana utu Aatia ae iai mwaakana ni kaira te tautaeka n uea.
10 Ngke e noria Atariia+ are tinan Aatia bwa e a mate natina, ao e a teirake naba ni kamaunaia ni kabane taiani kanoa ake bwaanuea* ake tibun Iuta.+
11 Ma Nei Ieotiabate are natin te uea e anaa Ioati+ are natin Aatia, ao e iraea mai buakoia natin te uea aika mwaane ake a nang kamateaki, ao e katikua ma ana tia tobwa i nanon te ruu ni matu teuana. Ao Ieotiabate are natin te Uea are Ioram+ (neiei boni buun Ieoiata+ are te ibonga,* ao mwaanen Aatia) e reke angana ni karabaa te teei aei mairoun Atariia, n te aro are e a aki kamateaki iroun neiei.+
12 E teimatoa ni karabaaki i rarikia n ana auti te Atua ae koaua i nanon onoua te ririki, ngke e tautaeka n te aba Atariia.
Taiani Kabwarabwara Mai Nano
^ Ebera, “te aine ae natin.”
^ Ke, “e aoraki.”
^ “Ataria” ni koroboki tabeua n te taetae n Ebera.
^ Ebera, “te mwaane ae natin.”
^ Ebera, “koreianako.”
^ Ebera, “ana kariki nako te tautaeka n uea.”
^ Nora Nanon Taeka.
