2 Rongorongo 15:1-19
-
E karaoi bitaki aika raraoi Ata (1-19)
15 Ao e roko taamnein te Atua i aon Ataria are natin Oteta.
2 Ngaia are e a otinako ni kawara Ata ao e taku nakoina: “Ongora irou, ngkoe ae Ata ma kaain Iuta ni kabane ma Beniamin! E memena iroumi Iehova tii ngkana kam teimatoa ni memena irouna,+ ao ngkana kam ukoukoria ao ane e na kariaia bwa kam na kunea,+ ma ngkana kam kitanna ao e na kitaningkami.+
3 Bwa e a maan te tai* n akea te Atua ae koaua i Iteraera, akea te ibonga* ae angareirei, ao akea naba te Tua.+
4 Ma ngke a okira Iehova ae Atuan Iteraera ngke a rawawata ma n ukoukoria, ao e a kariaia bwa a na kunea.+
5 N taai akanne ao akea ae e kona ni mwamwananga n akea ana kangaanga,* bwa e bati te mangaongao i buakoia ni kabane kaain aaba akekei.
6 E karawawataaki te natannaomata teuana iroun te natannaomata teuana, ao te kaawa teuana iroun te kaawa teuana, ibukina bwa e teimatoa te Atua ni kamangaoia n aeka n rawawata nako.+
7 Ma kam na korakora ngkami, ao tai bwarannano,*+ bwa e na bon reke kaniwangan ami mwakuri.”
8 Ngke e ongo naba ngkekei Ata taeka aikai ma ana taetae ni burabeti Oteta are te burabeti, ao e ninikoria ao e kanakoi bouannanti aika kamwara man te aba ae Iuta+ ni kabutaa ma Beniamin ao mani kaawa ake e taui man aonon Eberaim ae maungaunga, ao e a manga kaoka ana baonikarea Iehova are i matan ana kaman* Iehova.+
9 Ao e ikotiia ni kabane tibun Iuta ma Beniamin, ao raoia aomata aika maeka n iruwa mai Eberaim, Manate, ao Timeon,+ bwa a kitana Iteraera ao a nakoina ngke a noria bwa e memena irouna Iehova ae Atuana, ao a rangi ni bati mwaitiia.
10 Mangaia are a bane n ikotaki i Ierutarem n te katenua n namwakaina n ana ka-15 n ririki n tautaeka Ata.
11 N te bong anne ao a kareani kaao aika 700 ao tiibu aika 7,000 nakon Iehova, mai buakoni bwaai ni kuri ake a uotii.
12 Irarikin anne, a karaoa te berita bwa a na ukoukora Iehova ae Atuaia aia bakatibu ma nanoia ni kabane ao maiuia* ni kabane.+
13 E na kamateaki ane e aki ukoukora Iehova ae Atuan Iteraera, e ngae naba ngkana tao te roro n rikirake ke te kara,* ke tao te mwaane ke te aine.+
14 Mangaia are a taetae n tuea nakon Iehova n te bwanaa ae korakora, ma te takarua ni kimwareirei, ao n taiani buu ma buu aika taiani koro.
15 Ao a bane kaain Iuta ni kimwareirei n te taetae n tuea arei. Bwa a taekina te taetae n tuea arei ma nanoia ni kabane ao a ingainga n ukoukoria, ao e kariaia bwa e na kuneaki irouia.+ Ao e teimatoa Iehova n angania te motirawa mairouia aiaia ni kabane ake i rarikia.+
16 Ao Ata are te uea e kabwakaa naba Maaka+ are tibuna te unnaine man nakoana ae te ueannaine, ibukina bwa e karaoa neiei ana bouannanti ae kammaira ibukin taromaurian te kai ae tabu.*+ Ao Ata e korea ana bouannanti ae kammaira neiei ni kabwakaa ao e ibeibeia ao e kabuekia n te Mwarua ae Kiteron.+
17 Ma a aki kanakoaki taabo aika rietata+ mai abaia tibun Iteraera.+ Ma e ngae n anne e tabwanin raoi nanon* Ata, ni kabane maiuna.*+
18 Ao e uotii nakon ana auti te Atua ae koaua bwaai ake e katabui ngaia ma tamana, aika tirewa, koora, ao bwaai riki tabeua.+
19 Akea te buaka ni karokoa ana ka-35 n ririki n tautaeka Ata.+
Taiani Kabwarabwara Mai Nano
^ Ebera, “Ao a bati boong.”
^ Nora Nanon Taeka.
^ Ebera, “akea te raoi iroun ane e otiotinako, ao iroun ane e riirin.”
^ Ebera, “tai kabwakai baimi.”
^ Ae taekan te tabo n rin ae mena i moan te tembora.
^ Ebera, ne’phesh, nora Nanon Taeka.
^ Ke, “ane e kakannato ke ane e mangori.”
^ Nora Nanon Taeka.
^ Ke, “tabwanin raoi ana tangira.”
^ Ebera, “ana bong.”
