2 I-Korinto 12:1-21
12 N na bae ni kamoamoa, ao N na taekin taiani miitara+ ma kaotioti mairoun te Uea,+ e ngae ngkai e aki manena.
2 I ataa te aomata ae te tia rimwini Kristo are e uotakinako nakon te katenua ni karawa, 14 te ririki n nako. I aki ataia bwa e uotakinako n rabwatana ke n tiaki rabwatana. E ataia te Atua.
3 Eng, I ataa te aomata anne. E uotakinako nakon te bwaretaiti—n rabwatana ke tao n tiaki rabwatana, I a aki ataia, e ataia te Atua.
4 Ao ngke e a mena n te bwaretaiti ao e ongo taeka aika aki riai n taekinaki, ake a aki kariaiakaki aomata bwa a na taekin.
5 N na kamoamoa ibukin te aomata anne, ma N na aki kamoamoa ibukiu, ma tii ni kaineti ma mamaarau.
6 Bwa ngkana arona bwa I kani kamoamoa, ao N na aki nanobaba iai, bwa N na taekina te koaua. Ma I rawa ni karaoa anne, bwa e aonga n akea ae e na kamoamoaai n ae riaon are e norai ni karaoia, ke n ongo are I taekinna,
7 tao ibukini kaotioti aika bati ake I anganaki.
N te aro bwa N na aki rangi ni kamoamoa, I a anganaki te bwai ni kateketeke n te rabwata,+ ae kaanga ana anera Tatan bwa e na ororeai, bwa I aonga n aki rangi ni kamoamoa.
8 I katenua au tai ni bubutii nakon te Uea ibukin te bwai ni kateketeke n te rabwata aei bwa e na nako mairou.
9 Ma e taku nakoiu: “E a bati n tau te akoi ae rianako are I kaotiotia nakoim, bwa e kakororaoaki mwaakau iroum ni mamaaram.”+ Ngaia ae I rangi ni kukurei riki ni kamoamoa ni kaineti ma mamaarau, bwa e aonga n teimatoa mwaakan te Kristo i aou n aron te nne ni katantan.
10 Mangaia ae I kukurei n taiani mamaara, n taian taetae ni kamatauninga, n taiani kainnano, n taiani bwainikirinaki ma kangaanga ibukini Kristo. Bwa ngkana I mamaara, ao ngkanne I a korakora.+
11 I a riki bwa ai aron te nanobaba. Bwa ngke arona bwa kam kamoamoaa taekau ao N na bon aki kairoroaki nakon arou aei. E ngae ngke kam taraai bwa akea arou, ma I bon aki mangori riki n te bwai teuana nakoia ami abotoro ake aongkoa moan te raoiroi aroia.+
12 Ni koauana, kam nora kakoauaan nakoau n abotoro i buakomi n te nanomwaaka ae korakora,+ ao ni kanikina, ao ni baika kamimi, ao ni mwakuri ni kakai.+
13 Bwa tera ae kam a mangori naba iai i buakoia ekaretia? Tii ibukin ae I aki roko n te riki bwa te bwai ni karawawata nakoimi?+ Taiaoka n akoai ni kabwaraa au kairua aei.
14 Noria! Ai te katentai aei ae I a tauraoi ni kawaringkami, ao N na aki riki bwa te bwai ni karawawata nakoimi. Bwa I aki ukoukori ami bwai,+ ma I ukoukoringkami. Bwa a aki kantaningaaki naati+ bwa a na kaiko ibukia aia karo, ma a na kaiko kaaro ibukia natiia.
15 Bwa ngai irou, I kukurei riki n anga bwaai ni kabane ao ni kabonganaaki ibukimi.+ Ngkana e bati tangirami irou, e na karako riki tangirau iroumi?
16 Ma n aki ongea anne, I bon aki karawawataingkami.+ Ma e ngae n anne, kam taku bwa “I nanowanawana” ao I kamwaneingkami n “te mwamwanaa te aba.”
17 I aki aonikaingkami iroun temanna mai buakoia te koraki ake I kanakoia nakoimi, tiaki ngaia?
18 I kaumaka Tito bwa e na kawaringkami ao I kanakoa ma te tari temanna. E aki aonikaingkami naba teutana Tito, tiaki ngaia?+ Ti nakonako n te iango ae tii teuana, ke ti aki? Ti nakonako n te mwaneka ae tii te arona, ke ti aki?
19 Kam tabe n iangoia ngkai bwa ti kaekaa bukinara nakoimi? Ti bon taetae i matan te Atua ngkai taan rimwini Kristo ngaira. Ma ti karaoi bwaai ni kabane ibukini kateimatoaami, ngkami aika kam tangiraki.
20 Bwa I maaku ngkana I roko ao I kuneingkami n aromi ae kaokoro ma ae I tangiria, ke e na kaokoro arou ma are kam tangiria, bwa tao e nang riki iai te kauntaeka, te bakantang, te un, te itabarara, te uarao, te uataeka,* te kainikatonga, ao ai te kamangaongao.
21 Bwa ngkana tao I a manga roko, ao e na kamaamaeai te Atua i buakomi, ao N na rangi n nanokawaki ibukia aika bati ake a a tia ni bure ma a tuai n rairi nanoia man aroia aika kamwara ma te wene ni bure,* ao aroaro aika kammaira* ake a a tia ni karaoi.
Taiani Kabwarabwara Mai Nano
^ Ke, “winnanti.”
^ Kuriiti, por·neiʹa. Nora Nanon Taeka.
^ Ke, “te aroaro ae kanuka.” Kuriiti, a·selʹgei·a. Nora Nanon Taeka.
