1 Tamuera 16:1-23
16 N tokina ao e a taku Iehova nakon Tamuera: “Ai tii maanra ngkoe n tanginiwenei ibukin Tauro,+ ngkai I a tia n rawa nakoina bwa e na tautaeka bwa te uea i aoia tibun Iteraera?+ Kaona am koro n te bwaa+ ao mwananga nako. N na kanakoko nakon Iete+ are te I-Betereem, bwa I a tia n rinea temanna mai buakoia natina mwaane bwa e na uea ibukiu.”+
2 Ma e taku Tamuera: “N na kangaa n nako? E na bon tiringai+ Tauro ngkana e ongo taekan anne.” E kaeka Iehova ni kangai: “Kaira te kao aine ae ataei ao kangai, ‘I roko bwa N na angakarea nakon Iehova.’
3 Kaoa Iete nakon te angakarea, ao N na kaota nakoim te bwai ae ko na karaoia. Ko riai ni kabira teuare N na kaotia nakoim ibukiu.”+
4 E karaoa Tamuera te bwai are e taekinna Iehova. Ngke e roko i Betereem+ ao a rurubenebene unimwaanen te kaawa ngke a kawaria ao a taku: “E nanona te rau rokom aei?”
5 Ao e taku: “E nanona te rau. I roko bwa N na angakarea nakon Iehova. Katabuingkami,* ao nakomai irai nakon te angakarea.” Ao e katabua Iete ma natina ao imwina e ikotiia nakon te angakarea.
6 Ngke a rinnako ao e nora Eriaba,+ ao e taku: “E a bon tei i matan Iehova ana aomata ae kabiraki.”
7 Ma e taku Iehova nakon Tamuera: “Tai tabe ma taraana ao abwakina,+ bwa I rawa nakoina. Bwa tiaki ai aron ana taratara te aomata ana taratara te Atua, bwa ana taratara te aomata e tii nora ae e kona n noria te mata, ma Iehova e nora te nano.”+
8 Ao Iete e wetea Abinataba+ ao e kairia nako matan Tamuera, ma e taku: “E aki naba rinea teuaei Iehova.”
9 Imwina ao Iete e a manga kaira Tiamma,+ ma e taku: “E aki naba rinea teuaei Iehova.”
10 Mangaia are e a kabaneia natina ake itiman Iete ni kairiia nako matan Tamuera, ma e taku Tamuera nakon Iete: “E aki naba rinea temanna i buakoia naakai Iehova.”
11 N tokina ao e a taku Tamuera nakon Iete: “Tii aikai ni kabane am ataeinimwaane?” E kaeka ao e taku: “Are e a kaman nako are te bina+ ni karokoa ngkai, bwa e kawakinia tiibu.”+ Ao e taku Tamuera nakon Iete: “Kanaanako ni weteia, bwa ti na bon aki tekateka n amwarake ni karokoa ae e roko ikai.”
12 Ngaia are e a kanaanako ni weteia ao e karinna. Ao e ribaura teuaei ma ni mataraoi ao e botonimwaane taraana.+ Ao e taku Iehova: “Teirake ao kabiria, bwa boni ngaia teuaei!”+
13 Mangaia are e anaa te koro are nnen te bwaa+ Tamuera ao e kabira teuarei i mataia tarina. Ao taamnein Iehova e a kakorakoraa Tawita ni moa man te bong arei.+ Imwina riki ao e a teirake Tamuera ao e nako Rama.+
14 Ao e a kitana Tauro taamnein Iehova,+ ao e kariaia Iehova bwa e na kakamaakaki Tauro ni bon oin ana iango.*+
15 A taku ana toro Tauro nakoina: “Noria ngkai, e a kakamaakuko te iango ae aki rau mairoun te Atua.
16 Taiaoka ara uea, bwa ko na tua nakoia am toro aika i matam, bwa a na ukera te rorobuaka ae mwaatai ni katanga te abi.+ N te tai are e roko iai iroum te iango ae aki rau mairoun te Atua, ao e na katangnga ao ko na manga namakina te rau.”
17 Mangaia are e taku Tauro nakoia ana toro: “Taiaoka ma kakaaea temanna te rorobuaka ibukiu ae rabakau ni katangitang, ao kairia nakoiu.”
18 E taku temanna mai buakoia tooro: “Noria! I a tia n nora natin Iete are te I-Betereem bwa e mwaatai ni katangitang, ao bon te tia buaka ae ninikoria ma ni korakora.+ E wikateke ma ni botonimwaane,+ ao e memena Iehova irouna.”+
19 E kanakoia ngkanne taan uataeka Tauro nakon Iete ao e kangai: “Kanakomaia nakoiu natim are Tawita are memena i rarikin te nanai.”+
20 Mangaia are e katokaa te kariki ao te kunniman ae kanoana te wain Iete i aon te taongki ao te kooti ae ataei, ao e kanakoi baikai ma natina are Tawita nakon Tauro.
21 Ao e roko Tawita iroun Tauro ao e a bebeku irouna.+ E a rikirake ni korakora tangirana iroun Tauro, ao e a riki bwa te tia uouotii ana bwai ni buaka.
22 E kanakorongorongo Tauro nakon Iete ni kangai: “Taiaoka ma kariaia bwa e na tiku Tawita ni bebeku irou, bwa e a reke akoana i matau.”
23 Ngkana e roko iroun Tauro te iango ae aki rau mairoun te Atua, ao e a anaa naba te abi Tawita ao e katangnga. Ao e kabebeteaki iai Tauro ma n namakina te rau, ao e a nako mairouna te iango are aki karaua.+
Taiani Kabwarabwara Mai Nano
^ Ke, “Kaokoroingkami ibukin te Atua.”
^ Ebera, “e kakamaakaki n te taamnei ae buakaka mairoun Iehova.”
