Nou chak gen roun fason abiyé. Mé i gen prensip annan Labib-a ki ka idé nou fè Jéova plézi lò nou ka chwazi lenj nou kontan. Annou wè déztrwa annan sa prensip-ya.

1. Kisa ki ké idé nou chwazi fason nou ké abiyé ?

Kou nou ka sèrvi Jéova, nou divèt gen roun aparans ki pròp é nou divèt abiyé di roun fason « ki korèk, ké modèsti ké bon sans », konsa nou ka montré ki ‘nou kontan Bondjé’ (1 Timothée 2:9, 10). Annou wè kat prensip ki annan sa vèrsé-ya : 1) Nou divèt gen lenj ki « korèk ». Pitèt ou ja rémarké annan réinyon Témwen Jéova-ya, yé tout pa abiyé menm fason-an. Mé lenj nou ka chwazi ké fason nou ka penyen ka montré nou ka rèspèkté nou Bondjé Jéova. 2) Nou divèt abiyé ké « modèsti », sa lé di nou pa divèt mété lenj ki ka provoké ouben pou fè moun wè. 3) Nou ka chwazi nou lenj ké « bon sans » lò nou pa ka swiv tout lanmòd san réfléchi. 4) Nou aparans toujou divèt montré ki nou « kontan Bondjé », pou byen montré ròt-ya ki nou ka adoré vré Bondjé-a (1 Corinthiens 10:31).

2. Kouman fason nou ka abiyé pouvé aji asou nou frè ké sò ?

A vré, nou pouvé chwazi lenj nou lé mété, mé nou divèt réfléchi kouman fason nou ka abiyé ké aji asou ròt-ya. Nou ka fè tousa nou pouvé pou nou pa choké pyès moun. Sa nou lé, a « fè [nou] konpanyen plézi pou so byen, pou fè l’ grandi » (li Romains 15:1, 2).

3. Kouman fason nou ka abiyé pouvé bay ròt-ya anvi anprann plis bagaj asou Jéova ?

Kèlkanswa sitiasyon-an, nou lé byen abiyé nou kò, é sa ankò pi enpòrtan pou nou lò nou k’alé annan réinyon-yan é lò nou k’alé préché. Nou pa lé fason nou ka abiyé fè moun-yan malpalé nou épi anpéché yé kouté mèsaj enpòrtan-an nou ka poté pou yé. Nou lé abiyé nou kò di roun fason ki ka fè « ansèyman nou Bondjé, Sa-la ki ka sové nou, vini pi bèl » pou bay moun-yan anvi anprann plis bagaj asou Jéova (Tite 2:10).

 ANNOU FOUYÉ ANNAN LABIB-A

4. Roun aparans korèk ka montré nou ka rèspèkté Jéova

Poukisa nou divèt véyé fason nou ka abiyé ké penyen ? Li Psaume 47:2, épi kozé asou sa késyon-yan :

• Nou ka réprézanté Jéova. Kouman sa divèt aji asou fason nou ka abiyé ?

• Ès ou ka pansé ki nou vréman divèt véyé fason nou ka abiyé ké penyen lò nou k’alé annan réinyon-yan ouben lò nou k’alé préché ? Poukisa ?

 5. Kouman pran bon désizyon asou fason nou ka abiyé

Gadé VIDÉYO-a.

Nou lenj pa bézwen kouté chè, mé yé divèt pròp épi nou divèt byen chwazi yé soulon koté nou ka alé. Li 1 Corinthiens 10:24 ké 1 Timothée 2:9, 10. Apré sa, kozé asou rézon nou gen pou pa itilizé...

• lenj ki débrayé ouben déchiré ké chifonnen.

• lenj ki ka montré tout nou fòrm, lenj tro kourt, tro séré ouben tro dékòlté.

Jéova té bay Moyiz lalwa pou so pèp tan-lontan. Jòdla krétyen-yan pa bézwen obéyi sa lalwa-ya ankò, mé sa lalwa-ya ka anprann nou bokou bagaj asou sa Jéova ka pansé. Li Deutéronome 22:5, épi kozé asou sa késyon-an :

• Poukisa nou pa lé mété lenj ouben penyen nou chivé roun fason ki ka fè roun mouché sanblé ké roun madanm, ouben roun madanm sanblé ké roun mouché ?

Li 1 Corinthiens 10:32, 33 ké 1 Jean 2:15, 16, épi kozé asou sa késyon-yan :

• Poukisa a roun bon bagaj nou doumandé nou kò : « Ès fason mo ka abiyé ké penyen pa ké choké mo vwazen ouben frè ké sò-ya annan asanblé-a ? »

• Annan koté ou ka rété-a, kouman moun-yan gen labitid abiyé ?

• Ès ou ka pansé ki sa té ké bon roun krétyen abiyé menm fason-an ? Poukisa ou ka di sa ?

 SA NOU WÈ

Lò nou ka pran bon désizyon asou fason nou ké abiyé ké penyen, nou ka montré nou gen rèspè pou Jéova ké pou ròt-ya.

Kisa ou anprann

• Poukisa fason nou ka abiyé ké penyen enpòrtan pou Jéova ?

• Bay déztrwa prensip ki pouvé idé ou désidé kouman ou ké abiyé ké penyen.

• Poukisa fason nou ka abiyé ké penyen pouvé bay roun bon ouben roun mové témwanyaj asou Jéova ?