LÉSON 37
Kisa Labib-a ka di asou travay-a ké soumaké ?
Ès ou ja enkyété ou kò akoz di travay-a ouben problèm soumaké ? Sa pa toujou fasil ganyen soumaké pou viv é an menm tan sèrvi Jéova kou i ka mérité l’. Mé Labib-a ka bay nou bon konsèy pou idé nou.
1. Kisa Labib-a ka di asou travay-a ?
Bondjé lé nou pran plézi annan travay nou ka fè-a. Labib-a ka di « i pa gen pi bon bagaj pou roun wonm ki [...] pran plézi annan travay rèd i fè-a » (Ecclésiaste 2:24). Jéova ka travay rèd. Nou lé fè kou Jéova lò nou ka travay, si nou ka fè sa, sa ké fè li plézi é nou ké santi nou kò byen.
Travay-a enpòrtan, mé nou pa janmen divèt lésé travay-a divini pi enpòrtan ki sèrvi Jéova (Jean 6:27). Jéova promèt ki, si a li nou ka mété an prémyé annan nou lavi, i ké bay nou sa nou bézwen pou viv.
2. Kisa nou divèt panga annan zafè soumaké ?
Labib-a ka di ki « soumaké-a pouvé protéjé nou » mé i ka di osi ki a pa soumaké rounso nou bézwen pou nou gen tchò kontan (Ecclésiaste 7:12). A pou sa, Labib-a ka ankourajé nou pa kontan soumaké mé ‘kontan ké sa nou gen’ (li Hébreux 13:5). Si nou kontan ké sa nou gen, nou pa ké dékourajé kou sa-ya ki toujou ka chaché plis bagaj. Nou pa ké dévé soumaké pou anyen (Proverbes 22:7). É nou pa ké tonbé annan trap jwé soumaké ouben fè projè pou divini rich vitman.
3. Kouman nou pouvé itilizé soumaké pou idé ròt-ya ?
Jéova, a roun Bondjé ki ka bay san konté, é nou ka imité l’ lò nou menm osi nou ka « bay san konté » é lò nou « toujou paré pou partajé ké ròt moun » (1 Timothée 6:18). Nou pouvé fè sa lò nou ka fè ofrann pou soutni asanblé-a é idé sa-ya ki bézwen, èspésyalman nou frè ké sò-ya. A pa kantité bagaj nou ka bay ki enpòrtan pou Jéova. Sa ki enpòrtan pou li a sa ki ka pousé nou bay roun bagaj pou roun moun. Si nou ka bay ké tout nou tchò, nou ké gen tchò kontan é sa ké fè Jéova plézi (li Actes 20:35).
ANNOU FOUYÉ ANNAN LABIB-A
Annou wè ki bénédiksyon nou ka jwenn lò nou ka lésé travay-a a so plas é lò nou kontan ké sa nou gen.
4. Fason ou ka travay pouvé bay Jéova lònò
Nou lanmityé ké Jéova divèt gidé fason nou ka wè travay-a. Gadé VIDÉYO-a, épi kozé asou sa késyon-yan :
-
Kisa ou rémarké asou kondwit Jason annan so travay ?
-
Kisa i fè pou lésé travay-a a so plas ?
Li Colossiens 3:23, 24, épi kozé asou sa késyon-an :
-
Poukisa sa enpòrtan nou fè nou travay byen ?
Travay-a enpòrtan, mé nou pa janmen divèt lésé travay-a divini pi enpòrtan ki adoré Jéova.
5. Kontan ké sa nou gen ka bay nou lajwa
Bokou moun ka éséyé ganyen plizanplis soumaké. Mé Labib-a ka ankourajé nou gen rounòt létadèspri. Li 1 Timothée 6:6-8, épi kozé asou sa késyon-an :
-
Kisa Labib-a ka ankourajé nou fè ?
Menm si nou pa gen bokou soumaké nou pouvé gen tchò kontan. Gadé VIDÉYO-a, épi kozé asou sa késyon-an :
-
Kisa ki ka bay sa fanmi-a tchò kontan, menm si yé pa gen bokou soumaké ?
Mé si nou ja gen bokou soumaké é nou toujou lé plis. Annou wè èkzanp Jézi bay asou sa trap-a. Li Luc 12:15-21, épi kozé asou sa késyon-an :
-
Kisa ou anprann annan èkzanp Jézi-a ? (gadé vèrsé 15-a).
Li épi konparé Proverbes 10:22 ké 1 Timothée 6:10. Apré sa, kozé asou sa késyon-yan :
-
Kisa ki pi enpòrtan pou ou : rété zanmi ké Jéova ouben ganyen plis soumaké ? Poukisa ou ka di sa ?
-
Lò roun moun kontan kouri dèyè soumaké, ki problèm i pouvé jwenn ?
6. Jéova ké pran swen di nou
Si nou gen problèm soumaké ouben problèm travay, fason nou ké aji ké montré si nou ka vréman fè Jéova konfyans. Gadé VIDÉYO-a pou wè kisa nou pouvé fè lò nou gen sa kalité éprèv-ya. Épi kozé asou sa késyon-yan :
-
Annan vidéyo-a, ki problèm frè-a té gen ?
-
Kisa i fè pou réglé so problèm ?
Li Matthieu 6:25-34, épi kozé asou sa késyon-an :
-
Kisa Labib-a ka promèt pou sa-ya ki ka mété Jéova an prémyé annan yé lavi ?
I GEN MOUN KA DI : « Mo bézwen travay pou pran swen di mo fanmi. Mo pa pouvé alé annan réinyon-yan chak simenn. »
-
Ki vèrsé annan Labib-a ka idé ou wè ki mété Jéova an prémyé annan ou lavi, a toujou pi bon désizyon-an ou pouvé pran ?
SA NOU WÈ
Nou bézwen travay ké gen soumaké, mé sa pa janmen divèt anpéché nou adoré Jéova.
Kisa ou anprann
-
Kisa ki pouvé idé ou wè travay-a kou Jéova ka wè l’ ?
-
Ki bénédiksyon nou ka jwenn lò nou kontan ké sa nou gen ?
-
Jéova promèt pran swen di so pèp. Kouman ou pouvé montré ou gen konfyans annan sa promès-a ?
SA OU POUVÉ TRAPÉ OSI
Ès Labib-a ka di ki soumaké a roun mové bagaj ?
« Ès soumaké ka mennen tout kalité mové bagaj ? » (artik jw.org)
Gadé ki fason ou pouvé itilizé ou soumaké pou fè Jéova plézi.
« Kontan bay : kisa Labib-a ka di asou sa ? » (artik jw.org)
Ès sa danjéré jwé soumaké ?
« D’après la Bible : Les jeux d’argent » (Réveillez-vous !, mars 2015)
Gadé kisa ki idé roun mouché arété vòlò ké arété jwé soumaké.
« Les courses de chevaux étaient ma passion » (La Tour de Garde, 1é novanm 2011)
