LÉSON 28

Kouman ou pouvé montré ki sa Jéova ké Jézi fè pou ou gen valò ?

KOUTÈ SA

Kisa ou ka rousanti lò roun zanmi ka bay ou roun bèl kado ? Asiré pa pitèt ou kontan toubonnman é ou lé montré ou zanmi ki sa kado-a gen valò pou ou. Jéova ké Jézi bay nou pi bèl kado nou té pouvé gen : ranson-an. Kouman nou pouvé montré ki ranson-an gen valò pou nou ?

1. Di ki fason nou pouvé montré ki sa Jéova ké Jézi fè pou nou gen valò ?

Labib-a ka promèt ki « tout moun ki ka montré yé lafwa annan [Jézi] » pouvé viv pou tout-tan (Jean 3:16). Mé kisa sa lé di montré so lafwa ? A pa sèlman krè annan Jézi. Nou divèt montré nou lafwa osi lò nou ka pran désizyon é dapré sa nou ka fè (Jacques 2:17). Lò nou ka montré nou lafwa dapré sa nou ka fè ké di, nou lanmityé ké Jézi é so Papa, Jéova, ka vin pi fò (li Jean 14:21).

2. Ki lévènman èspésyal ka idé nou montré nou rékonésans pou sa Jéova ké Jézi fè pou nou ?

Lannwit anvan i mouri, Jézi di pou so disip-ya sa yé té pouvé fè pou yé montré yé rékonésans pou so sakrifis. Jézi di yé rasanblé yé kò pou roun lévènman èspésyal ki Labib-a ka aplé « Répa Sényèr-a ». Nou konnèt li osi kou « Mémoryal lanmò Jézi » (1 Corinthiens 11:20). Sa lévènman èspésyal-a té ké pèrmèt apot Jézi, ké tout vré krétyen-yan ki té ké vini apré yé, sonjé ki Jézi bay so lavi pou nou. A pou sa i bay sa lòrd-a : « Kontinyé fè sa pou sonjé mo » (Luc 22:19). Lò nou k’alé annan Mémoryal-a, nou ka montré nou rékonésans pou tout lanmou Jéova ké Jézi gen pou nou.

ANNOU FOUYÉ ANNAN LABIB-A

Annou gadé ròt fason ou pouvé montré ou rékonésans pou tout lanmou Jéova ké Jézi montré pou nou. Annou wè osi poukisa Mémoryal lanmò Jézi enpòrtan.

3. Kisa nou pouvé fè pou montré nou rékonésans

Imajiné ou ka néyé épi roun moun ka vin sové ou. Ès ou té ké yenki bliyé sa sa moun-an fè pou ou ? Ouben ès ou té ké fè tousa ou pouvé pou montré ou rékonésans pou sa i fè.

A gras a sa Jéova fè pou nou ki nou gen èspwar viv pou tout-tan. Li 1 Jean 4:8-10, épi kozé asou sa késyon-yan :

Poukisa sakrifis Jézi sa roun kado èspésyal ?
Kisa ou ka rousanti lò ou ka anprann sa Jéova ké Jézi fè pou ou ?

Kouman nou pouvé montré ki sa Jéova ké Jézi fè gen valò pou nou ? Li 2 Corinthiens 5:15 ké 1 Jean 4:11 ; 5:3. Apré ou li chak vèrsé, kozé asou sa késyon-an :

Dapré sa ou li, kisa nou pouvé fè pou nou montré nou rékonésans ?

4. Imité Jézi

Rounòt fason nou pouvé montré nou rékonésans, a lò nou ka imité Jézi. Li 1 Pierre 2:21, épi kozé asou sa késyon-an :

Kouman nou pouvé byen swiv tras Jézi ?

Jézi té kontan Paròl Bondjé-a, i té ka préché bon nouvèl-a é i té ka idé moun-yan.

5. Vini annan Mémoryal lanmò Jézi

Pou wè sa ki pasé annan prémyé Répa Sényèr-a, li Luc 22:14, 19, 20. Épi kozé asou sa késyon-yan :

Kisa ki pasé annan Répa Sényèr-a ?
Kisa dipen-an ké diven-an ka réprézanté ? (gadé vèrsé 19 ké 20).

Jézi té lé so disip-ya sélébré Répa Sényèr-a chak lannen lò a jou anivèrsèr so lanmò. A pou sa, chak lannen Témwen Jéova-ya ka rasanblé yé kò pou sonjé lanmò Jézi, kou Jézi di yé fè. Pou anprann bagaj asou sa réinyon-an ki enpòrtan, gadé VIDÉYO-a. Épi kozé asou sa késyon-an :