Kou ou anprann annan sa ti liv-a, annan Labib-a ou ka jwenn roun patché prensip ki ké idé ou fanmi ké ou menm osi. Jéova lé ou gen tchò kontan. I ka promèt ou ki si ou ka mété so ladorasyon douvan, « i ké bay [ou] tout sa ròt bagaj-ya » (Matthieu 6:33). I lé ou divini so zanmi. Atò, profité di chak lokazyon pou fè ou lanmityé ké li grandi. A pi gran lònò ou pouvé gen (Matthieu 22:37, 38).

SA LABIB-A KA DI : « “Mo ké divini roun papa pou zòt, é zòt ké divini mo tifi ké mo tigarson”, a sa Jéova ka di » (2 Corinthiens 6:18). Bondjé lé ou divini so bon zanmi. Lapriyè ka idé ou rivé fè sa. I ka doumandé ou « priyè tout-tan » (1 Thessaloniciens 5:17). I lé kouté sa ou gen ofon ou tchò ké sa ki ka enkyété ou (Philippiens 4:6). Si ou ka priyè ké ou fanmi, yé ké wè ki pou ou, Bondjé a roun vré moun.

Palé ké Bondjé a roun bon bagaj, mé a pou kouté l’ osi. Kouman ou pouvé fè sa ? A pou étidyé so Paròl ké liv bazé asou Labib-a (Psaume 1:1, 2). Pran tan réfléchi asou sa ou ka anprann-an (Psaume 77:11, 12). Épi, kouté Bondjé, sa lé di osi alé chak simenn annan réinyon krétyen-yan (Psaume 122:1-4).

Palé ké Jéova ka idé ou osi fè ou rélasyon ké li divini pi fò. Pi ou ké palé ké li, pi ou ké santi ou kò pi pròch di li (Matthieu 28:19, 20).

SA OU POUVÉ FÈ :

• Pran tan chak jou pou étidyé Labib-a é pou priyè.

• Ou ké ou fanmi divèt mété tout bagaj zòt ka fè pou Bondjé anvan anmizman.

SA LABIB-A KA DI : « Vini pi pròch di Bondjé, é i ké vini pi pròch di zòt » (Jacques 4:8). Désidé kitan ou ké étidyé Labib-a ké ou fanmi é a pou ou swiv sa ou désidé fè (Genèse 18:19). Mé a pa tout. Ou divèt sonjé ou rélasyon ké Bondjé touléjou. Idé moun di ou fanmi fè yé rélasyon ké Bondjé divini pi fò. Pou fè sa palé yé di Bondjé, kou Labib-a ka di, « lò to ké asiz annan to kaz, lò té ké maché anlè larout-a, lò to ké alé dronmi é lò to ké lévé » (Deutéronome 6:6, 7). A pou ou byen désidé kou Joziyé, ki di : « Kant-a mo ké mo fanmi, nou ké adoré Jéova » (Josué 24:15).

SA OU POUVÉ FÈ :

• Désidé kitan ou ké étidyé Labib-a. Sa ou ké désidé-a ké divèt bon pou sa chak moun annan ou fanmi bézwen.