Jéova bay nou latè-a. A nou « kaz ». Bondjé pa kréyé prémyé koup-a, Adan ké Èv pou yé plen syèl-a ké moun. Bondjé té ja kréyé sé zanj-ya pou viv annan syèl-a (Job 38:4, 7). I mété prémyé wonm-an annan roun paradi bèl toubonnman, yé té ka aplé l’, jarden Édèn-an (Genèse 2:15-17). É i ofri Adan ké so désandan-yan posibilité viv asou latè-a pou tout-tan. — Li Psaume 37:29 ; 115:16.

O koumansman, a té jarden Édèn-an rounso ki té sa roun paradi. Adan ké Èv té divèt gen timoun pou ranpli latè-a. Yé té divèt osi okipé di tout latè-a pou fè l’ divini roun paradi (Genèse 1:28). Latè-a pa ké janmen détrwi. A ké toujou nou « kaz ». — Li Ecclésiaste 1:4.

Gadé vidéyo Poukisa Bondjé kréyé latè-a ?

Adan ké Èv dézobéyi Jéova. A pou sa i mété yé dèrò di jarden Édèn-an. Paradi-a disparèt é pyès moun pa rivé roufè l’. Labib-a ka di : « I lésé latè-a annan lanmen sé méchan-yan » (Job 9:24). — Li Genèse 3:23, 24.

Ès Jéova anbandonnen projè i gen pou nou ? Non ! I tou-pwisan é so volonté toujou ka fèt (Isaïe 45:18). Tousa i té prévwè pou nou i ké fè l’. — Li Psaume 37:11, 34.

Latè-a ké roudivini roun paradi pannan dominasyon Jézi, Rwa Bondjé chwazi-a. Jézi ké sé zanj-ya ké détrwi tout sé lèlmi Bondjé-ya pannan roun lagèr ki Labib-a ka aplé Armagédon. Apré sa i ké mété Satan lajòl, pannan 1 000 lannen. Pannan sa dèstriksyon-an, sé adoratèr Bondjé-ya ké rété vivan paské Jézi ké gidé yé ké protéjé yé. Yé ké pouvé  pran plézi viv pou tout-tan annan paradi-a asou latè-a. — Li Révélation 20:1-3 ; 21:3, 4.

Kitan Bondjé ké fè méchansté-a disparèt ? Jézi bay roun « sign » ki té ké montré ki lafen-an pròch rivé. Jòdla, sitiasyon monn-an ka mété lavi sé moun-yan an danjé. Sa ka montré ki nou ka viv annan « dèrnyé moman sa monn-an ». — Li Matthieu 24:3, 7-14, 21, 22.

Jézi ké dirijé latè-a dipi laro syèl-a, pannan 1 000 lannen. Toupannan i ké dirijé, i ké fè tout sé soufrans-ya disparèt (Isaïe 9:6, 7 ; 11:9). I ké Rwa mé i ké osi Gran Prèt : i ké éfasé péché di sa-ya ki kontan Bondjé. Bondjé ké itilizé Jézi pou tiré maladi-a, lavyéyès ké lanmò. — Li Isaïe 25:8 ; 33:24.

Moun-yan ki ka obéyi Bondjé ké viv annan paradi-a (1 Jean 2:17). Jézi doumandé so disip-ya chaché sé moun ki enb, sa lé di moun ki ka fè yé kò toupiti. Sé disip-ya té divèt montré yé kouman fè Jéova plézi. Jòdla, Jéova ka préparé milyon moun pou yé viv annan paradi-a asou latè-a (Sophonie 2:3). Annan Sal di Rwayonm, koté Témwen Jéova-ya ka réini, nou ka anprann kouman divini roun miyò mari, roun miyò papa, roun miyò madanm-maryé ouben roun miyò manman. Papa, manman ké pitit ka adoré Bondjé ansanm é yé ka anprann kouman viv pi byen gras a ansèyman Labib-a. — Li Michée 4:1-4.