ÈS SA rèd pou to di étidyé Labib chak simenn épi pran plézi fè l’ ? Sa ja rivé nou tout. Mé sonjé ròt bagaj nou divèt fè souvan. Parèkzanp, a pou nou lavé. Sa ka doumandé tan épi éfòr mé apré sa, nou ka santi nou kò tèlman byen ! Menm fason-an, lò nou ka étidyé Labib, a kousidiré nou té ka lavé pou divini pròp « ké dlo paròl-a » (Éph. 5:26). Men déztrwa bagaj ki ké idé to étidyé chak simenn :

• Fè roun program. Étidyé Labib to rounso ka fè parti di ‘bagaj-ya ki pi enpòrtan’ (Phil. 1:10). Donk, roun krétyen pa divèt mété sa asou koté. Pou idé to swiv sa program-an, to pouvé mété l’ roun koté to ka byen wè l’, parèkzanp asou roun tablo ouben asou lapòt frijidèr-a. Ouben to pouvé mété roun alarm asou to pòrtab, to tablèt ouben rounòt bagaj pou fè to sonjé ki lèr to divèt étidyé.

• Fè sa ki miyò pou to. Kisa ki pi fasil pou to : rété konsantré pannan roun bon moman ouben rété konsantré pannan plizyèr ti moman ? A to ki konnèt to kò. Atò, lò to ké désidé kitan to ké étidyé, a pou to fè l’ parapòrta sa ki pi fasil pou to. É si lò moman-an rivé pou to étidyé, to pa djè anvi fè l’, to pouvé étidyé dis minit rounso. Miyò to étidyé roun ti moso tan pasé to pa étidyé pyès ! É pitèt menm ki lò to ké koumansé étidyé, to pa ké anvi arété ankò (Phil. 2:13).

• Désidé alavans sa to ké étidyé. Si a lò to ka asiz pou étidyé to ka doumandé to kò sa to ké étidyé, to pa ké ‘itilizé to tan pi bon fason-an’ (Éph. 5:16). Donk, éséyé fè roun lis artik ouben bagaj to té ké lé étidyé. Épi dipi i gen roun késyon ki ka vini annan to tèt, marké l’. É chak fwa to ké fini étidyé, pitèt to ké anvi rajouté ròt bagaj pou étidyé asou sa ti lis-a.

• A pou to paré chanjé to program. Détan, to ké pitèt divèt chanjé moman-an to té prévwè étidyé ouben sa to té prévwè étidyé. Sa ki enpòrtan, a pa kitan, konmyen tan ni menm sa to ké étidyé, sa ki enpòrtan, a ki to étidyé chak simenn.

Lò nou ka étidyé Labib chak simenn, nou ka trapé bokou bénédiksyon : sa ka fè nou vin pi pròch di Jéova, sa ka idé nou gen plis sajès é sa ka bay nou plis fòrs (Jos. 1:8).