1. Poukisa nou pouvé di ki fè parti di òrganizasyon Jéova-a, a roun bénédiksyon ?

 NOU KA fè parti di òrganizasyon Jéova-a é a roun bénédiksyon annan sa dèrnyé jou-ya ki rèd. Lavi-a annan sa monn-an ka vin plizanpli difisil, mé Jéova ka bay nou frè ké sò pou idé nou (Ps. 133:1). I ka èspliké nou kouman nou tchò pouvé kontan annan nou fanmi (Éph. 5:33 – 6:1). É i ka bay nou sajès nou bézwen pou nou vréman byen annan nou tchò.

2. Kisa nou divèt fè, é poukisa ?

² Mé a pou nou fè éfòr kanmenm pou nou kontinyé adoré Jéova ké fidélité. Poukisa ? Paské sa ròt-ya ka di ouben ka fè pouvé fè nou lapenn. Nou pouvé dékourajé osi paské nou ka fè bagaj ki pa bon, èspésyalman si nou ka roufè menm bagaj-ya toulong. Mé a pou nou kontinyé adoré Jéova 1) lò roun frè ouben roun sò ka fè nou lapenn, 2) lò nou madanm ouben nou mari ka fè nou lapenn, épi 3) lò nou dékourajé paské nou fè roun bagaj ki pa bon. Annan sa artik-a, nou ké palé di sa trwa sitiasyon-yan, é pou chak sitiasyon, nou ké wè èkzanp roun moun annan Labib.

RÉTÉ FIDÈL LÒ ROUN SÒ OUBEN ROUN FRÈ KA FÈ TO LAPENN

3. Ki problèm nou pouvé jwenn ?

³ Problèm-an. Roun ran frè ké sò ka fè bagaj ki ka nèrvé nou. Rounòt ran pitèt fè nou lapenn ouben yé fè nou roun bagaj ki pa té janti. É frè-ya ki ka dirijé nou pouvé  tronpé yé kò. Sa kalité bagaj-ya pouvé fè roun ran arété fè òrganizasyon Jéova-a konfyans. Pasé yé kontinyé adoré Bondjé ké yé frè ké sò-ya « ansanm ansanm », yé pouvé désidé arété frékanté sa-ya ki fè yé lapenn ouben menm arété vini annan réinyon-yan (Soph. 3:9). Ès a té ké roun bon bagaj ? Annou wè sa roun moun annan Labib ki jwenn sa kalité problèm-an ka anprann nou.

4. Ki sitiasyon ki té rèd Pòl jwenn ?

⁴ Èkzanp-a annan Labib. Pòl té savé ki so frè ké sò-ya pa té parfè. Parèkzanp, roun ran annan asanblé Jérizalèm té pè l’ lò yé kontré ké l’ (Actes 9:26). Pita, roun ran annan asanblé-a palé li mal pou sali so répitasyon (2 Cor. 10:10). I wè roun frè ki té gen bokou rèsponsabilité pran roun désizyon ki té pouvé fè roun patché frè ké sò tonbé (Gal. 2:11, 12). É roun di so bon zanmi, Mark, fè l’ lapenn bokou (Actes 15:37, 38). Tout sa sitiasyon-yan té pouvé fè l’ désidé arété frékanté sa-ya ki té fè li lapenn. Mé i kontinyé wè so frè ké sò-ya kou Jéova té ka wè yé é i kontinyé travay pou Jéova. Kisa ki idé l’ tchenbé ?

5. Kisa ki idé Pòl pardonnen so frè ké sò-ya épi rété pròch ké yé ? (Colossiens 3:13, 14 ; gadé zimaj-a osi).

⁵ Pòl té kontan so frè ké sò-ya. So lanmou pou yé idé li rété asou bèl kalité yé té gen pasé i rété asou yé défo. É sa pèrmèt li apliké sa li menm té ékri annan Colossiens 3:13, 14 (li). Parèkzanp, annou wè kouman i aji ké Mark. Menm si Mark té lésé l’ tonbé pannan so prémyé vwayaj misyonèr, i pa rété faché ké li. Pita, annan roun bèl lèt i ékri pou asanblé Kolòs, i di bon bagaj asou Mark. I di yé ki i té ka travay ansanm ké li é ki i té gen valò pou li. I té sa roun « sours ki ka bay gran konsolasyon » (Col. 4:10, 11). É lò i té lajòl Ròm, a Mark èspésyalman i doumandé pou vini idé li (2 Tim. 4:11). Nou ka byen wè ki Pòl té ka pardonnen so frè ké sò-ya é ki i té ka rété pròch ké yé. Kisa sa ka anprann nou ?

6-7. Kouman nou pouvé kontinyé montré nou frè ké sò-ya ki nou kontan yé menm si yé pa parfè ? (1 Jean 4:7).

⁶ Sa sa ka anprann nou. Jéova lé nou kontinyé montré nou frè ké sò-ya ki nou kontan yé (li 1 Jean 4:7). Si roun jou, roun annan yé pa ka aji ké nou kou roun krétyen divèt fè l’, nou pouvé di nou kò  ki i lé fè Jéova plézi, mé ki i aji san i pa réfléchi (Prov. 12:18). Jéova kontan so sèrvitèr-ya ki fidèl menm si yé pa parfè. Lò nou ka fè roun bagaj ki pa bon, i pa ka mété nou asou koté é i pa ka rété faché ké nou (Ps. 103:9). Sa vréman enpòrtan di pardonnen ròt-ya pou nou imité nou Papa ! (Éph. 4:32 – 5:1).

⁷ Anplis di sa, annou pa bliyé ki kou lafen-an pròch, a pou nou rété pròch ké nou frè ké sò-ya. Nou savé ki pèrsékisyon-an ké vini pi fò ankò. Yé pouvé menm mété nou lajòl akoz di nou lafwa. Si sa ka rivé nou, nou ké bézwen nou frè ké sò-ya (Prov. 17:17). Annou wè èkzanp Josep a, roun ansyen ki ka rété Èspagn. Kou li ké plizyèr ròt frè pa té lé fè yé sèrvis militèr, yé mété yé lajòl yé tout ansanm. Josep ka di : « Lò nou té lajòl, kou nou té roun asou ròt, détan nou té ka nèrvé nou konpanyen. Donk, nou té divèt sipòrté épi pardonnen nou konpanyen ké tout nou tchò. Kou nou té an mitan moun ki pa té ka adoré Jéova, sa idé nou rété ansanm ansanm épi protéjé nou konpanyen. Roun jou, mo kasé mo bra é yé mété l’ annan roun plat. I té gen sèrten bagaj mo pa té ka rivé fè mo rounso. Mé roun di mo frè lavé mo lenj é idé mo fè ròt bagaj. I montré mo ki i té kontan mo lò mo té plis bézwen. » An tout sans, si nou gen roun problèm ké nou konpanyen, a aprézan pou nou réglé sa !

KONTINYÉ RÉTÉ FIDÈL LÒ TO MOUCHÉ OUBEN TO MADANM KA FÈ TO LAPENN

8. Ki problèm mouché ké madanm maryé ka jwenn ?

⁸ Problèm-an. Labib-a ka di ki tout mouché ké madanm maryé ka jwenn « tribilasyon », sa lé di problèm (1 Cor. 7:28). É a vré, tout mouché ké madanm ki maryé ka jwenn problèm. Poukisa ? Paské, lò dé moun ka maryé, a dé moun ki pa parfè ki ka maryé. Yé chak gen yépa kalité ké défo é yé chak gen bagaj yé kontan ké bagaj yé pa kontan. Détan, yé pa gen menm kiltir-a é yé pa lévé menm fason-an. Épi, piti piti, yé pouvé koumansé wè sèrten défo yé mouché ouben yé madanm gen yé pa té ka wè anvan yé maryé. Tout sa bagaj-ya pouvé mennen problèm. Anplis di sa, lò roun mouché ké so madanm ka jwenn problèm, pasé yé rékonnèt ki yé gen yépa rèsponsabilité annan sa épi chaché ranjé sa problèm-yan, détan yé ka akizé ròt-a. Yé ka di ki a di so fot. Lò a konsa, pitèt yé pouvé koumansé krè ki pou yé fin ké sa, a pou yé séparé ouben divòrsé. Mé ès sa ké vréman ranjé problèm-an b ? Annou wè èkzanp roun madanm tan-lontan ki té fidèl é ki soufri bokou akoz di so mari, mé ki pa lésé tonbé.

9. Ki sitiasyon ki té rèd Abigayil viv ?

⁹ Èkzanp-a annan Labib. Abigayil té maryé ké Nabal. Labib ka di ki a té roun mouché ki té rèd é ki té ka fè mové bagaj (1 Sam. 25:3). Sa pa té divèt fasil pou Abigayil viv ké roun mouché konsa. Ès i té pouvé fin ké sa maryaj-a fasilman ? Wi, lò David, ki té divèt divini rwa Israyèl, té lé tchwé so mari paské i té jouré ni li ni wonm-yan ki té ka maché ké l’ (1 Sam. 25:9-13). Abigayil té pouvé  chapé épi lésé David fè so zafè. Mé pasé i fè sa, i rivé fè David chanjé lidé pou i pa tchwé so mari (1 Sam. 25:23-27). Poukisa i fè sa ?

10. Poukisa Abigayil pa chaché fin ké so maryaj ki pa té ka maché ?

¹⁰ Abigayil té kontan Jéova é i té ka wè maryaj-a kou Jéova ka wè l’. I té divèt savé sa i té di Adan ké Èv lò i té maryé yé (Gen. 2:24). É i té savé ki maryaj-a sakré pou li. Kou i té lé fè l’ plézi, i fè tousa i té pouvé pou sové so fanmi ké so sèrvitèr-ya é donk so mari osi. I aji vitman pou anpéché David tchwé l’. I té paré osi pou doumandé pardon pou roun bagaj i pa té fè. Asiré, Jéova té kontan sa madanm-an ki té gen kouraj é ki pa té ka gadé pou so pròp kò. Kisa mouché ké madanm pouvé anprann gras a so èkzanp ?

11. a) Kisa Jéova lé moun maryé fè ? (Éphésiens 5:33). b) Kisa sa Carmen fè pou sové so maryaj ka anprann to ? (gadé zimaj-a osi).

¹¹ Sa sa ka anprann nou. Jéova lé moun maryé rèspèkté promès yé fè jou yé maryé-a menm si sa rèd pou yé viv ké yé mouché ouben yé madanm. I divèt byen kontan wè dé moun maryé fè éfòr pou réglé problèm yé ka jwenn, pou kontan yé konpanyen san yé pa gadé pou yépa entérè é pou yé rèspèkté yé konpanyen (li Éphésiens 5:33). Annou palé di Carmen. I maryé épi apéprè sis lannen apré, i koumansé étidyé Labib ké Témwen Jéova-ya. Apré sa, i batizé. I ka di : « Mo mari pa pran sa menm. I vin jalou Jéova. I té ka jouré mo é i té ka di ki i té ké lésé mo. » Magré sa, Carmen pa lésé tonbé. Pannan 50 lannen, i fè bokou éfòr pou kontan épi rèspèkté so mari. I ka di osi : « Piti piti, mo fè bokou éfòr pou konprann kouman mo mari té ka santi so kò é pou palé ké li jantiman. Mo fè tousa mo té pouvé pou nou rété maryé paské mo savé ki maryaj-a sakré pou Jéova. É kou mo kontan mo Bondjé, mo pa janmen lésé tonbé c. » Si to ka jwenn problèm ké to mouché ouben ké to madanm, to pouvé sir ki Jéova ké idé to pa lésé tonbé.

KONTINYÉ RÉTÉ FIDÈL SI TO FÈ ROUN PÉCHÉ KI GRAV

12. Si nou ka fè roun péché ki grav, kisa nou pouvé rousanti é ki pouvé fè nou soufri ?

¹² Problèm-an. Si to fè roun péché ki grav, pitèt to pouvé krè ki to pa bon ankò. Labib ka di ki lò nou ka péché nou  pouvé santi nou kò « krazé nèt » (Ps. 51:17). Pannan lontan, roun frè yé k’aplé Benjamin fè bokou éfòr pou i divini asistan. Malérèzman, lò i divini asistan, i fè roun péché ki té grav. I randé so kò kont ki i té trayi Jéova. I ka di : « Rounsèl kou, mo konsyans koumansé bat mo bokou. Mo santi mo kò mal, mal, mal. Mo pléré, mo priyè Jéova. Mo té krè ki i pa té ké janmen kouté mo ankò. Poukisa i té ké kouté mo ? Mo té lésé l’ tonbé. » Si to fè roun péché ki grav, pitèt to pouvé pansé ki to pa vo anyen ankò paské to tchò ki krazé pouvé fè to krè ki a konsa Jéova ka wè to (Ps. 38:4). Si sa ka rivé to, réfléchi asou èkzanp Pyèr, roun mouché ki té fidèl é ki kontinyé adoré Jéova menm lò i fè roun péché ki té grav.

13. Ki péché Pyèr fè ki té grav, é poukisa i fè sa péché-a ?

¹³ Èkzanp-a annan Labib. Lannwit anvan yé tchwé Jézi, Pyèr fè plizyèr fot ki fè l’ fè péché-a ki té pi grav annan so lavi. Pou koumansé, i fè so kò konfyans tro bokou. I di ki menm si ròt apot-ya té ka lésé Jézi tonbé, li menm i té ké rété fidèl (Marc 14:27-29). Pita, annan jarden Jètsémani-a, i pa rivé véyé ; i pran somèy plizyèr fwa (Marc 14:32, 37-41). Apré sa, lò roun patché moun vini arété Jézi, i lésé l’ tonbé (Marc 14:50). Pou fini, trwa fwa i di i pa té konnèt Jézi. I jis di « janmen Bondjé, mo pa konnèt li ! » (Marc 14:66-71). Kouman Pyèr réyaji lò i randé so kò kont ki sa i té fè té grav ? I koumansé pléré gro pléré, pitèt paské so konsyans té ka bat li, i té ka santi so kò koupab (Marc 14:72). Imajiné kouman i té divèt angwasé lò yé tchwé so zanmi Jézi roun ti moso tan apré. I té divèt byen ronté !

14. Kisa ki idé Pyèr kontinyé adoré Jéova ? (gadé zimaj-a anlè).

¹⁴ Mé plizyèr bagaj idé Pyèr kontinyé adoré Jéova. I pa rété li rounso, i alé jwenn so frè-ya é yé ankourajé l’ (Luc 24:33). Anplis di sa, Jézi parèt douvan li apré so rézirèksyon. A té dèt pou ankourajé l’ (Luc 24:34 ; 1 Cor. 15:5). É apré sa, pasé i fè l’ répròch, i èspliké l’ ki i té ké bay li roun patché rèsponsabilité (Jean 21:15-17). Pyèr té savé ki i té péché é ki sa i té fè té grav. Mé i pa té ka wè so kò kou roun moun ki pa té vo anyen. Poukisa ? Paské i té sir ki a pa konsa so Mèt Jézi té ka wè l’. Anplis di sa, so frè-ya annan asanblé-a idé l’. Kisa sa ki rivé l’ ka anprann nou ?

15. Di kisa Jéova lé nou sir ? (Psaume 86:5 ; Romains 8:38, 39 ; gadé zimaj-a osi).

 ¹⁵ Sa sa ka anprann nou. Jéova lé nou sir ki i kontan nou é ki i paré pou pardonnen nou (li Psaume 86:5 ; Romains 8:38, 39). Lò nou ka péché, nou ka santi nou kò koupab. Sa nòrmal é a roun bon bagaj. Parkont, a pa pou nou krè ki nou tro mové pou Bondjé kontan nou é pou i pardonnen nou. A pou nou pito chaché roun moun idé nou lanmenm. Benjamin nou palé talò ka èspliké : « Mo fè roun péché paské mo konté asou mo pròp fòrs pou mo tchenbé douvan roun tantasyon. » Apré sa, i konprann ki i té divèt alé palé pou ansyen-yan. I ka di : « Lò mo palé ké ansyen-yan, lanmenm mo santi ki Jéova té ka sèrvi yé pou montré mo ki i té kontan mo. Yé pa lésé mo tonbé é sa yé di mo pèrmèt mo sir ki Jéova pa té lésé mo tonbé non plis. » Nou menm osi, a pou nou sir ki Jéova kontan nou bokou é ki i ka pardonnen nou lò nou ka répanti, lò nou ka chaché roun moun idé nou é lò nou ka vréman fè tousa nou pouvé pou nou pa roufè menm péché-a (1 Jean 1:8, 9). Si nou sir di sa, menm si nou ka bité ouben nou ka tonbé, nou pa ké arété adoré nou Bondjé.

16. Poukisa to byen désidé kontinyé adoré Jéova ?

¹⁶ Jéova kontan bokou lò i ka wè nou ka fè éfòr pou nou adoré l’ pannan sa dèrnyé jou-ya ki rèd. Gras a li, nou pouvé kontinyé rété fidèl menm si nou ka jwenn problèm. Nou pouvé kontinyé kontan nou frè ké sò-ya épi pardonnen yé lò yé ka fè nou lapenn. Nou pouvé fè tousa nou pouvé pou nou ranjé problèm nou gen ké nou mouché ouben ké nou madanm pou montré kouman nou kontan Jéova é kouman nou ka rèspèkté maryaj-a ki sakré. É si nou ka fè roun péché, nou pouvé chaché Jéova idé nou, nou pouvé asèpté so lanmou, so pardon épi kontinyé adoré l’. A pou nou sir ki i ké béni nou bokou si nou pa ka « arété fè sa ki bon » (Gal. 6:9).