ARTIK POU ÉTIDYÉ 19
KANTIK 6 « Les cieux proclament la gloire de Dieu »
Imité zanj-ya ki fidèl
« Louwé Jéova, zòt, tout so zanj-ya » (PS. 103:20).
SA NOU KÉ ANPRANN
Nou ké wè sa zanj-ya ki fidèl ka anprann nou.
1-2. a) Poukisa nou diféran di zanj-ya ? b) Poukisa nou ka sanblé zanj-ya ?
LÒ JÉOVA fè to vini annan lavérité, i envité to annan so fanmi ki plen ké lanmou é ki ka adoré l’. Annan sa fanmi-a, i gen roun patché frè ké sò asou tout latè-a é i gen milyon zanj osi (Dan. 7:9, 10). Lò nou ka sonjé zanj-ya, prémyé bagaj nou ka wè, a ki yé pa kou nou. Nou pouvé di sa pas Bondjé fè yé anvan nou (Job 38:4, 7). Yé lontan pi fò pasé nou. É kou nou pa parfè, nou pa pouvé ni sen ni jis kou yé (Luc 9:26).
2 Mé i gen bagaj zanj-ya ka fè nou pouvé fè osi. Parèkzanp, yé ka imité bèl kalité Jéova gen é nou menm osi nou pouvé fè l’. Yé gen drwa désidé sa yé lé fè. Nou menm osi, Bondjé bay nou sa drwa-a. Yé chak gen yépa non ké yépa pèrsonalité é a menm bagaj-a pou nou. Jéova ka ba yé plizyèr rèsponsabilité. Nou menm osi, i ka bay nou plizyèr bagaj pou fè. Épi kou yé menm, nou bézwen adoré Sa-la ki fè nou-a (1 Pierre 1:12).
3. Kisa zanj-ya pouvé anprann nou ?
3 Kou i gen patché bagaj ka fè ki nou ka sanblé zanj-ya, yé èkzanp pouvé ankourajé nou é nou pouvé anprann roun patché bagaj grasa yé. Sa artik-a ké montré nou kisa zanj-ya pouvé anprann nou. Nou ké wè kouman nou pouvé imité fason yé ka fè yé kò toupiti, yé lanmou pou moun-yan, fason yé ka tchenbé rèd épi balan yé gen pou fè asanblé-a rété pròp.
ZANJ-YA KA FÈ YÉ KÒ TOUPITI
4. a) Kisa ka montré ki zanj-ya ka fè yé kò toupiti ? b) Poukisa zanj-ya ka fè yé kò toupiti ? (Psaume 89:7).
4 Zanj-ya ki fidèl ka fè yé kò toupiti. Menmsi yé gen bokou èspéryans ké sajès é menmsi yé fò toubonnman, yé ka fè sa Jéova ka di yé fè (Ps. 103:20). Lò yé ka fè sa Jéova ka doumandé yé fè, yé pa ka gonflé yé lèstomak é yé pa ka sèrvi pwisans yé gen pou fè moun wè. Yé kontan fè sa Jéova ka doumandé yé, menmsi pyès moun pa konnèt yé non a (Gen. 32:24, 29 ; 2 Rois 19:35). É yé pa ka asèpté pyès moun ba yé lònò Jéova rounso mérité. Poukisa yé ka fè yé kò toupiti konsa ? Paské yé kontan Jéova é yé gen bokou rèspè pou li (li Psaume 89:7).
5. Kouman roun zanj montré ki i pa té ka fè ròklò lò i rouprann Jan ? (gadé zimaj-a osi).
5 Annou wè roun èkzanp annan Labib ki ka montré ki zanj-ya ka fè yé kò toupiti. Bò d’ 96 di nou lépòk, roun zanj, nou pa konnèt so non, bay apot Jan roun vizyon (Rév. 1:1). Sa Jan wè-a té tèlman fò ki i té lé adoré zanj-a. Mé lanmenm, sa zanj-a ki té fidèl anpéché l’ fè sa. I di li : « Panga ! Pa fè sa ! Mo sa roun èsklav kou to menm é kou to frè-ya […]. Adoré Bondjé ! » (Rév. 19:10). Sa zanj-a té ka fè so kò toupiti vré ! I pa té lé moun bay li lònò ouben admiré l’. Lanmenm, i di Jan adoré Jéova. Mé i pa méprizé apot-a. Menmsi i té ka adoré Jéova dipi pi lontan pasé li é ki i té lontan pi fò pasé li, i pa fè ròklò, i di li ki i té sa roun èsklav kou li menm. É menmsi i té gen pou rouprann li, i pa palé rèd ké li. I té janti. I konprann ki sa sa granmoun-an té wè té fè l’ rété èstébékwé é a pou sa i té réyaji konsa.
Zanj-a palé ké Jan jantiman (gadé paragraf 5).
6. Kouman nou pouvé imité zanj-ya ki ka fè yé kò toupiti ?
6 Kouman nou pouvé imité fason zanj-ya ka fè yé kò toupiti ? Kou yé, nou pouvé fè sa yé ka doumandé nou fè san nou pa gonflé nou lèstomak é san nou pa chaché moun-yan poté nou anlè pou sa nou ka fè (1 Cor. 4:7). Anplis di sa, nou pa divèt krè ki nou pi enpòrtan pasé ròt-ya, menmsi nou ka adoré Jéova dipi pi lontan ouben yé bay nou sèrten rèsponsabilité. Anfèt, pi nou gen rèsponsabilité, pi nou divèt wè nou kò kou dé moun ki pa anyen (Luc 9:48). Kou zanj-ya, a sèrvi nou lé sèrvi ròt-ya, nou pa lé yé poté nou anlè.
7. Lò nou ka bay roun moun roun konsèy ouben lò nou ka korijé l’, kouman nou pouvé montré ki nou pa ka fè ròklò ?
7 Lò nou ka rouprann roun moun, ki a rounòt krétyen ki a nou timoun, ouben lò nou ka bay li roun konsèy, nou pa divèt fè ròklò. Détan, nou ké divèt palé franchman ké moun-an lò nou ké bay li sa konsèy-a ouben lò nou ké rouprann li. Mé kou zanj-a ki rouprann Jan jantiman, menmsi nou ké divèt palé franchman ké roun moun, a pa pou so dé bra kasé lò nou fini palé ké li. Si nou pa ka fè ròklò, nou ké pran tout konsèy nou ké bay ròt-ya annan Labib. É nou ké bay moun konsèy roun fason ka montré ki nou ka rèspèkté yé é ki nou kontan yé (Col. 4:6).
ZANJ-YA KONTAN MOUN-YAN
8. a) Kouman Luc 15:10 ka montré ki zanj-ya kontan moun-yan ? b) Kouman zanj-ya ka idé nou lò nou ka préché ? (gadé zimaj-ya ).
8 Zanj-ya kontan moun-yan bokou. Yé ka fè lafèt lò roun moun ki fè roun péché ki grav ka répanti ouben lò roun moun ki té arété adoré Jéova ka rouvini òbò li. Yé ka fè lafèt osi lò roun moun ka anprann konnèt Jéova é ka chanjé bagaj annan so lavi pou adoré l’ (li Luc 15:10). Anplis di sa, yé ka idé nou lò nou ka préché (Rév. 14:6). Menmsi a pa yé k’alé préché bay moun, yé pouvé gidé roun proklamatèr pou i rivé jwenn roun moun ki lé anprann konnèt Jéova. A vré, nou pa pouvé sir ki a zanj-ya menm ki fè nou jwenn roun moun èspésyalman. Jéova pouvé sèrvi ròt bagaj pou idé moun-yan ouben pou gidé so sèrvitèr-ya, parèkzanp i pouvé sèrvi so lèspri sen (Actes 16:6, 7). Mé, souvan, a zanj-ya i ka sèrvi. Donk, nou pouvé sir ki lò nou ka préché bon nouvèl-a, zanj-ya la pou idé nou (gadé karé-a « I tandé yé lapriyè b »).
Roun frè ké so madanm fin préché ké roun prézantwar. Toupannan yé ka rantré a yé kaz, sò-a ka wè roun madanm ki tris. I ka santi i divèt palé ké sa madanm-an pou ankourajé l’ é i sir ki zanj-ya pouvé idé l’ jwenn moun ki bézwen konnèt Bondjé (gadé paragraf 8).
9. Kouman nou pouvé imité lanmou zanj-ya gen pou moun-yan ?
9 Kouman nou pouvé imité lanmou zanj-ya gen pou moun-yan ? Lò nou ka anprann ki yé roumété roun moun annan asanblé-a, annou fè lafèt kou zanj-ya. Annou rousouvwè moun-an ké tchò kontan é annou di li ki nou kontan li (Luc 15:4-7 ; 2 Cor. 2:6-8). Nou ké imité zanj-ya osi si nou ka préché ké tout nou tchò (Eccl. 11:6). É menm fason zanj-ya ka idé nou lò nou ka préché, annou gadé kouman nou pouvé idé nou konpanyen pou yé préché. Parèkzanp, nou pouvé propozé roun proklamatèr ki pa gen èspéryans, préché ké nou. Ouben nou pouvé idé frè ké sò-ya ki ja granmoun ouben sa-ya ki andikapé pou yé préché.
10. Kisa èkzanp Sara ka anprann nou ?
10 É si nou sitiasyon pa ka pèrmèt nou fè tousa nou té ké lé pou Jéova ? Nou pouvé sir ki zanj-ya ké idé nou préché kanmenm. Annou palé di Sara c, roun sò ki ka rété an End. I té pyonyé pèrmanan dipi pasé 20 lannen lò i tonbé malad. Dipi sa jou-a, i kouché annan so lit. Pannan roun tan, i té dékourajé menm. Mé frè ké sò-ya idé l’ é i pa janmen arété li Labib. Konsa, piti piti so tchò viré kontan. I té blijé fè ké so nouvo sitiasyon. Kou i pa té pouvé asiz pou ékri lèt, a té ké téléfonn rounso i té pouvé préché. Donk, a ké téléfonn i té ka jwenn moun é yé té ka bay li niméro ròt moun ki pitèt té ké lé étidyé Labib. Kisa sa bay ? Apré déztrwa mwa rounso, i koumansé 70 léson biblik ! I pa té pouvé étidyé Labib ké sa patché moun-yan donk, i doumandé plizyèr frè ké sò annan so asanblé étidyé ké roun ran annan yé. Jòdla, roun patché moun annan sa-ya ki ka étidyé ka vini annan réinyon-yan. Zanj-ya dèt byen kontan travay ansanm ké frè ké sò kou Sara ki ka fè tousa yé pouvé pou préché !
ZANJ-YA KA TCHENBÉ RÈD
11. Poukisa nou ka di ki zanj-ya ki fidèl ka bay nou roun bèl èkzanp annan zafè tchenbé rèd ?
11 Zanj-ya ki fidèl ka bay roun bèl èkzanp annan zafè tchenbé rèd. Dipi nanninannan yé ka wè moun soufri é yé menm yé ka sipòrté tout kalité méchansté. Yé wè Satan ké roun patché ròt zanj ki té ka adoré Jéova ansanm ké yé, tounen yé do bay li (Gen. 3:1 ; 6:1, 2 ; Jude 6). Labib ka di ki roun démon ki pwisan briga ké roun zanj fidèl pannan plizyèr jou (Dan. 10:13). Épi dipi lépòk Adan ké Èv, zanj-ya pa wè bokou moun chwazi adoré Jéova. Magré sa, yé ka kontinyé adoré Jéova ké tchò kontan épi ké balan. Yé sir ki, lò moman-an ké rivé, Jéova ké fè tout méchansté disparèt.
12. Kisa ki pouvé idé nou tchenbé rèd ?
12 Kouman nou pouvé imité zanj-ya annan zafè tchenbé rèd ? Kou zanj-ya, pitèt nou ka wè moun ka soufri ouben moun ka baré nou chimen. Mé kou yé menm osi, nou sir ki titalò Jéova ké fini ké méchansté-a. A pou sa, kou yé, nou ‘pa ka arété fè sa ki bon’ (Gal. 6:9). Anplis di sa, Jéova ka promèt nou ki i ké idé nou tchenbé (1 Cor. 10:13). Donk, annou doumandé li so lèspri sen. Paské grasa so lèspri, nou ké gen plis pasyans é nou tchò ké kontan (Gal. 5:22 ; Col. 1:11). É si moun ka baré nou chimen, annou fè Jéova konfyans é annou pa pè. I ké toujou idé nou é i ké toujou bay nou fòrs (Héb. 13:6).
ZANJ-YA KA TRAVAY RÈD POU FÈ ASANBLÉ-A RÉTÉ PRÒP
13. Ki travay enpòrtan zanj-ya gen pou fè pannan dèrnyé jou-ya ? (Matthieu 13:47-49).
13 Jéova bay zanj-ya roun travay enpòrtan pou yé fè pannan dèrnyé jou-ya (li Matthieu 13:47-49). Grasa prédikasyon-an, roun patché moun anvi tandé bon nouvèl-a. Roun ran annan yé ka chanjé pou yé lavi alé ké sa Jéova lé. Mé rounòt ran pa ka chanjé pyès. Sa zanj-ya gen pou fè, a « mété moun ki méchan asou roun bò é moun ki jis asou rounòt bò ». Donk, yé travay, a fè sa ki fo pou asanblé-a rété pròp. Sa pa lé di ki i pa ké janmen gen problèm annan asanblé-a ni ki tout sa ki arété frékanté asanblé-a pa ké janmen pouvé rouvini. Mé nou pouvé sir ki zanj-ya ka protéjé tout asanblé-ya pou yé rété pròp.
14-15. Kouman nou pouvé imité zanj-ya ki ka travay rèd pou asanblé-a rété pròp ? (gadé zimaj-ya osi).
14 Kouman nou pouvé imité zanj-ya ki ka travay rèd pou fè asanblé-a rété pròp ? Nou divèt travay rèd pou nou protéjé nou lanmityé ké Jéova. Nou pouvé fè sa, si nou ka chwazi zanmi ki kontan li é si nou ka rété lwen di tousa ki pouvé gaté nou lanmityé ké li. A konsa nou ké fè sa ki fo pou asanblé-a rété pròp (Ps. 101:3). Annou fè sa ki fo osi pou idé nou frè ké sò rété fidèl ké Jéova. Parèkzanp, kisa nou divèt fè si nou ka vin savé ki roun di nou frè ouben di nou sò fè roun péché ki grav ? Kou nou kontan li, nou divèt ankourajé l’ alé palé ké ansyen-yan. É si i pa ka fè l’, a nou ki divèt alé di ansyen-yan sa ki rivé. Nou lé yé idé nou frè ké sò ki gaté yé lanmityé ké Jéova. Yé bézwen yé idé yé vitman ! (Jacq. 5:14, 15).
15 Malérèzman, i gen sa ka fè péché ki grav é yé blijé tiré yé annan asanblé-a. Lò sa ka rivé, nou ka fè sa Labib ka di nou fè, ‘nou pa ka frékanté yé ankò’ d (1 Cor. 5:9-13). Lò yé ka tiré roun moun annan asanblé-a, sa ka pèrmèt asanblé-a rété pròp. Anplis di sa, lò nou ka arété frékanté sa-ya yé tiré annan asanblé-a, nou ka montré yé ki nou kontan yé. Sa pouvé idé yé randé yé kò kont ki yé bézwen rouvin òbò Jéova. É lò yé ka rouvin, nou kontan kou Jéova ké so zanj (Luc 15:7).
Kisa nou divèt fè si nou ka vin savé ki roun di nou frè ouben di nou sò fè roun péché ki grav ? (gadé paragraf 14). e
16. Ki bèl kalité zanj-ya gen to lé imité ?
16 Jéova ka bay nou roun bèl lònò : i ka pèrmèt nou savé sa ki ka pasé annan syèl-a épi i ka pèrmèt nou travay ansanm ké zanj-ya ! Annou imité bèl kalité zanj-ya gen : yé ka fè yé kò toupiti, yé kontan moun-yan, yé ka tchenbé rèd é yé gen balan lò yé ka travay pou asanblé-a rété pròp. Si nou ka imité zanj-ya ki fidèl, nou menm osi nou ké toujou fè parti di fanmi Jéova ki ka adoré l’.
KANTIK 123 Fidèlement soumis à l’ordre théocratique
a A pa ti zanj i gen annan syèl-a, pourtan Labib ka bay non dé zanj rounso, Michèl ké Gabriyèl (Dan. 12:1 ; Luc 1:19).
b To ké jwenn ròt témwanyaj annan Index des publications des Témoins de Jéhovah, annan parti « direction angélique (exemples) » annan parti « Anges ».
c Yé chanjé non-an.
d Kou nou wè l’ annan Nouvèl di Kolèj santral no 2 pou 2024-a, si roun moun yé tiré annan asanblé-a ka vini annan roun réinyon, roun proklamatèr pouvé désidé di l’ roun ti bonjou é di l’ ki i kontan wè l’, si so konsyans ka pèrmèt li fè l’.
e MEN SA NOU KA WÈ ASOU ZIMAJ-YA : Roun sò ka ankourajé so zanmi alé palé ké ansyen-yan. Roun tibi tan apré sa, kou so zanmi pa alé wè ansyen-yan, sò-a li menm k’alé di ansyen-yan sa ki pasé.
