ARTIK POU ÉTIDYÉ 29
KANTIK 121 Apprenons la maîtrise de soi
Panga pou to pa tonbé annan tantasyon-an
« Véyé épi priyè toulong pou zòt pa tonbé annan tantasyon-an » (MAT. 26:41).
SA NOU KÉ ANPRANN
Sa artik-a ké fè nou sonjé ki nou divèt fè tousa nou pouvé pou nou pa péché. Nou ké wè osi ki nou divèt panga pou nou pa pran roun chimen ki pouvé fè nou fè roun péché ki grav.
1-2. a) Ki konsèy Jézi bay so disip ? b) Poukisa disip-ya lésé Jézi tonbé ? (gadé zimaj-ya osi).
« LÈSPRI-a lé fè bokou bagaj, mé lachè-a li menm, i fèb a » (Mat. 26:41b). Lò Jézi di sa, i té ka montré ki i té ka konprann ki, kou nou pa parfè, nou ka fè bagaj ki pa bon. Mé i té lé avèrti nou osi : nou pa divèt krè ki nou ké toujou fò asé pou nou fè sa ki drèt. Roun ti moso tan anvan Jézi di sa, so disip té promèt li ki yé pa té ké janmen lésé l’ tonbé (Mat. 26:35). Yé té anvi fè bon bagaj. Mé yé pa té ka randé yé kò kont ki anba présyon-an, yé té pouvé tonbé vitman. Donk, Jézi bay yé sa konsèy-a : « Véyé épi priyè toulong pou zòt pa tonbé annan tantasyon-an » (Mat. 26:41a).
2 Malérèzman, disip-ya pa véyé. Lò yé arété Jézi, kisa yé fè ? Ès yé rété ké li ouben ès yé pran pè épi yé pran kouri ? Enben, kou yé pa véyé, disip-ya fè èkzaktéman sa yé té di ki yé pa té ké fè : yé lésé Jézi tonbé (Mat. 26:56).
Jézi di so disip véyé épi panga pou yé pa tonbé annan tantasyon-an, mé yé tout lésé l’ tonbé (gadé paragraf 1-2).
3. a) Pou nou rété fidèl ké Jéova, poukisa nou pa divèt krè ki nou ké toujou fò asé pou nou pa fè mové bagaj ? b) Di kisa nou ké palé annan sa artik-a ?
3 Nou pa pouvé krè ki nou ké toujou fò asé pou nou fè sa ki drèt. A vré, nou byen désidé pa fè pyès bagaj ki ké fè Jéova lapenn. Mé nou pa parfè é nou pouvé tonbé annan tantasyon-an fasilman (Rom. 5:12 ; 7: 21-23). Détan, san nou pa menm randé nou kò kont, nou pouvé pri annan roun sitiasyon ki pouvé bay nou anvi fè roun mové bagaj. Pou nou rété fidèl ké Jéova ké so Pitit, nou divèt swiv konsèy Jézi bay nou, nou divèt kontinyé véyé pou nou pa tanté. Sa artik-a ké idé nou fè sa. Pou koumansé, nou ké wè annan ki kalité sitiasyon nou divèt panga èspésyalman. Apré sa, nou ké wè kisa nou pouvé fè pou nou pa mété nou kò annan pyès sitiasyon ki pouvé tanté nou. Pou fini, nou ké wè kisa nou pouvé fè pou nou kontinyé panga.
ANNAN KI KALITÉ SITIASYON TO DIVÈT PANGA ?
4-5. Menmsi roun péché mwen grav pasé rounòt, poukisa sa enpòrtan pou nou pa tonbé annan l’ ?
4 Menmsi roun péché mwen grav pasé rounòt, i pouvé gaté nou lanmityé ké Jéova. Anplis di sa, i pouvé mété nou asou roun chimen ki ké fè nou fè roun péché ki pi grav ankò.
5 Nou tout pouvé anvi fè mové bagaj. Mé nou chak gen noupa féblès. Sa lé di ki i gen sèrten bagaj èspésyalman ki pouvé fè nou tonbé fasilman. Parèkzanp, i gen moun ka briga pou yé pa tonbé annan imoralité sèksyèl-a. Ròt moun ka briga pou yé pa fè bagaj ki pa pròp kou masturbation-an ouben gadé pòrnografi. Épi i gen ròt ankò ka briga pou yé pa kòlè, pou yé pa krè yé kò, pou zafè pè moun pa anpéché yé fè sa ki drèt ouben ròt bagaj ankò. Kou Jak di l’, « chak moun ka mété so kò anba éprèv lò i ka lésé so pròp anvi mennen l’ ké tanté li » (Jacq. 1:14).
6. Kisa nou pa divèt bliyé ?
6 Ès to savé annan ki sitiasyon sa pi fasil pou to fè roun mové bagaj ? Pa fè kousidiré to pa gen féblès é pa di annan to tchò ki to pa ké janmen péché, sa danjéré ! (1 Jean 1:8). Pa bliyé ki Pòl di ki menm sa-ya « ki adòk » pouvé tonbé annan tantasyon-an si yé pa ka panga (Gal. 6:1). A pou nou onèt ké nou pròp kò é a pou nou rékonnèt ki i gen sèrten bagaj èspésyalman ki pouvé fè nou tonbé fasilman (2 Cor. 13:5).
7. Ki bagaj nou divèt véyé èspésyalman ? Bay roun èkzanp.
7 Lò nou ka konprann sa ki ka bay nou plis anvi fè roun mové bagaj, kisa nou divèt fè ? A pou nou travay rèd pou nou gen plis fòrs pou nou tchenbé douvan sa tantasyon-yan ! Annou pran roun èkzanp. Annan lépòk Labib, koté ki té pi fasil pou ataké miray roun vil, a té so lapòt. A pou sa yé té ka mété moun pou véyé sa lapòt-ya. Menm fason-an, pou nou gen plis fòrs pou nou tchenbé douvan tantasyon-an, nou divèt véyé èspésyalman sa ki ka bay nou anvi fè roun mové bagaj (1 Cor. 9:27).
SA TO POUVÉ FÈ POU TO PA MÉTÉ TO KÒ ANNAN PYÈS SITIASYON KI POUVÉ TANTÉ TO
8-9. Kouman jennjan-an yé ka palé annan Proverbes chapit 7 té pouvé évité fè roun péché ki té grav ? (Proverbes 7:8, 9, 13, 14, 21).
8 Kisa nou pouvé fè pou nou pa péché ? Gadé sa jennjan-an yé ka palé annan Proverbes chapit 7 ka anprann nou. I kouché ké roun fanm ki té ka mennen roun vyé lavi. Vèrsé 22-a ka di nou ki sa jennjan-an swiv sa madanm-an « rounsèl kou » konsa. Mé vèrsé-ya ki anvan ka anprann nou ki anvan sa, i fè plizyèr bagaj ki mété l’, piti piti, asou chimen péché-a.
9 Kisa ki fè jennjan-an péché ? Pou koumansé, lò soukou té ka tonbé, « i pasé òbò kwen lari sa fanm-an [ki té ka mennen roun vyé lavi] ». Apré sa, i maché annan dirèksyon so kaz (li Proverbes 7:8, 9). Épi lò i wè madanm-an, i pa bay viré. Pasé sa, i lésé l’ bo l’ é i rété la ka kouté l’ palé di sakrifis lapè i té ofri. Pitèt madanm-an té ka di li sa pou fè l’ krè ki i té sa roun bon moun (li Proverbes 7:13, 14, 21). Si sa jennjan-an pa té chaché panyen, panyen pa té ké kouvri l’, i pa té ké tonbé annan tantasyon-an.
10. Jòdla, kouman roun moun pouvé fè menm bétiz ké jennjan-an yé ka palé annan Proverbes ?
10 Sa istwè-a ka montré nou sa ki pouvé rivé nenpòrt ki sèrvitèr Jéova. I pouvé fè roun péché ki grav épi apré sa, i pouvé krè ki sa rivé l’ « rounsèl kou » konsa. Ouben i pouvé di : « Mo pa savé kouman sa rivé mo. » Mé, si i ka pran tan réfléchi asou sa ki rivé l’, i ké randé so kò kont ki i pran plizyèr mové désizyon anvan i fè sa péché-a. Pitèt i maché ké moun ki pa kontan Jéova, ouben pitèt i chwazi anmizman ki pa té bon, ouben i alé asou sit Entèrnèt ouben annan dé koté roun krétyen pa gen pou alé. Pitèt osi i arété priyè, i arété li Labib, alé annan réinyon-yan ouben préché. Kou jennjan-an nou palé annan Proverbes, i pa péché « rounsèl kou » konsa.
11. Kisa nou divèt fè pou nou pa tonbé annan péché-a ?
11 Kisa sa ka anprann nou ? A pa pou nou tonbé annan péché-a, mé a pa pou nou pran chimen péché-a non plis. A sa Salomon èspliké lò i di sa ki rivé jennjan-an ké fanm-an ki té ka mennen roun vyé lavi. I bay sa konsèy-a : « Pa [...] pran chimen sa fanm-an » (Prov. 7:25). Épi i di osi : « Rété lwen di li, pa alé bò d’ so kaz » (Prov. 5:3, 8). Pou nou pa péché, a pou nou « rété lwen » di tousa ki pouvé mété nou asou chimen péché-a b. Sa lé di ki menmsi roun bagaj pa mové pou roun krétyen, si nou savé ki sa bagaj-a ké bay nou anvi fè roun mové bagaj, nou pa ké fè l’ (Mat. 5:29, 30).
12. Ki désizyon Jòb pran, é kouman sa idé l’ pa tonbé annan tantasyon-an ? (Job 31:1).
12 Pou nou pa mété nou kò annan sitiasyon ki pouvé fè nou péché, nou divèt fè tousa ki fo pou protéjé nou kò. A sa Jòb fè. I ‘fè roun alyans ké so wéy’ pou i pa janmen gadé roun fanm ké anvi (li Job 31:1). Kou i té fè sa alyans-a, sa pèrmèt li pa janmen fè roun adiltèr. Nou menm osi, annou byen désidé pa fè pyès bagaj ki té ké pouvé bay nou anvi fè roun mové bagaj.
13. Poukisa sa enpòrtan pou nou véyé sa nou ka mété annan nou lidé ? (gadé zimaj-ya osi).
13 Nou divèt véyé sa nou ka mété annan nou lidé osi (Ex. 20:17). Roun ran ka pansé ki a pa anyen si yé ka imajiné yé kò ka fè mové bagaj dipi yé pa ka fè sa bagaj-ya. Mé a pa vré. Roun moun ki ka kontinyé réfléchi asou roun bagaj i anvi fè é ki pa bon, ka fè sa anvi-a vin pi fò. Lò i ka fè sa, sa pi rèd pou i tchenbé douvan sa tantasyon-an. A vré, détan, mové lidé ké vini annan nou tèt. Sa pou fè, a jité sa vyé lidé-ya lanmenm épi ranplasé yé ké bon lidé. Menm fason nou ka raché mové zèrb pou anpéché yé pousé, lò nou ka raché vyé lidé ka vini annan nou tèt, nou ka anpéché yé grandi épi fè nou fè roun péché ki grav (Phil. 4:8 ; Col. 3:2 ; Jacq. 1:13-15).
Nou divèt panga pou nou pa fè pyès bagaj ki pouvé fè nou tonbé annan tantasyon-an (gadé paragraf 13).
14. Pou nou pa tonbé annan tantasyon-an, di kisa nou divèt sir ?
14 Ki ròt bagaj nou pouvé fè pou nou pa tonbé annan tantasyon-an ? A pou nou sir ki obéyi koumannman Jéova toujou bon pou nou. Détan, sa pouvé rèd pou nou fè nou lidé ké sa nou anvi alé annan sans volonté Bondjé. Mé si nou ka kontinyé fè éfòr, nou tchò ké kontan menm !
15. Si to byen désidé fè sa ki drèt, poukisa sa ké idé to pa tonbé annan tantasyon-an ?
15 Nou divèt byen désidé fè sa ki drèt. Si to ka anprann « rayi sa ki mové é [...] kontan sa ki byen », to ké ankò pi désidé fè sa ki drèt é to pa ké mété to kò annan pyès sitiasyon ki pouvé fè to péché (Amos 5:15). Anplis di sa, si to byen désidé fè sa ki drèt, si to ka trouvé to kò annan roun sitiasyon ki danjéré é ki to pa té prévwè, to ké rété fò.
16. Si nou ka fè bagaj ki ka fè nou lanmou pou Jéova vin pi fò, kouman sa pouvé idé nou panga ? (gadé zimaj-ya osi).
16 Kisa nou pouvé fè pou nou byen désidé fè sa ki drèt ? A pou nou rété byen okipé ka fè bagaj ki ka fè nou lanmou pou Jéova vin pi fò. Lò nou annan nou réinyon-yan ouben lò nou ka préché, nou pa tanté fè sa ki mové. Pasé sa, nou ankò pi désidé fè Jéova plézi (Mat. 28:19, 20 ; Héb. 10:24, 25). Lò nou ka li ké étidyé Paròl Bondjé-a é lò nou ka pran tan réfléchi asou l’, sa ka pèrmèt nou kontan sa ki bon ankò plis épi rayi sa ki mové ankò plis (Jos. 1:8 ; Ps. 1:2, 3 ; 119:97, 101). Sonjé ki Jézi di so disip : « Priyè toulong pou zòt pa tanté » (Mat. 26:41). Lò nou ka priyè nou Papa ki annan syèl-a, nou ka bay li lokazyon idé nou pou nou ankò pi désidé fè l’ plézi (Jacq. 4:8).
Si nou gen labitid fè bagaj ki ka pèrmèt nou vin pi pròch ké Jéova sa ké idé nou pa tonbé annan tantasyon-an c (gadé paragraf 16).
KONTINYÉ PANGA
17. Ki féblès bay Pyèr problèm plizyèr fwa ?
17 Pitèt nou ké rivé fin ké roun ran féblès nèt. Mé pitèt nou ké divèt kontinyé briga ké rounòt ran féblès pannan lontan. Gadé èkzanp apot Pyèr. I di trwa fwa ki i pa té konnèt Jézi paské i té pè moun (Mat. 26:69-75). Mé lò i palé douvan Sanédren-an ké kouraj, yé té ké di ki i té fin ké sa zafè pè moun (Actes 5:27-29). Mé déztrwa lannen pita, kou i té « pè sa ki té sirkonsi-ya » i arété manjé ké krétyen-yan ki pa té jwif (Gal. 2:11, 12). So féblès té rouvini. Pitèt i pa janmen rivé fin ké sa zafè-a.
18. Menmsi nou ka pansé ki nou fin ké roun féblès, kisa nou divèt fè ?
18 Nou menm osi nou pouvé trouvé nou kò annan sa menm kalité sitiasyon-an. Kouman ? Détan, nou pouvé krè ki nou fin ké roun féblès mé nou divèt roukoumansé briga ké l’. Parèkzanp, men sa roun frè ka di : « Mo arété gadé pòrnografi pannan dis lannen, é mo té sir ki mo té fin ké sa problèm-an. Mé mo féblès té kou roun zannimo anrajé ki té ka séré é ki té ka antann bon moman-an pou ataké. » Érèzman, nou frè pa lésé tonbé. I konprann ki i té ké divèt briga chak jou pou i pa viré tonbé annan sa vyé labitid-a, é pitèt menm pannan tout so lavi annan sa sistèm-an. I fè plis bagaj ankò pou i pa viré tonbé annan pòrnografi-a, é so madanm ké ansyen-yan annan so asanblé idé li.
19. Kisa nou pouvé fè si nou pòkò rivé fin ké roun féblès ?
19 Si nou pòkò rivé fin ké roun féblès, kisa nou pouvé fè pou sa pa fè nou fè roun mové bagaj ? A pou nou swiv konsèy Jézi bay-a : « Véyé. » Menm lò nou ka santi ki nou fò, annou kontinyé fè tousa ki fo pou nou pa mété nou kò annan pyès sitiasyon ki pouvé tanté nou (1 Cor. 10:12). Épi si nou trapé bagaj ka maché é ka idé nou briga ké nou féblès, annou kontinyé fè yé. Proverbes 28:14 ka di : « Byennéré moun-an ki toujou ka panga » (2 Pierre 3:14).
TO KÉ TRAPÉ BÉNÉDIKSYON SI TO KA KONTINYÉ PANGA
20-21. a) Ki bénédiksyon nou ké jwenn si nou ka kontinyé panga pou nou pa tonbé annan tantasyon-an ? b) Si nou ka fè noupa, kisa Jéova ké fè pou nou ? (2 Corinthiens 4:7).
20 Nou pouvé sir ki si nou ka kontinyé panga pou nou pa tonbé annan tantasyon-an sa ké toujou bon pou nou. Pitèt nou ké « pran roun ti moman [...] plézi » si nou ka fè roun péché, mé si nou ka fè sa Jéova lé, nou tchò ké lontan pi kontan (Héb. 11:25 ; Ps. 19:8). Poukisa ? A paské Jéova fè nou pou nou fè sa i kontan (Gen. 1:27). Lò nou ka fè Jéova plézi, nou konsyans klè é nou gen èspwar viv pou tout-tan (1 Tim. 6:12 ; 2 Tim. 1:3 ; Jude 20, 21).
21 A vré, « lachè-a […] fèb ». Mé sa pa lé di ki nou pa pouvé fè anyen pou sa. Jéova paré pou bay nou fòrs nou bézwen (li 2 Corinthiens 4:7). Mé pa bliyé ki pwisans Bondjé ka bay to-a, a pwisans-a ki ka dépasé pwisans ki nòrmal-a. « Pwisans ki nòrmal-a » : a tout éfòr nou divèt fè touléjou pou nou pa tonbé annan tantasyon-an. Si nou ka fè noupa, nou pouvé sir ki Jéova ké réponn nou lapriyè, i ké bay nou plis fòrs lò nou ké bézwen (1 Cor. 10:13). Wi, grasa Jéova nou pouvé kontinyé panga pou nou pa tonbé annan tantasyon-an.
KANTIK 47 Prie Jéhovah chaque jour
a POU BYEN KONPRANN : Lò Jézi ka palé di « lèspri-a » annan Matthieu 26:41, i ka palé di sa ki ka pousé roun moun anvi fè bon bagaj. Lò i ka di « lachè-a », i lé di ki kou nou pa parfè, souvan, nou ka fè mové bagaj é nou gen mové lidé. Donk, détan, menmsi nou lé fè sa ki drèt, si nou pa ka panga, nou pouvé lésé mové anvi nou gen-an fè nou fè mové bagaj.
b Roun moun ki fè roun péché ki grav pouvé trapé bon konsèy annan liv Viv ké tchò kontan pou tout-tan !, léson 57, pwen 1-3 ké artik « “Gadé drèt douvan to”, sa ki ka vin dimen » annan Tourdégard novanm 2020, p. 27-29, § 12-17.
c MEN SA NOU KA WÈ ASOU ZIMAJ-YA : Roun frè ka li tèks pou koumansé lajournen-an, i ka li Labib pannan poz doujnen-an é i k’alé annan réinyon-an ki ka fèt pannan simenn-an, oswè.
