ARTIK POU ÉTIDYÉ 30
KANTIK 36 « Préservons nos coeurs »
Kisa rwa Israyèl-ya pouvé anprann nou ?
« Zòt ké wè ankò diférans ant roun moun ki jis ké roun moun ki méchan, ant roun moun ki ka adoré Bondjé ké roun moun ki pa ka adoré l’ » (MAL. 3:18).
SA NOU KÉ ANPRANN
Nou ké wè sa Jéova té ka gadé pou jijé rwa Israyèl-ya. Sa ké idé nou konprann sa i ka gadé koté sa-ya ki ka adoré l’ jòdla.
1-2. Kisa Labib ka di asou sèrten rwa Israyèl ?
LABIB ka bay non pasé 40 mouché ki té rwa asou Israyèl a. É i pa ka séré sa sèrten annan yé fè. Parèkzanp, i ka di nou ki menm rwa-ya ki té bon, péché. Men sa Jéova di asou David ki té sa roun bon rwa : « Mo sèrvitèr David […] adoré mo ké tout so tchò [é i] fè sa mo té kontan rounso » (1 Rois 14:8). Pourtan, sa mouché-a kouché ké roun madanm ki té maryé, é i fè roun kout gaya pou so mari mouri pannan roun lagèr (2 Sam. 11:4, 14, 15).
2 Labib ka di osi ki roun patché rwa ki pa té fidèl fè bon bagaj. Annou wè èkzanp Roboam. Pou Jéova, i « fè sa ki té mové » (2 Chron. 12:14). Pourtan, i obéyi lòrd Jéova té bay li, i lésé dis ti nasyon Israyèl-ya fè rounòt rwayonm. I fòrtifyé vil-ya annan so rwayonm osi pou protéjé pèp Bondjé-a kont yé lèlmi (1 Rois 12:21- 24 ; 2 Chron. 11:5-12).
3. Kisa nou ké wè annan sa artik-a ?
3 Donk, si tout rwa Israyèl fè bon ké mové bagaj, kisa Jéova gadé pou i di si roun rwa té fidèl ouben si i pa té fidèl ? Répons sa késyon-an ké idé nou konprann sa nou bézwen fè pou fè Jéova plézi. Annan sa artik-a, nou ké wè trwa bagaj Jéova gadé pou i di si roun rwa té bon ouben si i pa té bon. Prémyèrman, i té ka gadé si rwa-a té kontan l’ ké tout so tchò. Dézyèmman, si rwa-a té ka répanti lò i té ka fè roun mové bagaj. É trwazyèmman, si rwa-a kontinyé adoré l’ kou i lé.
YÉ TÉ KONTAN JÉOVA KÉ TOUT YÉ TCHÒ
4. Ki diférans i gen ant rwa-ya ki té fidèl ké sa-ya ki pa té fidèl ?
4 Rwa-ya ki fè Jéova plézi adoré l’ ké tout yé tchò b. Jozafa ki té sa roun bon rwa « chaché Jéova ké tout so tchò » (2 Chron. 22:9). É men sa Labib ka di asou Jozyas : « Annan rwa-ya ki té la anvan li, i pa gen pyès moun kou li ki rouvin bò d’ Jéova ké tout so tchò » (2 Rois 23:25). Mé, é pou Salomon ki fè vyé bagaj lò i vin granmoun ? « I pa kontinyé adoré Jéova so Bondjé ké tout so tchò » (1 Rois 11:4). É parapòrta Abiyam, rounòt rwa ki pa té fidèl, Paròl Bondjé-a ka di : « I pa adoré Jéova so Bondjé ké tout so tchò » (1 Rois 15:3).
5. Kisa sa lé di adoré Jéova ké tout so tchò ?
5 Kisa sa lé di adoré Jéova ké tout so tchò ? Roun moun ki ka adoré Jéova ké tout so tchò, pa ka fè l’ jis paské i oblijé fè l’. I ka fè l’ paské i kontan l’ é i ka rèspèkté l’. Anplis di sa, sa moun-an ka kontinyé kontan l’ épi rèspèkté l’ pannan tout so lavi.
6. Kisa nou pouvé fè pou nou kontinyé adoré Jéova ké tout nou tchò ? (Proverbes 4:23 ; Matthieu 5:29, 30).
6 Kouman nou pouvé imité rwa-ya ki té fidèl é kontinyé adoré Jéova ké tout nou tchò ? Nou divèt rété lwen di tousa ki pouvé fè nou lanmou pou Jéova fébli. Parèkzanp, nou divèt panga sa nou ka gadé ouben sa nou ka fè lò nou ka anmizé pou nou pa arété adoré Jéova ké tout nou tchò. Nou divèt panga osi ké kimoun nou ka maché pou nou pa koumansé krè ki a soumaké ki pi enpòrtan annan lavi-a. Si nou ka wè ki roun bagaj ka fè nou lanmou pou Jéova fébli, annou fè roun bagaj lanmenm pou nou tchwé sa (li Proverbes 4:23 ; Matthieu 5:29, 30).
7. Poukisa sa enpòrtan nou pa lésé anyen fè nou lanmou pou Jéova fébli ?
7 Nou pa divèt lésé anyen fè nou lanmou pou Jéova fébli. Si nou pa ka fè atansyon, nou pouvé koumansé krè ki, jis paské nou gen bokou bagaj pou fè pou Jéova, nou pa bézwen panga sa ki pouvé fè nou lanmou pou li fébli. Mé imajiné sa : I ka fè cho toubonnman, solèy-a ka pété sèk. To rété roun bon moman dèrò anba solèy-a, to ka rantré an to kaz é to ka limen laklim-an. Mé si to pa ka fronmen lapòt-a, a pa lapenn. Chalò-a ké kontinyé antré annan kaz-a. Kisa sa ka anprann nou ? Pou nou lanmityé ké Jéova rété fò, a pou nou fè plis ki fè bagaj ki ka fè nou vin pròch ké li. Nou pa divèt lésé pyès bagaj ki ka vini di sa monn-an antré annan nou tchò, pou i pa fè nou lanmou pou Jéova fébli (Éph. 2:2).
YÉ RÉPANTI
8-9. Kouman rwa David ké Ézékyas réyaji lò Jéova korijé yé ? (gadé zimaj-a).
8 Kou nou ja di l’, rwa David fè péché ki té grav. Mé, lò profèt Natan vini palé pou li, ké imilité, i répanti (2 Sam. 12:13). Sa David ékri annan Psaume 51 ka montré nou ki i té ka vréman rigrété sa i té fè. I pa fè sanblan rigrété pou bloublou Natan ouben pou yé pa pini l’ (Ps. 51:3, 4, 17, paròl ki marké anvan koumansman psaume-an).
9 Rwa Ézékyas péché kont Jéova osi. Men sa Labib ka di asou li : « I koumansé krè so kò é akoz di sa, Bondjé lévé faché dèyè li, Jida ké Jérizalèm » (2 Chron. 32:25). Poukisa Ézékyas vin gen òrgèy ? Pitèt paské Bondjé té fè l’ divini rich é i té idé l’ bat Asiryen-yan. Ouben paské i té fè roun mirak pou géri l’. É, a dèt òrgèy-a ki fè l’ montré Babilonyen-yan tousa i té gen. É akoz di sa, profèt Izayi rouprann li (2 Rois 20:12-18). Mé kou David, ké imilité, i répanti (2 Chron. 32:26). A pou sa, jiska lafen, Jéova wè l’ kou roun rwa ki té fidèl ki « té ka fè sa [i] kontan » (2 Rois 18:3).
Lò roun profèt vin korijé yé, rwa David ké rwa Ézékyas répanti ké imilité (gadé paragraf 8-9).
10. Kouman Amazya réyaji lò Jéova korijé l’ ?
10 Amazya, rwa Jida, li menm, pa té kou David ké Ézékyas. I té ka fè bon bagaj, « mé i pa té ka fè l’ ké tout so tchò » (2 Chron. 25:2). A té kisa problèm-an ? Apré Jéova idé l’ bat Édomit-ya, Amazya koumansé adoré yé bondjé c. Épi, lò profèt Jéova-a di l’ ki sa i té fè-a pa té bon, i réfizé kouté l’, é i voyé li alé (2 Chron. 25:14-16).
11. Dapré 2 Corinthiens 7:9, 11, kisa nou divèt fè pou Jéova pardonnen nou ? (gadé zimaj-ya osi).
11 Kisa bèl èkzanp David ké Ézékyas, ké vyé èkzanp Amazya, ka anprann nou ? A pou nou répanti, é a pou nou fè tousa nou pouvé, pou nou pa fè menm péché-ya. Si roun ansyen annan nou asanblé ka bay nou roun konsèy, menmsi pou nou a roun ti bagaj, annou pa krè ki Jéova pa kontan nou ouben ki ansyen-yan kont nou. Menm rwa Israyèl-ya ki té bon té bézwen yé bay yé konsèy é yé té bézwen yé korijé yé (Héb. 12:6). Donk, lò yé ka korijé nou, 1) annou réyaji ké imilité, 2) annou chanjé sa nou bézwen chanjé é 3) annou kontinyé adoré Jéova ké tout nou tchò. Si nou ka répanti, Jéova ké pardonnen nou (li 2 Corinthiens 7:9, 11).
Lò yé ka korijé nou, 1) annou réyaji ké imilité, 2) annou chanjé sa nou bézwen chanjé é 3) annou kontinyé adoré Jéova ké tout nou tchò f (gadé paragraf 11).
YÉ ADORÉ JÉOVA KOU I LÉ
12. Kisa té ka fè ki rwa-ya ki té fidèl té diféran di sa-ya ki pa té fidèl ?
12 Sa-ya Jéova té ka wè kou dé rwa ki té fidèl, té ka adoré l’ kou i té ka doumandé yé adoré l’. É yé té ka ankourajé so pèp fè menm bagaj-a. Kou nou wè l’, yé fè bagaj ki pa té bon, mé a Jéova rounso yé té ka adoré, é yé travay rèd pou krazé tout zidòl-ya annan péyi-a d.
13. Poukisa Jéova té ka wè Akab kou roun rwa ki pa té fidèl ?
13 É pou sa-ya Jéova té ka wè kou dé rwa ki pa té fidèl ? A pa yenki mové bagaj yé fè. Parèkzanp, lò Akab, roun rwa ki té méchan, tandé ki yé té tchwé Nabòt akoz di li, i montré ki i té gen roun ti moso imilité é ki i té tris (1 Rois 21:27-29). I konstrwi plizyèr vil pou so pèp osi, é i ganyen plizyèr lagèr kont so lèlmi (1 Rois 20:21, 29 ; 22:39). Mé Akab té sa roun moun ki té ka swiv so madanm, i té ka ankourajé moun adoré zidòl. É i pa jen répanti pou sa (1 Rois 21:25, 26).
14. a) Pou Jéova, poukisa Roboam té sa roun rwa ki pa té fidèl ? b) Ki mové bagaj près tout rwa-ya ki pa té fidèl fè ?
14 Annou palé di Roboam, rounòt rwa ki pa té fidèl. Kou nou ja di l’, i fè plizyèr bon bagaj lò i té rwa. Mé, lò to wè i vin gen bokou pouvwar, i arété obéyi Lalwa Jéova, é i koumansé adoré fo bondjé (2 Chron. 12:1). Apré sa, détan i té ka adoré Jéova, é détan i té ka adoré fo bondjé (1 Rois 14:21-24). A pa Roboam ké Akab rounso ki arété adoré Jéova kou i lé. Anfèt, près tout rwa-ya ki pa té fidèl adoré fo bondjé é ankourajé ròt-ya fè menm bagaj-a. Sa Jéova té ka gadé pou di si roun rwa té bon ouben si i pa té bon, a té si i té ka adoré l’ kou i lé.
15. Poukisa sa enpòrtan pou Jéova ki so sèrvitèr-ya adoré l’ kou i lé ?
15 Poukisa sa té enpòrtan pou Jéova ki rwa-ya adoré l’ kou i lé ? Pou koumansé, paské a yé i té bay rèsponsabilité gidé so pèp pou yé adoré l’ kou i lé. Anplis di sa, lò pèp-a té ka adoré fo bondjé, i té ka fè ròt péché ki té grav é i té ka malmennen ròt-ya (Osée 4:1, 2). Anplis di sa, rwa-ya ké Israyélit-ya, té sa roun pèp ki té vouwé pou Jéova. A pou sa, Labib ka di ki, lò yé té ka adoré fo bondjé, a kousidiré yé té ka fè roun adiltèr (Jér. 3:8, 9). Roun moun ki ka fè roun adiltèr ka péché kont so madanm ouben so mouché é i ka fè l’ lapenn. Menm fason-an, lò roun moun ki vouwé Jéova so lavi ka koumansé adoré fo bondjé, i ka péché kont li é a pa ti lapenn i ka fè l’ lapenn e (Deut. 4:23, 24).
16. Pou Jéova, ki diférans i gen ant roun moun ki jis ké roun moun ki méchan ?
16 Kisa sa ka anprann nou ? Sa klè, a pou nou byen désidé rété lwen di tousa ki mélé ké fo rélijyon-an. Mé nou divèt toujou adoré Jéova kou i lé osi é gen bokou bagaj pou fè pou li. Profèt Malaki byen èspliké sa ki ka fè ki, pou Jéova, roun moun jis ouben méchan. I ékri : « Zòt ké wè ankò diférans ant roun moun ki jis ké roun moun ki méchan, ant roun moun ki ka adoré Bondjé ké roun moun ki pa ka adoré l’ » (Mal. 3:18). A pou sa, annou pa lésé anyen, pa menm nou défo ké mové bagaj nou ka fè, fè nou arété adoré Bondjé. Arété adoré Jéova, a roun péché ki grav.
17. Poukisa nou divèt panga ké kimoun nou ké maryé ?
17 Si to lé maryé, ès to ka wè kouman sa Malaki di pouvé idé to chwazi roun moun pou maryé ? Roun moun pouvé gen bèl kalité, mé si i pa ka adoré vré Bondjé-a, ès i ka wè l’ kou roun moun ki jis ? (2 Cor. 6:14). Si to ka maryé ké roun moun ki pa ka adoré Jéova, ès sa moun-an ké idé to fè to lanmou pou Jéova vin pi fò ? Réfléchi asou èkzanp rwa Salomon : Pitèt so madanm ki té ka adoré fo bondjé té gen bèl kalité, mé yé pa té ka adoré Jéova, é piti piti, yé pousé l’ adoré fo bondjé (1 Rois 11:1, 4).
18. Kisa manman ké papa-ya divèt anprann yé timoun fè ?
18 Zòt ki papa ké manman, a pou zòt sèrvi sa Labib ka di asou rwa Israyèl-ya pou bay zòt timoun anvi adoré Jéova ké balan. Èspliké yé ki si pou li roun rwa té bon, a paské sa rwa-a té ka adoré l’ kou i lé é i té ka ankourajé ròt-ya fè menm bagaj-a. Grasa sa zòt ka di ké sa zòt ka fè, anprann yé ki, étidyé Labib, alé annan réinyon-yan épi préché, pi enpòrtan pasé tout ròt bagaj (Mat. 6:33). Sinon, pitèt yé ké krè ki, sa roun Témwen Jéova, a jis gen menm rélijyon ki so fanmi, é pitèt yé pa ké santi ki adoré Jéova, a roun bagaj ki enpòrtan ouben menm yé ké arété adoré l’.
19. Kisa roun moun ki arété adoré Jéova pouvé fè ? (gadé osi karé-a « To pouvé rouvin òbò Jéova ! »).
19 Si roun moun arété adoré Jéova, ès i fin bat ? Non, paské i pouvé répanti é roukoumansé adoré Jéova kou i ka doumandé nou adoré l’. A vré, i ké divèt gen imilité é lésé ansyen-yan annan asanblé-a idé l’ (Jacq. 5:14). Mé tousa i ké fè pou roudivini zanmi Jéova ké vo lapenn !
20. Si nou ka imité rwa-ya ki té fidèl, kouman Jéova ké wè nou ?
20 Kisa rwa Israyèl-ya ka anprann nou ? Nou ké sanblé rwa-ya ki té fidèl si nou ka panga pou nou toujou adoré Jéova ké tout nou tchò. Pou nou rivé fè sa, annou sèrvi sa nou fè ki pa té bon pou nou vin miyò, annou répanti é annou chanjé sa nou divèt chanjé. É annou pa jen bliyé ki sa enpòrtan nou adoré sèl vré Bondjé-a kou i lé. Si to ka rété pròch ké Jéova, i ké wè to kou roun moun ki ka fè sa i kontan.
KANTIK 45 « Sa mo ka réfléchi annan mo tchò »
a Annan sa artik-a, lò yé ka di « rwa Israyèl-ya », a pou palé di tout mouché-ya ki té rwa asou pèp Jéova-a, ki a té asou Jida (rwayonm dé ti nasyon-yan), asou Israyèl (rwayonm dis ti nasyon-yan) ouben asou 12 ti nasyon Israyèl-ya.
b POU BYEN KONPRANN : Souvan, lò Labib ka di « tchò », a pou palé di ki kalité moun nou sa ofon nou tchò. Sa lé di, sa nou anvi, sa nou ka pansé, nou mantalité, sa nou pouvé fè, sa ki ka pousé nou fè bagaj-ya é sa nou lé rivé fè annan nou lavi.
c Dapré sa nou ka wè, rwa-ya ki pa té ka adoré Jéova té gen labitid adoré bondjé nasyon-yan yé té pran.
d Rwa Aza fè péché ki té grav (2 Chron. 16:7, 10). Pourtan, Labib ka di bon bagaj asou li. Menmsi o koumansman, lò Jéova korijé l’, i pa kouté, pitèt i répanti apré sa. Jéova wè plis bon bagaj pasé i wè mové bagaj koté li. A Jéova rounso i adoré é i travay rèd pou krazé tout zidòl-ya annan péyi-a (1 Rois 15:11-13 ; 2 Chron. 14:2-5).
e Dapré dé prémyé koumannman Lalwa Moyiz, Jéova té défann Israyélit-ya adoré pyès moun ni pyès bagaj, si a pa té li (Ex. 20:1-6).
f MEN SA NOU KA WÈ ASOU ZIMAJ-YA : Roun jenn ansyen ka di roun frè ki i enkyèt pou li pas i ka bwè tròp. Ké imilité, frè-a ka asèpté konsèy-a, ka chanjé sa i divèt chanjé é ka kontinyé adoré Jéova ké fidélité.
