Ès to byen li chak Tourdégard sa lannen-an ? Annou wè si to ka rivé réponn sa késyon-yan :

Ki èkzanp Jéova ka bay nou annan zafè rèspèkté madanm-yan ?

Ki wonm ki fanm, i pa ka fè préférans. I ka kouté yé : sa yé ka rousanti ké problèm yé ka jwenn enpòrtan pou li. Épi i ka fè yé konfyans : i ka bay yé fè so travay (w24.01, p. 15-16).

Kouman nou pouvé fè sa Éphésiens 5:7 ka di : « A pa pou zòt gen anyen ka wè ké yé » ?

Apot Pòl di nou panga maché ké moun ki pa ka ankourajé nou kouté sa Jéova ka di nou asou sa ki bon ké sa ki mové. Nou pa ka maché ké sa kalité moun-yan ni annan nou lavi touléjou ni asou rézo sosyal-ya (w24.03, p. 22-23).

Ki kalité enfòrmasyon nou divèt panga ?

Nou divèt panga enfòrmasyon roun zanmi voyé nou san i pa vérifyé di ki koté sa enfòrmasyon-an soti, ouben enfòrmasyon annan roun imèl roun moun nou pa konnèt voyé nou, ouben ankò enfòrmasyon ki ka vini di roun moun ki ka fè kousidiré i lé étidyé Labib, mé pannan sa tan-an, a roun apòsta (w24.04, p. 12).

Kisa nou savé é kisa nou pa savé asou fason Jéova ké jijé rwa Salomon, sa-ya ki mouri lò i krazé Sodòm ké Gomòr épi sa-ya ki mouri pannan Délij-a ?

Nou pa savé si Jéova pa ké janmen résisité yé. Mé nou savé ki i konnèt tout bagaj é ki i gen bokou mizérikòrd (w24.05, p. 3-4).

Kou Jéova sa « gro Ròch-a », di kisa nou pouvé sir ? (Deut. 32:4).

Jéova sa roun koté nou an sékirité. Nou pouvé fè l’ konfyans, i ka toujou tchenbé so promès. É i pa ka chanjé : i toujou gen menm pèrsonalité-a ké menm projè-a (w24.06, p. 26-28).

Kisa ki pouvé idé to adapté to kò annan roun nouvo asanblé ?

Konté asou Jéova ki ké idé to kou i fè l’ ké so sèrvitèr tan-lontan. Pa konparé to nouvo asanblé ké to ansyen asanblé. Fè bokou bagaj annan asanblé-a épi chaché gen nouvo zanmi (w24.07, p. 26-28).

Kisa trwa èkzanp-ya ki annan Matthieu chapit 25 ka anprann nou ?

Èkzanp brébi ké kabrit-ya ka anprann nou ki a pou nou fidèl. Èkzanp vyèrj-ya ki saj ké vyèrj-ya ki sòt ka montré nou ki a pou nou paré é ki a pou nou montré ki nou ka véyé. Épi annan èkzanp talan-yan, nou ka wè ki a pou nou travay rèd ké balan (w24.09, p. 20-24).

Ki rotò ti antré-a ki té douvan tanp Salomon-an té ka fè ?

Annan 2 Chroniques 3:4, sèrten tradiksyon ka di ki so rotò té ka fè « 120 koudé », sa lé di 53 mèt. Mé ròt tèks tan-lontan ka mété « 20 koudé », sa lé di apéprè 9 mèt. Lò to ka gadé mir Tanp-a, ti antré-a pa té pouvé fè 120 koudé, donk, i dèt té ka fè 20 koudé vré (w24.10, p. 31).

Roun asistan divèt « maryé ké rounsèl madanm » (1 Tim. 3:12). Kisa sa lé di ?

Sa lé di i maryé ké rounsèl madanm é i pa divèt fè pyès bagaj sèksyèl ki pa pròp. I pa menm divèt gadé ròt madanm ké anvi non plis (w24.11, p. 19).

Poukisa nou pouvé di ki annan Jean 6:53, Jézi pa ka bay roun modèl pou swiv pou Répa Sényèr-a ?

Annan Jean 6:53, Jézi di ki moun té divèt manjé so lachè épi bwè so disan. I di sa an 32 di nou lépòk, lò i té Galilé, pou Jwif-ya ki pa té gen lafwa annan li. Mé a roun lannen pita i fè Répa Sényèr-a, a Jérizalèm. A sa moman-an, i té ka palé pou moun ki té ké rwa annan syèl-a ké li (w24.12, p. 10-11).