ARTIK POU ÉTIDYÉ 50
KANTIK 135 Bèl ti envitasyon Jéova : « Mo pitit, aji ké sajès »
Papa ké manman, idé zòt timoun fè so lafwa vin pi fò
‘Annou wè nou menm a kisa ki volonté Bondjé : sa ki bon, sa ki ka fè l’ plézi, sa ki parfè’ (ROM. 12:2).
SA NOU KÉ ANPRANN
Annan sa artik-a, papa ké manman-yan ké anprann kouman yé pouvé palé di Bondjé é di Labib ké yé timoun épi idé l’ fè so lafwa vin pi fò.
1-2. Kouman papa ké manman-yan divèt réyaji lò yé timoun ka pozé yé késyon asou sa Labib ka di ?
ROUN patché papa ké manman té ké dakò pou di ki to divèt travay rèd pou to lévé roun timoun. Si zòt gen roun timoun piti, nou ka félisité zòt pou tousa zòt ka fè pou idé l’ gen roun lafwa ki fò (Deut. 6:6, 7). Mé toupannan zòt timoun ka grandi, pitèt i ka koumansé pozé késyon asou sa Labib ka di. Parèkzanp, i pouvé doumandé poukisa Jéova pa lé nou fè sèrten bagaj.
2 Si zòt timoun ka koumansé pozé zòt késyon, sa pouvé fè zòt pè. Zòt jis pouvé krè ki so lafwa ka fébli. Mé pou di vré, pi roun timoun ka grandi, pi i bézwen pozé késyon pou so lafwa vin pi fò (1 Cor. 13:11). Donk, zòt pa bézwen pè. Lò zòt timoun ka pozé zòt késyon, zòt pouvé profité pou idé l’ anprann réfléchi ankò plis é fè so lafwa annan Bondjé ké Labib vin pi fò.
3. Kisa nou ké wè annan sa artik-a ?
3 Annan sa artik-a, nou ké wè kouman papa ké manman-yan pouvé idé yé timoun 1) pou so lafwa vin pi fò, 2) pou i kontan sa Jéova ka di asou sa ki bon ké sa ki mové é 3) pou i défann so lafwa. Anplis di sa, nou ké wè poukisa a roun bon bagaj lò timoun-an ka pozé késyon. Nou ké wè osi ki kalité bagaj pouvé pèrmèt papa ké manman-yan palé di sa Labib ka di ké yé timoun.
IDÉ ZÒT TIMOUN GEN ROUN LAFWA KI FÒ
4. Ki késyon roun timoun pouvé pozé so kò, é poukisa ?
4 A pa paské zòt gen lafwa zòt timoun ké gen lafwa osi. Zòt pa fèt ké lafwa é zòt timoun non plis. A pou sa, ké tan-an, i pouvé pozé sa kalité késyon-yan : « Kisa ka montré mo ki Bondjé ka èkzisté ? Ès mo pouvé krè sa Labib ka di ? » Labib ka di ki nou divèt sèrvi nou « tèt » ké « vérifyé tout bagaj » (Rom. 12:1 ; 1 Thess. 5:21). Atò, kouman zòt pouvé idé zòt timoun fè so lafwa vin pi fò ?
5. Kisa papa ké manman-yan pouvé fè pou idé yé timoun fè so lafwa vin pi fò ? (Romains 12:2).
5 Ankourajé l’ vérifyé li menm ki sa Labib ka di, a lavérité (li Romains 12:2). Lò zòt timoun ka pozé zòt késyon, profité pou montré l’ kouman i pouvé fè réchèrch pou i trapé répons-ya. Parèkzanp, i gen Index des publications des Témoins de Jéhovah ké Guide de recherche pour les Témoins de Jéhovah. Pou i pouvé trapé prèv ki ka montré ki Labib, a pa jis roun bon liv moun ékri mé a « paròl Bondjé-a », i pouvé alé annan Guide de recherche pour les Témoins de Jéhovah, annan parti « La Bible » épi gadé parti « Inspirée par Dieu » (1 Thess. 2:13). Parèkzanp, i pouvé fè réchèrch asou vil Niniv. Anvan, roun ran èspésyalis té ka di ki sa vil-a pa té jen èkzisté. Mé bò d’ 1850, yé fouyé latè-a é yé trapé koté sa vil-a té fika, é sa ka byen montré ki sa Labib ka di vré (Soph. 2:13-15). Zòt timoun pouvé li artik « Ès to té savé sa ? » annan Tourdégard novanm 2021 ki ka montré ki lò yé détrwi Niniv, roun profési Labib réyalizé. Lò i ké konparé sa i ka anprann annan nou piblikasyon ké sa i ka anprann annan ròt liv nou pouvé fè konfyans, i ké ankò pi sir ki sa Labib ka di vré.
6. Kouman papa ké manman-yan pouvé idé yé timoun réfléchi ? Bay roun èkzanp (gadé zimaj-a osi).
6 Idé zòt timoun réfléchi. Plizyèr kalité bagaj pouvé pèrmèt zòt palé di Labib ouben di zafè krè annan Bondjé ké zòt timoun. Parèkzanp, annan roun mizé, roun jarden botanik, roun èkspozisyon annan roun Bétèl ouben ròt bagaj konsa. Si zòt k’alé vizité roun mizé (annan mizé-a menm ouben asou Entèrnèt), zòt pouvé montré l’ bagaj ki ka montré ki sa Labib ka di vré. Ès i savé ki non Bondjé marké asou roun gro ròch ki gen pasé 3 000 lannen é ki yé ka aplé stèle de Mesha ? Vré ròch-a annan le musée du Louvre, a Pari, an Frans. Anplis di sa, yé fè roun kopi di sa ròch-a é yé mété l’ Warwik, annan èkspozisyon « La Bible et le nom divin » ki annan syèj mondyal Témwen Jéova-ya, Nouyòrk. Asou sa ròch-a, yé ka di ki Mécha, rwa Moab-a, rébélé so kò kont Israyèl. Sa k’alé ké sa Labib ka di (2 Rois 3:4, 5). Lò zòt timoun ké wè ké so dé wéy prèv ki sa Labib ka di vré, so lafwa ké vin pi fò (gadé 2 Chroniques 9:6).
Lò zòt ka vizité roun mizé ké zòt timoun, fè l’ réfléchi asou prèv ki ka montré ki sa Labib ka di vré (gadé paragraf 6).
7-8. a) Kisa bèl fòrm nou ka wè annan lanatir ka anprann nou ? Bay roun èkzanp (gadé zimaj-a osi). b) Ki késyon pouvé idé zòt timoun vin ankò pi sir ki a roun moun ki kréyé tout bagaj ?
7 Ankourajé l’ réfléchi asou sa Jéova kréyé. Lò zòt ka pronmennen annan roun bitasyon ouben lò zòt ka okipé di zòt plant, montré zòt timoun fòrm nou ka wè souvan annan lanatir. Poukisa ? Sa fòrm-yan ka montré ki roun moun entélijan kréyé sa bagaj-ya. Parèkzanp, sa ka fè roun patché lannen syantifik-ya ka étidyé bagaj annan lanatir ki ka sanblé ké roun spirale. Roun syantifik yé ka aplé Nicola Fameli ka di ki lò to ka konté kantité spirale i gen annan sèrten bagaj annan lanatir, to toujou ka trapé menm séri chif-ya. Yé ka aplé sa « suite de Fibonacci ». Nou ka wè sa spirale-ya annan roun patché bagaj annan lanatir : fòrm sèrten galaksi-ya gen, kokiy roun èskargo, fason féy-ya fika asou roun branch, tournésòl-ya épi ròt bagaj ankò a.
8 Pitèt zòt timoun ké anprann bagaj asou ròt fòrm i gen souvan annan lanatir. Parèkzanp, près tout pyébwa-ya fèt menm fason. Pyébwa-a ka fè branch é branch-ya ka fè fèy. Yé ka aplé sa bagaj-a figure Fractale. Nou pouvé wè sa figure Fractale-ya annan roun patché ròt bagaj annan lanatir. Mé kimoun ki kréyé sa fòrm-yan ? Pi zòt timoun ké réfléchi asou sa bagaj-ya, pi sa ké idé l’ sir ki a Bondjé ki fè sa bagaj-ya (Héb. 3:4). Zòt pouvé doumandé l’ : « Si Bondjé kréyé nou, ès to pa ka pansé ki a li ki konnèt sa ki pi bon pou nou ? » Apré sa, zòt pouvé montré l’ ki Bondjé bay nou Labib pou montré nou sa nou divèt fè pou nou tchò kontan.
NASA, ESA, and the Hubble Heritage (STScl/AURA)-ESA/Hubble Collaboration
Kimoun ki kréyé sa fòrm-yan ? (gadé paragraf 7-8).
IDÉ LI KONTAN SA LABIB KA DI ASOU SA KI BON KÉ SA KI MOVÉ
9. Kisa ki pouvé fè roun timoun doumandé so kò si kouté sa Labib ka di bon pou li ?
9 Si zòt timoun ka doumandé so kò si kouté sa Labib ka di bon pou li, éséyé konprann poukisa. Ès i pa dakò ké sa Labib ka di ? Ouben ès a jis paské i pa konnèt défann so lafwa ? Kèlkéswa répons-a, zòt pouvé étidyé liv Viv ké tchò kontan pou tout-tan ! ké li pou idé l’ kontan sa Labib ka di asou sa ki bon ké sa ki mové b.
10. Kouman zòt pouvé idé zòt timoun réfléchi asou lanmityé i pouvé gen ké Jéova ?
10 Bay li anvi divini zanmi Jéova. Lò zòt ka étidyé Labib ké li, sèrvi késyon ké zimaj i gen annan liv Viv ké tchò kontan pou tout-tan ! pou éséyé savé sa zòt timoun ka pansé (Prov. 20:5). Parèkzanp, léson 8-a ka konparé Jéova ké roun bon zanmi ki ka bay nou konsèy pou protéjé nou é pou nou tchò kontan. Lò zòt fin gadé 1 Jean 5:3, zòt pouvé doumandé l’ : « Kou nou savé ki Jéova sa nou bon Zanmi, kouman nou divèt wè sa i ka doumandé nou fè ? » A pitèt roun ti késyon, mé sa pouvé idé zòt timoun wè ki si Bondjé ka bay nou konsèy, a paské i kontan nou (Is. 48:17, 18).
11. Kouman zòt pouvé idé zòt timoun kontan sa Labib ka di asou sa ki bon ké sa ki mové ? (Proverbes 2:10, 11).
11 Montré l’ bénédiksyon nou ka jwenn lò nou ka fè sa Labib ka di. Lò zòt ka li Labib ouben lò zòt ka fè tèks pou koumansé lajournen-an, montré li bénédiksyon zòt fanmi ka jwenn pas zòt ka fè sa Labib ka di. Parèkzanp, ès zòt timoun ka konprann ki lò i ka travay rèd é lò i onèt sa bon pou li ? (Héb. 13:18). Anplis di sa, montré li ki lò nou ka obéyi prensip-ya ki annan Labib, sa ka protéjé nou lasanté é nou pi kontan (Prov. 14:29, 30). Si zòt timoun ka konprann poukisa obéyi sa Labib ka di bon pou li, i ké plis anvi fè l’ (li Proverbes 2:10, 11).
12. Kouman Steve ké so madanm ka idé yé tiboug konprann ki prensip-ya ki annan Labib bon pou li ?
12 Steve, ki ka rété an Frans, ka èspliké kouman li ké so madanm ka idé Ethan, yé tiboug ki gen 16 lannen, konprann ki Jéova ka bay nou so lalwa pas i kontan nou : « Nou ka pozé li sa kalité késyon-yan : “Poukisa Jéova lé nou obéyi sa prensip-a ? Poukisa sa ka montré ki i kontan nou ? Si to pa té ka obéyi sa prensip-a, kisa ki té ké rivé ?” » Lò nou ka kozé asou sa, sa ka idé Ethan asèpté lalwa Jéova. Steve ka di osi : « Sa nou lé, a idé Ethan konprann ki sajès ki annan Labib lontan pi bon pasé sajès moun-yan. »
13. Kouman papa ké manman-yan pouvé anprann yé timoun obéyi prensip-ya ki annan Labib ? Bay roun èkzanp.
13 Anprann li obéyi prensip-ya ki annan Labib. Imajiné zòt timoun divèt li roun liv pou lékòl. Mé annan sa liv-a, moun-yan ka fè bagaj Jéova pa kontan. Parèkzanp, yé gen roun mové kondwit sèksyèl é yé vyolan. É yé ékri liv-a roun fason ki ka fè nou krè ki sa sa moun-yan ka fè bon. Zòt pouvé doumandé zòt timoun réfléchi asou sa Jéova ka rousanti lò moun-yan ka fè sa kalité bagaj-ya (Prov. 22:24, 25 ; 1 Cor. 15:33 ; Phil. 4:8). Sa ké idé zòt timoun wè poukisa obéyi Jéova, a roun bon bagaj. É si profésò-a ouben so kanmarad lékòl ka doumandé l’ sa i ka pansé di liv-a, i ké pouvé défann so lafwa c.
PRÉPARÉ L’ POU I DÉFANN SA I KA KRÈ
14. Kisa ki pouvé fè roun jennjan pè, é poukisa ?
14 Détan, jennjan-yan pè palé pou ròt-ya di sa yé ka krè. Parèkzanp, yé pouvé pè lò yé divèt èspliké poukisa yé pa ka krè annan théorie évolution-an. Poukisa ? Paské souvan, yé profésò ka palé di théorie évolution-an kousidiré a té roun bagaj ki vré é kousidiré tout moun té dakò ké sa. Atò, kouman zòt pouvé idé zòt timoun pou i sir di sa i ka krè ?
15. Kisa ki pouvé idé roun jennjan pou i ankò plis sir ki sa i ka krè vré ?
15 Idé l’ pou i sir ki sa i ka krè vré. Zòt timoun pa bézwen ronté pas i ka krè ki i gen roun moun ki kréyé tout bagaj (2 Tim. 1:8). Poukisa ? Pas kantité syantifik dakò pou di ki lavi pa yenki parèt toubonnman konsa. Lò yé ka wè kouman bagaj-ya rèd pou konprann annan lanatir, yé ka di ki i blijé gen roun moun ki kréyé sa bagaj-ya. Donk, yé pa ka krè annan théorie évolution-an yé ka ansényé timoun lékòl. Rounòt bagaj ki pouvé idé zòt timoun fè so lafwa vin pi fò épi gen plis kouraj, a gadé sa ki idé sèrten frè ké sò krè ki a roun moun ki kréyé tout bagaj d.
16. Kouman papa ké manman-yan pouvé idé yé timoun èspliké poukisa yé ka krè ki a roun moun ki kréyé tout bagaj ? (1 Pierre 3:15 ; gadé zimaj-a osi).
16 Idé l’ èspliké ròt-ya poukisa i ka krè ki roun moun kréyé tout bagaj (li 1 Pierre 3:15). Pitèt zòt pouvé gadé ké zòt timoun artik-ya ki annan parti « Les jeunes s’interrogent : Création ou évolution ? » asou jw.org. Apré sa, lésé zòt timoun chwazi èsplikasyon i pi kontan-an épi idé l’ antréné so kò. Fè l’ sonjé ki a pa lapenn i antré annan roun déba ké so kanmarad. É si roun moun lé palé di sa ké li, ankourajé l’ èspliké bagaj-ya di roun fason ki senp. Parèkzanp, roun kanmarad lékòl pouvé di : « Mo ka krè sèlman sa mo ka wè. Bondjé li menm, mo pa jen wè l’. » Roun jennjan pouvé réponn : « Imajiné to ofon roun danbwa ka maché é to ka tonbé asou roun bèl karbé. Kisa to té ké di ? A roun moun ki fè sa karbé-a, pa vré ? Alòr, alé wè pou tousa i gen annan inivèr-a ! »
Lò to ka kozé ké to kanmarad-ya, èspliké bagaj-ya roun fason ki senp (gadé paragraf 16-17 e).
17. Kouman papa ké manman-yan pouvé montré yé timoun sa i pouvé fè pou i gen lokazyon palé di Labib ké ròt-ya ? Bay roun èkzanp.
17 Montré l’ sa i pouvé fè pou i gen lokazyon palé di Labib ké ròt-ya (Rom. 10:10). Zòt pouvé konparé éfòr i ka fè pou palé di so lafwa ké éfòr roun moun bézwen fè pou i anprann jwé lanmizik. Moun-an ké koumansé jwé bagaj ki tou senp. Mé, pi i ké jwé pi i ké alèz. Menm fason-an, roun jennjan pouvé koumansé palé di so lafwa di roun fason ki senp. Parèkzanp, i pouvé doumandé roun kanmarad : « Ès to té savé ki souvan syantifik-ya ka kopyé sa yé ka wè annan lanatir ? Gadé sa ti vidéyo-a ! » I ka montré roun vidéyo annan parti Évolution ou conception ?, épi apré sa, i pouvé di : « Si moun ka poté syantifik-ya anlè pou roun bagaj yé kopyé annan lanatir, kimoun ki mérité yé félisité l’ pou sa ki té ja la annan lanatir ? » Sa ti èsplikasyon-an pouvé asé pou bay roun jennjan anvi anprann plis bagaj asou sa.
KONTINYÉ IDÉ L’ FÈ SO LAFWA VIN PI FÒ
18. Kouman papa ké manman-yan pouvé kontinyé fè lafwa yé timoun vin pi fò ?
18 Jòdla monn-an plen ké moun ki pa gen lafwa annan Jéova (2 Pierre 3:3). Atò, lò zòt ka étidyé Labib ké zòt timoun, ankourajé l’ étidyé plis bagaj ki ké idé l’ rèspèkté Paròl Bondjé-a ké sa i ka di asou sa ki bon ké sa ki mové ankò plis. Idé l’ réfléchi asou bèl bagaj Jéova kréyé pou so lafwa vin pi fò. Idé l’ wè ki profési-ya ki annan Labib ka fèt di roun fason ki bèl toubonnman. É pi enpòrtan ankò, priyè ké li é pou li. Zòt pouvé sir ki Jéova ké rékonpansé tout éfòr zòt ka fè pou idé zòt timoun fè so lafwa vin pi fò (2 Chron. 15:7).
KANTIK 133 Adorons Jéhovah dès la jeunesse
a Pou anprann plis bagaj asou sa, gadé vidéyo Les merveilles de la création révèlent la gloire de Dieu : Les formes, asou jw.org.
b Si zòt timoun ja étidyé tout liv Viv ké tchò kontan pou tout-tan !, zòt pouvé rouwè ké li déztrwa léson annan parti 3 ké 4 ki ka palé di sa Labib ka di asou sa ki bon ké sa ki mové.
c Annan sèrten péyi, dipi a zafè rélijyon, lalwa ka défann nou palé di sa nou ka krè lò nou lékòl. Vré krétyen-yan ka rèspèkté lalwa (Mat. 22:21). A nou chak pou désidé sa nou ké fè annan sèrten sitiasyon, parèkzanp lò roun moun ki ka fè lékòl ouben roun zélèv ka pozé roun késyon.
d Gadé artik « Pourquoi nous croyons en un créateur » annan Réveillez-vous ! sèptanm 2006 ké ti liv Cinq questions à se poser sur l’origine de la vie. Pou trapé ròt èkzanp, gadé séri vidéyo Points de vue sur l’origine de la vie, asou jw.org.
e MEN SA NOU KA WÈ ASOU ZIMAJ-A : Roun jenn Témwen ka montré roun kanmarad lékòl roun vidéyo ki annan parti Évolution ou conception ?
