Jéova té lé Israyélit-ya sen. A pou sa i di yé parèkzanp : « To pa divèt monté désann ka palé moun mal an mitan to pèp. To pa divèt fè anyen pou fè to konpanyen pédi so lavi. Mo sa Jéova » (Lév. 19:2, 16).

Kisa sa lé di : « To pa divèt fè anyen pou fè to konpanyen pédi so lavi » ? Nou ka li annan roun liv a ki ka palé di liv Lévitique-a : « Sa parti-a annan vèrsé-a [...] rèd pou èspliké ; sa rèd pou di kisa sa mo-a [yé ka itilizé la] annan lang ébré-a lé di, si nou ka mété l’ annan noupa lang, sa lé di “pa rété laro, òbò, bò di”. »

Roun ran moun ki ka èspliké Labib-a ka mété sa parti di vèrsé-a ansanm ké vèrsé-a ki anvan-an ki ka di : « Zòt pa divèt jijé roun fason ki pa jis. To pa divèt fè filon pou sa-la ki maléré ni fè préférans pou sa-la ki gen bokou soumaké. A ké jistis to ké jijé to frè » (Lév. 19:15). Dapré sa moun-yan, koumannman-an ki ka di « pa rété laro, òbò, bò di lavi to konpanyen » ki annan vèrsé 16-a, té pouvé lé di ki sèrvitèr Bondjé-ya pa té divèt fè pyès moun pyès mové bagaj, ki pannan roun prosè, ki lò yé té ka achté ouben vandé ouben annan fanmi-a, épi pa fè gaya pou fè yé zafè maché. A vré, nou pa divèt aji konsa, mé i gen roun èsplikasyon di sa parti di vèrsé 16-a ki pi lojik.

Annou pran prémyé parti sa vèrsé-a. Bondjé té ka défann so sèrvitèr « monté désann ka palé moun mal ». Fo nou byen sonjé ki palé moun mal pi grav pasé fè kankan, menm si kankan osi pouvé mennen trafalga (Prov. 10:19 ; Eccl. 10:12-14 ; 1 Tim. 5:11-15 ; Jacq. 3:6). Roun moun ki ka malpalé moun, ka fè sa pou sali répitasyon moun-an. Détan i pouvé bay roun fo témwanyaj asou roun moun épi akoz di sa, lavi sa moun-an an danjé. Nou gen èkzanp mouché-ya ki malpalé Nabòt é a konsa yé voyé ròch asou li jouktan i mouri magré i té inosan (1 Rois 21:8-13). Donk, roun moun ki ka palé rounòt moun mal pouvé ‘fè so konpanyen pédi so lavi’, kou sa marké annan dézyèm parti Lévitique 19:16.

Anplis di sa, roun moun pouvé palé roun moun mal paské i rayi moun-an. É nou ka li annan 1 Jean 3:15 : « Si roun moun rayi so frè, a roun kriminèl, é zòt savé ki pyès kriminèl pa pouvé gen lavi pou tout-tan. » Nou ka wè ki apré Lévitique 19:16 i marké : « To pa divèt rayi to frè annan to tchò » (Lév. 19:17).

Donk, dézyèm parti Lévitique 19:16 sa roun avèrtisman ki séryé pou krétyen-yan. Nou divèt panga malpalé moun pou sali yé répitasyon ni pansé mové bagaj asou yé. Si nou ka malpalé roun moun pou sali so répitasyon, paské nou jalou sa moun-an ouben paské nou pa kontan l’, sa pouvé montré ki nou rayi l’. Krétyen-yan divèt jité sa kalité konpòrtman-an lwen di yé (Mat. 12:36, 37).