« A pa ké moun sèlman yé té janti, yé té janti ké mo chyen osi. Roun jou, Elaine ki té dibout òbò roun prézantwar, bay mo dé chyen déztrwa krokèt. Apré sa, chak kou nou té ka vini bò prézantwar-a, mo dé chyen té ka tiré yé kòrd pou yé té rivé pi vit koté yé té savé yé té ké bay yé “krokèt” pou manjé.

« Plizyèr mwa pasé. Mo chyen té kontan yé krokèt toujou, é mo menm mo té kontan mo ti kozé ké Témwen Jéova-ya. Mé mo pa té lé tro janti ké yé, mo té pè. Mo té gen pasé 70 lannen é mo pa té djè savé sa yé té ka krè. Mo té ja alé annan plizyèr Légliz mé yé pa té bay mo pyès satisfaksyon. A pou sa mo té pi kontan étidyé Labib-a mo rounso.

« Annan sa menm lépòk-a, mo wè ròt Témwen préché ké prézantwar annan plizyèr koté annan vil-a. Yé menm osi yé té toujou janti. É mo koumansé fè yé konfyans paské yé té ka sèrvi Labib-a pou réponn tout késyon mo té gen.

« Roun jou, Elaine doumandé mo : “Ès ou ka pansé ki zannimo-ya a roun kado Bondjé fè nou ?” Mo réponn : “Asiré !” Alòr Elaine li Isaïe 11:6-9 pou mo. Sa vèrsé-ya chanjé tout bagaj pou mo, menm si mo té pè asèpté piblikasyon toujou.

« Apré sa, mo pran ti kozé plizyèr fwa ké Elaine ké so mari Brent, yé pa té long mé sa té toujou entérésan. Yé konséyé mo li Labib-a dipi Matthieu jik Actes pou mo té pouvé konprann a kisa ki roun vré krétyen. É a sa mo fè. Roun tibi tan apré, mo asèpté étidyé Labib-a ké Brent ké Elaine. A té an mitan lannen 2016.

« Mo té kontan étidyé Labib-a ké alé annan réinyon-yan annan sal di Rwayonm-an bokou. Lò mo té ka anprann sa Labib-a ka vréman anprann nou, sa té ka fè mo tchò kontan menm. Apré roun tibi plis ki roun lannen, mo batizé Témwen Jéova. Jòdla, mo gen 79 lannen é mo savé mo asou bon chimen-an. Jéova béni mo lò i rousouvwè mo annan so fanmi. »