ARTIK POU ÉTIDYÉ 17
Jéova kontan to bokou !
« Jéova kontan so pèp » (PS. 149:4).
KANTIK 108 L’amour fidèle de Dieu
KOUTWÉY ASOU SA NOU KÉ WÈ a
Nou Papa ki annan syèl-a kontan nou chak (gadé paragraf 1).
1. Kisa Jéova ka wè koté so sèrvitèr-ya ?
JÉOVA « kontan so pèp » (Ps. 149:4). Sa ka bay nou tchò kontan ! I ka wè nou bèl kalité, i savé ki kalité moun nou pouvé divini é i ka fè nou vini òbò li. Si nou ka rété fidèl douvan li, i ké toujou rété òbò nou (Jean 6:44).
2. Poukisa sèrten ka krè ki Jéova pa kontan yé ?
2 Détan, sèrten ka doumandé yé kò : « Mo savé Jéova kontan so pèp, mé é mo menm, ès i kontan mo ? » Poukisa yé ka doumandé yé kò sa ? Oksana b, ki soufri bokou lò i té piti, ka di : « Mo té tèlman kontan lò mo batizé é lò mo divini pyonyé. Mé 15 lannen apré, mo koumansé sonjé mové bagaj ki rivé mo lò mo té timoun. Mo koumansé krè ki Jéova pa té kontan mo ankò é ki mo pa té ka mérité so lanmou. » Yua, roun sò pyonyé ki li menm osi soufri lò i té piti, ka di : « Mo bay Jéova mo lavi paské mo té lé fè l’ plézi, mé mo té sir ki i pa té ké janmen pouvé kontan mo. »
3. Ki késyon nou ké wè ?
3 Kou sa dé sò nou fin palé-a, to menm osi to kontan Jéova, mé pitèt to ka pansé ki i pa kontan to. Poukisa to divèt sir ki Jéova kontan to ? É si to ka pansé ki Jéova pa kontan to, kisa ki ké idé to arété krè sa ? Annou réponn sa késyon-yan.
SA DANJÉRÉ DI KRÈ KI JÉOVA PA KONTAN NOU
4. Poukisa sa danjéré di krè ki Jéova pa kontan nou ?
4 Lanmou ka bay nou fòrs pou aji. Si nou sir ki Jéova kontan nou é i la ké nou, nou ké gen fòrs pou adoré li ké tout nou tchò menm si nou gen problèm. Mé si nou ka pansé i pa kontan nou, ‘nou pa ké gen bokou fòrs’ (Prov. 24:10). É si dékourajman-an ka bat nou, nou pa ké rivé tchenbé lò Satan ké ataké nou (Éph. 6:16).
5. Kisa ki rivé sèrten frè ké sò ki té ka pansé ki Bondjé pa té kontan yé ?
5 Lafwa sèrten frè ké sò fidèl fébli paské yé té ka pansé ki Bondjé pa té kontan yé. Roun ansyen yé ka aplé James ka di : « Mo té bétélit é mo té kontan préché annan roun asanblé koté yé té ka palé rounòt lang. Magré sa, mo té ka doumandé mo kò si Jéova té ka asèpté sa mo té ka fè pou li. Mo menm té ka doumandé mo kò si i té ka kouté mo lapriyè. » Eva, ki annan sèrvis a plen tan li menm osi, ka di : « Mo randé mo kò kont ki, lò to ka pansé ki Jéova pa kontan to, sa vréman danjéré, paské sa ka aji asou tousa to ka fè pou li. To pa anvi fè pyès bagaj pou Jéova ankò, é to ka pédi to lajwa. » Michael, ki pyonyé pèrmanan ké ansyen, ka di : « Lò nou ka pansé ki Bondjé pa kontan nou, nou ka pédi nou lanmityé ké li piti piti. »
6. Kisa nou divèt fè si nou ka koumansé krè ki Bondjé pa kontan nou ?
6 Sa nou frè ké sò-ya di ka montré nou ki lò nou ka krè ki Jéova pa kontan nou sa pouvé vréman fè nou lafwa vin fèb. Mé kisa nou pouvé fè si nou ka koumansé krè ki Bondjé pa kontan nou ? Lanmenm, nou divèt arété pansé sa. Annou doumandé Jéova idé nou pa sonjé « bagaj ki ka troumanté » nou, é bay nou so lapè ki ‘ké protéjé nou tchò ké nou lèspri’ (Ps. 139:23, nòt ; Phil. 4:6, 7). É annou sonjé ki nou pa tousèl ka briga. I gen ròt frè ké sò fidèl ki ka briga paské yé ka pansé ki Jéova pa kontan yé. É tan-lontan, i gen sèrvitèr Bondjé ki briga ké sa mové lidé-a osi. Annou wè kisa èkzanp Pòl ka anprann nou asou sa.
SA ÈKZANP PÒL KA ANPRANN NOU
7. Ki problèm Pòl té gen ?
7 Détan, ès to ka santi ki to anba dlo paské to gen tròp rèsponsabilité ? Ès to ka santi ki to pa ka rivé fè tousa to gen pou fè ? Si a sa, to pouvé konprann Pòl. A pa pou roun asanblé rounso i té ka enkyété so kò, mé « pou tout asanblé-ya » (2 Cor. 11:23-28). Ès to malad dipi lontan é sa ka manjé to lajwa ? Pòl té gen roun « pikan annan so lachè » ki té ka fè li soufri toulong. Pitèt a té roun problèm ké so lasanté, é i té lé fin ké sa (2 Cor. 12:7-10). Ès to dékourajé paské to toujou ka fè roun bagaj ki pa bon ? Pòl té annan menm sitiasyon-an. Pou li, i té sa roun « bonnaryen » paské a tout tan i té divèt briga pou fè sa ki bon (Rom. 7:21-24).
8. Kisa ki idé Pòl tchenbé rèd menm lò i té gen problèm ?
8 Magré tout problèm i té gen, Pòl kontinyé sèrvi Jéova. Kisa ki bay li fòrs ? A so lafwa annan ranson-an ki té fò. I té byen savé ki, kou Jézi té promèt, ‘tout moun ki té ké montré yé lafwa annan li [...] té ké gen lavi pou tout-tan’ (Jean 3:16 ; Rom. 6:23). É Pòl té roun di sa-ya ki té ka montré yé lafwa annan ranson-an ! Pòl té sir ki, menm si roun moun té ka fè roun péché grav, si i té ka doumandé Jéova pardon, Jéova té ké pardonnen li (Ps. 86:5).
9. Kisa sa Pòl ka di annan Galates 2:20 ka anprann nou ?
9 Pòl té sir ki Bondjé té kontan li paské i té voyé so Pitit Jézi mouri pou li (li Galates 2:20). Lafen sa vèrsé-a ka rasiré nou. Pòl ka di : « Pitit Bondjé-a [...] montré mo i té kontan mo é i bay so lavi pou mo. » I pa té ka pansé ki i pa té ka mérité lanmou Bondjé. I pa té ka di : « Mo ka wè poukisa Jéova kontan mo frè ké sò-ya, mé mo menm, poukisa i té ké kontan mo ? » Men sa i fè krétyen-yan ki té Ròm sonjé : « Kris mouri pou nou toupannan nou té péchèr toujou » (Rom. 5:8). Anyen pa pouvé anpéché Bondjé kontan nou !
10. Kisa nou ka anprann annan Romains 8:38, 39 ?
10 (Li Romains 8:38, 39.) Pòl té savé kouman lanmou Jéova gen pou nou fò. I di ki anyen ‘pa pouvé séparé nou di [so] lanmou’. I té ka sonjé kouman Jéova pran pasyans ké nasyon Israyèl. É i té ka byen konprann ki Jéova té pardonnen li. Donk, men sa Pòl té lé di : « Si Jéova voyé so Pitit asou latè-a mouri pou mo, mo pa gen pyès rézon pou krè i pa kontan mo » (Rom. 8:32).
Jéova pa ka rété asou fot nou fè anvan. Sa ki enpòrtan pou li, a sa nou ka fè jòdla, é sa nou ké fè dimen c (gadé paragraf 11).
11. Annan 1 Timothée 1:12-15, Pòl ka di ki i fè patché péché. Mé magré sa, poukisa i té sir ki Bondjé té kontan l’ ?
11 (Li 1 Timothée 1:12-15.) Lò Pòl té ka sonjé tout mové bagaj i té fè anvan i divini krétyen, sa dèt té ka troumanté l’. Pou li, a li ki té pi mové péchèr-a asou tout latè-a é nou ka konprann poukisa : anvan i anprann konnèt lavérité-a, i té ka kouri dèyè sé krétyen-yan, annan roun vil apré rounòt, san pran van, i té ka jité yé lajòl é détan i té jis dakò pou yé tchwé yé (Actes 26:10, 11). Apré, nou pa savé, pitèt i bité ké roun jennjan annan roun asanblé ki té pédi so paran akoz di li. Imajiné kouman Pòl dèt santi so kò. I té ka rigrété sa i té fè, mé i té savé ki sa ki fèt, fèt. I té ka asèpté ki Kris té mouri pou li, é a pou sa i ékri : « Mo divini moun-an mo sa jòdla, gras a favèr Bondjé mo pa mérité-a » (1 Cor. 15:3, 10). Kisa sa ka anprann nou ? Asèpté lidé ki Kris mouri pou to, é ki, gras a so lanmò, to pouvé gen roun bèl lanmityé ké Jéova (Actes 3:19). Jéova pa ka rété asou fot-ya nou fè anvan, ki nou té Témwen ouben ki nou pa té Témwen a sa lépòk-a. Sa ki enpòrtan pou li, a sa nou ka fè aprézan ké sa nou ké fè dimen (Is. 1:18).
12. Si nou ka pansé ki nou pa gen pyès valò ouben ki nou pa mérité pyès moun kontan nou, kouman 1 Jean 3:19, 20 pouvé idé nou ?
12 Lò nou ka sonjé ki Jézi mouri pou nou péché, nou pouvé pansé ki nou pa ka mérité sa bèl kado-a. Mé kisa ki pouvé fè nou pansé konsa ? A nou tchò ki pa parfè ki pouvé bloublou nou é fè nou krè ki nou pa gen pyès valò, ouben ki nou pa ka mérité ki ròt-ya kontan nou (li 1 Jean 3:19, 20). Lò nou ka pansé sa, annou sonjé ki « Bondjé gran pasé nou tchò ». Nou Papa ki annan syèl-a lé pardonnen nou, é i kontan nou plis pasé sa nou tchò lé fè nou krè. Donk, nou divèt asèpté wè nou kò kou Jéova ka wè nou. Pou rivé fè sa, nou divèt étidyé so Paròl touléjou, priyè l’ souvan é pasé tan ké sa-ya ki ka adoré l’. Poukisa sa vréman enpòrtan ?
ÉTIDYÉ LABIB-A, PRIYÈ É PASÉ TAN KÉ FRÈ KÉ SÒ-YA POUVÉ IDÉ TO
13. Kouman Paròl Bondjé-a pouvé idé nou ? (gadé ankadré-a osi « Paròl Bondjé-a idé yé »).
13 Étidyé Paròl Bondjé-a touléjou. A konsa to ké anprann konnèt Jéova ké so bèl kalité pi byen. É to ké wè tout lanmou i gen pou to. Si to ka pran tan réfléchi asou sa to ka li annan Labib-a touléjou, sa ké idé to « roudrésé tout bagaj » annan to tchò é annan to lèspri, é konsa to ké pouvé réfléchi pi byen (2 Tim. 3:16). Kevin, roun ansyen ki té ka santi so kò initil, ka di : « Li ké réfléchi asou Psaume 103 idé mo chanjé fason mo té ka pansé-a é konprann kouman Jéova vréman ka wè mo. » Eva, sò-a nou ja palé anvan, ka di : « Lò lajournen-an fini, mo ka pran tan sonjé sa Jéova ka pansé é sa i ka rousanti. Sa ka idé mo rété kalm é sa ka fè mo lafwa vin pi fò. »
14. Kouman lapriyè pouvé idé nou ?
14 Priyè souvan (1 Thess. 5:17). Lò to lé divini zanmi ké roun moun, to divèt palé ké li souvan é di li sa to gen annan to tchò. A menm bagaj nou divèt fè ké Jéova pou nou kontinyé gen roun bon lanmityé ké li. Lò nou ka di li sa nou ka pansé, sa nou gen annan nou tchò é sa ki ka fè nou pè, nou ka montré l’ ki nou ka fè l’ konfyans é ki nou savé ki i kontan nou (Ps. 94:17-19 ; 1 Jean 5:14, 15). Yua, sò-a nou ja palé anvan, ka di : « Lò mo ka priyè Jéova, a pa sa mo fè annan lajournen-an rounso mo ka di li. Mo ka di li tousa mo ka pansé é sa mo gen annan mo tchò. Piti piti, mo konprann ki Jéova pa sa roun chèf antrépriz. A roun papa ki kontan so pitit » (gadé ankadré-a « Ès to li l’ ? »).
15. Kouman Jéova ka montré nou ki i kontan nou chak ?
15 Pasé tan ké to frè ké sò. A roun kado Jéova bay nou (Jacq. 1:17). Pou i montré nou ki i kontan nou chak, nou Papa ki annan syèl-a bay nou roun fanmi. Nou gen frè ké sò ki ‘ka montré nou yé lanmou’ tout tan (Prov. 17:17). Annan so lèt i ékri pou Kolosyen-yan, Pòl di ki sèrten krétyen té idé l’, é yé té sa roun « sours ki ka bay gran konsolasyon » (Col. 4:10, 11). Menm Jézi té bézwen so zanmi idé l’, ki a té zanj ouben moun (Luc 22:28, 43).
16. Kouman zanmi fidèl pouvé idé nou vin pi pròch ké Jéova ?
16 Ès to pè lésé to frè ké sò idé to ? Lò nou ka palé di sa ki ka enkyété nou ké roun zanmi ki gen èspéryans, sa pa lé di ki nou fèb, mé sa ka protéjé nou. Gadé sa James, frè-a nou ja palé anvan, ka di : « A mo lanmityé ké frè ké sò ki gen èspéryans ki idé mo tchenbé rèd. Lò mo pa ka rivé kontrolé sa mo ka pansé, sa zanmi fidèl-ya ka pran tan byen kouté mo, é yé ka di mo ki yé kontan mo. Gras a yé, mo ka wè ki Jéova kontan mo é ka gadé pou mo. » Sa vréman enpòrtan pou nou divini bon zanmi ké nou frè ké sò !
RÉTÉ ANNAN LANMOU JÉOVA
17-18. Kimoun nou divèt kouté, é poukisa ?
17 Satan lé dékourajé nou pou nou arété fè sa ki bon. I lé fè nou krè ki Jéova pa kontan nou é ki nou pa mérité i sové nou. Mé kou nou wè l’, sa pa vré menm !
18 Jéova kontan to. To gen bokou valò pou li. Si to ka obéyi l’, kou Jézi, to ‘ké rété annan so lanmou [pou tout-tan]’ (Jean 15:10). Atò, pa kouté Satan, é si to tchò ka di to ki to pa bon, pa kouté l’ non plis. Kouté Jéova pito, i ka wè sa ki bon annan nou chak. A pou to sir ki kou i « kontan so pèp », i kontan to osi !
KANTIK 141 Le miracle de la vie
a Sèrten frè ké sò ka pansé ki Jéova pa kontan yé. Annan sa artik-a, nou ké wè poukisa nou divèt sir ki Jéova kontan nou chak. Nou ké wè osi kisa nou divèt fè si nou ka krè ki Jéova pa kontan nou.
b Yé chanjé déztrwa non.
c MEN SA NOU KA WÈ ASOU ZIMAJ-A : Anvan i divini krétyen, Pòl fè yé mété roun lo ké roun patché krétyen lajòl. Mé lò i asèpté lidé ki Jézi mouri pou li, i chanjé nèt. I ankourajé so frè ké sò, menm sa-ya ki té pédi roun moun yé té kontan akoz di li.
