Ès to té savé sa ?
Poukisa a té roun bon bagaj ki Jéova asèpté Israyélit-ya bay dé kalité zozo ?
SOULON Lalwa, Jéova té ka asèpté so adoratèr bay li tourt ouben pijon. Annan lalwa asou sakrifis-ya, yé toujou ka palé di sa dé zozo-ya ansanm. Yé té pouvé bay roun ouben ròt (Lév. 1:14 ; 12:8 ; 14:30). Poukisa a té roun bon bagaj ? Paské a pa tout tan yé té ka rivé trouvé tourt.
Roun tourt.
Tourt, a zozo ki ka vwayajé bokou. Pannan sézon botan, yé ka rété annan péyi Israyèl-a, mé lò òktòb rivé, yé k’ alé annan péyi ki cho pi anba, é yé ka rouvin plizyèr mwa apré (Chant de S. 2:11, 12 ; Jér. 8:7). A pou sa, pannan sézon frédi, Israyélit-ya pa té ka rivé bay tourt.
Roun pijon biset.
Parkont, pijon-yan pa ka vwayajé. Donk a tout lannen yé té ka jwenn pijon an Israyèl. Anplis di sa, yé té ka fè pijon-yan vin fran (gadé Jean 2:14, 16 a). Roun liv ki ka palé di plant ké zannimo ki annan Labib-a ka di ki « annan tout vilaj ké tout vil Palèstin, i té gen pijon kaz. Chak mèt kaz té gen roun kalòj pijon, ouben roun trou yé té ka fè annan roun mir kaz-a b » (gadé Isaïe 60:8).
Roun pijon annan roun kaz pijon.
Jéova té ka montré kouman i bon ké rézonab paské i té ka asèpté zozo Israyélit-ya té pouvé trouvé tout lannen san problèm.
