1. Dapré Matthieu 7:13, 14, poukisa nou pouvé di ki lavi roun krétyen a kou roun vwayaj ?

NOU pouvé di ki lavi roun krétyen a kou roun vwayaj. Ki koté nou ka alé ? Annan paradi-a, koté nou Bondjé Jéova ki plen ké lanmou ké koumandé nou. Touléjou, nou ka fè tousa nou pouvé pou kontinyé maché asou chimen ki ka mennen annan monn nouvo-a. Jézi di ki sa larout-a piti é détan sa rèd pou maché asou l’ (li Matthieu 7:13, 14). Kou nou pa parfè, sa fasil pou nou lésé sa chimen-an (Gal. 6:1).

2. Kisa nou ké wè annan sa artik-a ? (gadé osi ankadré-a «  Imilité-a ka idé rété asou piti larout-a »).

² Pou nou rété asou chimen lavi-a, a pou nou paré chanjé fason nou ka pansé, fason nou ka wè bagaj-ya é sa nou abitchwé fè. Apot Pòl ankourajé krétyen-yan ki té Korent kontinyé ‘asèpté yé korijé yé’ (2 Cor. 13:11). Sa konsèy-a pou nou osi. Annan sa artik-a, nou ké wè kouman Labib-a pouvé idé nou divini miyò, é kouman krétyen ki gen èspéryans pouvé idé nou rété asou chimen lavi-a. Nou ké wè osi kitan sa pouvé rèd pou nou swiv sa òrganizasyon Jéova-a ka di nou fè. É nou ké palé di imilité-a, paské sa kalité-a pouvé idé nou chanjé sa nou divèt chanjé toupannan nou ka kontinyé gen tchò kontan.

3. Kouman Paròl Bondjé-a pouvé itil pou nou ?

³ Sa pa fasil pou nou chaché konprann sa nou ka pansé é sa nou gen annan nou tchò. Poukisa ? Paské, kou nou tchò trèt, nou pa savé si i toujou ka pousé nou fè sa ki bon (Jér. 17:9). Sa fasil pou nou tronpé nou pròp kò ké « fo lidé » (Jacq. 1:22). Atò, a pou nou sèrvi paròl Bondjé-a pou nou chaché savé kimoun nou sa vréman. I pouvé montré nou kimoun nou sa ofon nou tchò é ‘kisa nou ka pansé  ké tousa nou tchò anvi fè’ (Héb. 4:12, 13). A kousidiré nou té ka fè roun radyo. I pouvé fè nou wè sa nou pa ka wè andidan nou. Nou divèt gen imilité si nou lé swiv konsèy Labib-a ouben sa-ya ki ka réprézanté Bondjé asou latè-a, ka bay nou.

4. Kisa ki ka montré ki Sayil divini roun moun ki té ka gonflé so lèstomak ?

⁴ Kisa ki pouvé rivé si nou pa gen imilité ? Pou nou pouvé konnèt répons asou sa késyon-an, annou wè sa ki rivé rwa Sayil. Tèlman i té ka gonflé so lèstomak, i pa asèpté, menm ofon so tchò, ki i té divèt chanjé fason i té ka pansé ké sa i té ka fè (Ps. 36:1, 2 ; Hab. 2:4). Tout moun wè kouman i té fika lò i té fin ganyen lagèr kont Amalésit-ya. Jéova té byen di li sa i té divèt fè, mé i pa kouté. É lò profèt Samiyèl vini palé pou li, Sayil di ki i pa té fè pyès mové bagaj. I di ki a pa té anyen é ki a ròt moun-yan ki té fè l’ fè sa (1 Sam. 15:13-24). Anvan sa, i té ja fè menm bagaj-a (1 Sam. 13:10-14). Malérèzman i lésé òrgèy-a plen so tchò. Kou i pa chanjé fason i té ka pansé, Jéova palé rèd pou li é i té fin ké li nèt.

5. Kisa sa ki rivé Sayil ka anprann nou ?

⁵ Nou pa lé divini kou Sayil. Atò, nou divèt pozé nou kò sa késyon-yan : « Ès mo ka chaché èskiz pou mo pa kouté sèrten konsèy Labib-a ka bay ? Ès mo ka di ki sa mo ka fè pa tèlman grav ? Ès mo ka di ki a ròt-ya ki ka fè mo fè sa mo ka fè ? » Si nou ka réponn wi pou rounsèl di sa késyon-yan, nou divèt chanjé fason nou ka pansé é fason nou ka wè bagaj-ya. Si nou pa ka fè sa, nou ka riské divini roun moun plen ké òrgèy é nou ké pédi nou lanmityé ké Jéova (Jacq. 4:6).

6. Poukisa rwa David pa té kou rwa Sayil ?

⁶ Gadé ki diférans i té gen ant rwa Sayil ké rwa David. David té kontan « lalwa Jéova-a » (Ps. 1:1-3). I té savé ki Jéova ka sové sa-ya ki gen imilité, mé i ka lévé kont sa-ya ki gen òrgèy (2 Sam. 22:28). Atò, i té ka lésé lalwa Bondjé korijé fason i té ka pansé. Men sa i ékri : « Mo ké louwé Jéova ki bay mo konsèy. Menm lannwit, mo lidé ki pi séré ofon mo tchò ka korijé mo » (Ps. 16:7).

7. Kisa nou ké fè si nou gen imilité ?

⁷ Si nou gen imilité, nou ké lésé Paròl Bondjé-a korijé fason nou ka pansé anvan i fè nou fè mové bagaj. A ké kou roun moun ki ka di nou : « Men chimen-an. Swiv li. » I ké di nou, si nou ka lésé bon chimen-an ‘pou alé a drèt ouben a goch’ (Is. 30:21). Lò nou ka kouté Jéova, nou ka jwenn patché bénédiksyon (Is. 48:17). Parèkzanp, nou pa ké bézwen ronté paské roun moun vini korijé nou. Anplis di sa, nou ké divini pi pròch ké Jéova paské nou ké wè ki i ka aji ké nou kou so timoun, ké bokou lanmou (Héb. 12:7).

8. Dapré Jacques 1:22-25, kouman Labib-a pouvé sa roun mirwè pou nou ?

⁸ Labib-a pouvé sa kou roun mirwè pou nou (li Jacques 1:22-25). Près nou tout abitchwé gadé nou kò chak bonmanten annan roun mirwè anvan nou soti di nou kaz. A konsa nou savé si nou bézwen chanjé roun bagaj asou nou anvan ròt moun-yan wè nou. Menm fason-an, si nou ka li Labib-a touléjou, nou ké savé kisa nou divèt chanjé annan fason nou ka pansé é annan sa nou ka fè. Roun patché frè ké sò ka trouvé ki a roun bon bagaj di li tèks pou koumansé lajournen-an chak bonmanten, anvan yé soti di yé kaz. Yé ka lésé sa yé ka li-a aji asou fason yé ka pansé. É pannan yé lajournen, yé ka chaché kouman yé pouvé swiv konsèy  Paròl Bondjé-a. Touléjou nou divèt pran osi labitid li ké réfléchi asou sa Labib-a ka di. Sa pouvé parèt senp, mé a roun bagaj annan sa ki pi enpòrtan nou divèt fè pou rété asou chimen ki ka bay lavi pou tout-tan-an.

9. Kitan roun zanmi té ké pouvé bay nou roun konsèy ?

⁹ Ès sa ja rivé to pran roun chimen ki té ka fè to lésé Jéova ? (Ps. 73:2, 3). Si roun zanmi ki gen èspéryans pran so kouraj pou bay to roun konsèy, ès to swiv li ? Si a sa to fè, to pran bon désizyon-an é to divèt kontan sa zanmi-a fè sa pou to (Prov. 1:5).

10. Si roun zanmi ka vini di nou sa nou ka fè-a pa bon, kouman nou divèt réyaji ?

¹⁰ Labib-a ka di : « Menm si sa ka fè to mal lò roun zanmi ka rouprann to, i ka montré to i fidèl » (Prov. 27:6). Pou byen konprann sa, annou pran roun èkzanp. A kousidiré to té ka antann pou janbé roun lari koté i gen patché loto ka pasé, épi rounsèl kou, to téléfòn ka sonnen. To pa ka gadé larout-a ankò é to ka koumansé janbé larout-a. A sa moman-an, to zanmi ka tchenbé to bra é ka ralé to asou trotwar-a. I ka tchenbé to bra tèlman fò ki i ka fè to mal, mé sa i fè-a ka anpéché roun loto chouté to. Menm si i marké to lapo é sa ka fè to mal pannan plizyèr jou, ès to faché ké li ? Mé non ! To pito kontan i protéjé to. Menm fason-an, si roun zanmi ka rouprann to paské to di ouben to fè roun bagaj Bondjé pa kontan, pitèt lò i ké di to sa, sa ké fè to mal. Mé pa faché ké li. Sa pa té ké gen sans (Eccl. 7:9). A pou to pito kontan i pran so kouraj pou palé pou to.

11. Kisa ki pouvé fè roun moun pa asèpté konsèy roun zanmi ka bay li ?

¹¹ Kisa ki pouvé fè roun moun pa asèpté konsèy roun zanmi ki kontan l’ ka bay li ? Òrgèy. Roun moun ki gen òrgèy kontan « yé karésé so zorè ». I pa lé « kouté lavérité-a » (2 Tim. 4:3, 4). I ka pansé i pa bézwen konsèy paské i ka pansé i pi entélijan ouben pi enpòrtan pasé pyès moun. Mé, Pòl ékri : « Si roun moun ka pansé i plis pasé pyès moun menm si i pa anyen, i ka tronpé so pròp kò » (Gal. 6:3). Rwa Salomon-an byen èspliké sa lò i di : « Roun timoun ki maléré mé ki saj pi bon pasé roun rwa vyé mé sòt, ki pa gen bon sans ankò pou kouté roun avèrtisman » (Eccl. 4:13).

12. Kou nou ka wè l’ annan Galates 2:11-14, kouman Pyèr réyaji lò Pòl rouprann li ?

¹² Réfléchi asou sa Pyèr fè lò Pòl rouprann li douvan tout moun (li Galates 2:11-14). I té pouvé faché ké li akoz di fason i té palé pou li-a é paské i té palé douvan tout moun. Mé i byen réyaji. I asèpté konsèy-a é i pa tchenbé Pòl asou so tchò. Apré sa, i jis di ki Pòl a té roun frè « i té kontan » (2 Pierre 3:15).

13. Kisa nou divèt sonjé lò nou lé bay roun moun roun konsèy ?

¹³ Si to ka pansé ki to divèt bay roun zanmi roun konsèy, kisa to divèt sonjé ? Anvan to alé palé pou li, doumandé to kò : « Ès mo “pi jis pasé sa mo divèt” ? » (Eccl. 7:16). Roun moun ki pi jis pasé sa i divèt pa ka jijé moun-yan dapré sa Jéova ka pansé, mé i ka jijé yé dapré sa li menm ka pansé. É i souvan rèd ké yé. Si to byen réfléchi poukisa to lé bay to zanmi roun konsèy é si to ka santi ki to divèt fè l’ kanmenm, di li ki koté problèm-an fika, épi pozé li plizyèr késyon pou savé sa i ka pansé. Lò to ké savé sa i ka pansé, sa ké pi fasil pou to  idé li konprann ki i fè roun bagaj ki pa bon. Anplis di sa, panga konsèy to ké bay li toujou vini di Labib-a, épi sonjé ki to zanmi pa gen kont pou randé to, mé a Jéova i gen kont pou randé (Rom. 14:10). Sèrvi sajès Paròl Bondjé-a, é kou Jézi, montré ki to plen ké pityé ké tandrès (Prov. 3:5 ; Mat. 12:20). Poukisa sa enpòrtan ? Paské Jéova ké fè ké nou menm fason nou ka fè ké ròt-ya (Jacq. 2:13).

14. Kisa òrganizasyon Bondjé-a ka sèrvi pou ansényé nou ?

¹⁴ Pou gidé nou asou chimen pou lavi, Jéova ka itilizé so òrganizasyon asou latè-a. Sa òrganizasyon-an ka ansényé nou ké vidéyo, piblikasyon ké réinyon ki ka idé nou swiv konsèy Paròl Bondjé-a ka bay. Nou pouvé fè li konfyans paské sa i ka anprann nou-a ka vini di Labib-a. Lò frè Kolèj santral-a ka désidé pi bon fason prédikasyon-an divèt fèt, a asou lèspri sen-an yé ka konté. Mé détan, sa pa ka anpéché yé rouvini asou sèrten désizyon yé pran. Poukisa ? Paské « a chanjé sa monn-an ka chanjé » é òrganizasyon Bondjé-a divèt adapté douvan sa chanjman-yan (1 Cor. 7:31).

15. Poukisa sèrten frè ké sò bézwen adapté yé kò ?

¹⁵ Lò òrganizasyon Bondjé-a ka bay nou konsèy asou sa ki byen é sa ki pa byen ouben ka bay nou ròt èsplikasyon asou sa Labib-a ka anprann nou, nou ka asèpté sa san problèm. Mé kouman nou ka réyaji lò i ka pran désizyon ki pouvé gen ròt konsékans asou nou lavi ? Parèkzanp, dipi déztrwa lannen, sa ka kouté nou plizanpli soumaké pou fè Sal di Rwayonm ké réparé yé. A pou sa Kolèj santral-a désidé fè Sal di Rwayonm-yan sèrvi pou tout kantité moun yé té fèt pou pran. Atò, yé fè plizyèr asanblé fè rounsèl é yé vandé plizyèr Sal di Rwayonm. Soumaké-a nou ganyen konsa ka sèrvi pou fè Sal di Rwayonm koté yé plis bézwen. Si koté to ka rété-a, yé ka vandé Sal di Rwayonm ouben yé ka fè plizyèr asanblé fè rounsèl, pitèt to ka trouvé sa rèd pou to adapté. Roun ran frè ké sò divèt aprézan alé pi lwen pou alé annan réinyon-yan. Ròt ankò travay rèd pou fè Sal di Rwayonm ouben pou okipé di yé é yé pa ka konprann poukisa yé ka vandé yé. Pitèt yé ka santi ki yé  travay pou anyen. Magré sa, yé ka soutni sa désizyon-an é yé ka mérité nou félisité yé pou sa.

16. Kouman konsèy nou ka jwenn annan Colossiens 3:23, 24 pouvé idé nou kontinyé gen tchò kontan ?

¹⁶ Si nou ka sonjé ki a pou Jéova nou ka travay é ki a li ki ka dirijé so òrganizasyon, nou ké kontinyé gen tchò kontan (li Colossiens 3:23, 24). Rwa David bay nou roun bon èkzanp lò i bay soumaké pou fè Tanp-a. Men sa i di Bondjé : « Kimoun mo sa, é mo pèp, kimoun i sa, pou nou pouvé fè ofrann ké bon tchò kou sa ofrann-yan ? Paské tout bagaj a di to yé ka vini, é tout bagaj nou bay to, a to ki bay nou yé » (1 Chron. 29:14). Nou menm osi, lò nou ka fè ofrann, nou ka bay Jéova sa li menm bay nou. É pourtan, i kontan nou ka bay li nou fòrs, nou tan ké tousa nou gen pou adoré li (2 Cor. 9:7).

17. Poukisa to pa divèt dékourajé si to divèt chanjé fason to ka pansé ouben sa to ka fè ?

¹⁷ Pou nou rété asou piti larout-a ki ka bay lavi pou tout-tan, nou divèt byen swiv èkzanp Jézi bay nou-a (1 Pierre 2:21). Si to ka randé to kò kont ki to divèt chanjé fason to ka pansé ouben sa to ka fè, pa dékourajé. A roun bon bagaj ; sa lé di ki to lé fè Jéova plézi. Pa bliyé sa : i savé nou pa parfè, é i pa ka antann ki nou imité parfètman èkzanp Jézi bay nou.

18. Kisa nou divèt fè pou nou rivé koté nou lé alé-a ?

¹⁸ Annou kontinyé mété nou lidé asou sa Jéova ka promèt nou pou dimen é annou toujou paré asèpté fè chanjman annan fason nou ka pansé, annan fason nou ka wè bagaj-ya é annan sa nou ka fè (Prov. 4:25 ; Luc 9:62). Annou gen imilité é ‘annou kontinyé gen tchò kontan é kontinyé asèpté yé korijé nou’ (2 Cor. 13:11). Konsa, ‘Bondjé ki plen ké lanmou é ki kontan lapè, ké la ké nou’. É anplis di rivé koté nou lé alé-a, nou ké byen profité di nou vwayaj !