Sa fè mo ari paské mo pa té jen pansé ki mo zanmi té sa roun moun ki té kontan larélijyon. Mo doumandé li : « Kisa to konnèt asou Labib-a, to menm ? ». I pa réponn lanmenm. Apré sa, i di mo ki so manman té Témwen Jéova é ki i té anprann li déztrwa bagaj. Mo té anvi savé a té kisa, mo ensisté pou i di mo plis bagaj asou sa.

Nou kozé près tout lannwit. I èspliké mo ki, dapré Labib-a, chèf monn-an, a Satan (Jean 14:30). Pitèt a roun bagaj zòt savé dipi lontan, mé mo menm, a prémyé fwa mo té ka tandé sa, é sa té ka bay mo anvi konnèt ankò plis bagaj asou sa. Tout mo lavi, mo té tandé moun di ki a té roun Bondjé ki té bon ki té ka dirijé monn-an, mé a roun bagaj ki pa té lojik pou mo. Mo té gen 26 an rounso, mé mo té ja wè roun patché bagaj ki té ka boulvèrsé mo.

Mo papa té pilòt annan larmé amériken-an. Donk, dipi toupiti, mo té konprann ki roun lagèr nikléyèr té pouvé pété vré ; nenpòrt kitan, larmé té pouvé pijé asou bouton-an. Lò mo té linivèrsité, an Kaliforni, i té gen lagèr o Vyètnam. A sa lépòk-a, mo té ka alé manifèsté ké plizyèr ròt étidyan. Lapolis té ka kouri nou ké yé matrak. Nou té près ka toufé, é nou pa té ka wè anyen, akoz di gaz lakrimojèn yé té ka voyé asou nou. A té roun lépòk ki té rèd, é koté tout moun té ka révòlté yé kò. Yé té ka tchwé chèf politik-ya, moun té ka manifèsté, tchòk té ka pété annan lari-a, a té dé bagaj ki té ka rivé souvan. Chak moun té gen sopa lidé asou fason bagaj-ya té pou fèt, donk tout moun té pédi.

An 1970, mo trapé roun travay an Alaska, annan nòr péyi-a. Mo ganyen roun patché soumaké. Apré sa, mo alé Lonn. Mo achté roun moto é mo pran larout-a é mo roulé, mo pa té chwazi pyès koté pou mo té alé èspésyalman. Apré plizyèr mwa, mo rivé an Afrik. Asou chimen-an, mo kontré plizyèr moun ki té ka chaché yé libèrté kou mo menm ; yé té ka kouri lwen pou lésé tout yé problèm dèyè é pou anyen pa maré yé.

 Akoz di sa mo té wè ké sa mo té tandé, zafè ki Labib-a ka di ki roun mové lèspri ka dirijé monn-an, a té roun bagaj ki té lojik pou mo. Mé kisa Bondjé té ka fè atò ? A sa mo té lé savé.

Déztrwa mwa apré sa, mo jwenn répons-a. É piti piti, mo vin zanmi ké wonm ké fanm ki té ka viv annan dé sitiasyon diféran, mé yé tout té ka adoré sèl vré Bondjé-a.

Lò mo routounen Lonn, mo aplé manman mo kanmarad. I bay mo roun Labib. Pita mo alé an Olann. A Amstèrdam, toupannan mo té ka li Labib-a anba limyèr roun lanpadèr, roun Témwen Jéova wè mo é idé mo konprann Labib-a pi byen. Apré sa, mo alé an Irlann, a Dublin. Mo alé annan Bétèl Témwen Jéova-ya é mo konyen lapòt-a. A la mo kontré ké Arthur Matthews, roun Témwen ki gen sajès é ki plen ké èspéryans. Mo doumandé roun léson biblik é i asèpté anprann mo Labib-a.

Mo mété tout mo lidé asou mo étid Labib-a : mo té ka li tout liv ké tout volumes reliés Témwen-ya té fè. Épi mo té ka li Labib-a li menm. Sa té chwit toubonnman ! Pannan réinyon asanblé-a, mo té ka wè ki menm timoun-yan té konnèt répons asou késyon moun ki fè gran lékòl ka pozé yé kò dipi nanninannan : Poukisa i gen patché méchansté ? A kimoun ki Bondjé ? Kisa ki ka rivé apré lanmò ? Mo té ka maché ké Témwen Jéova-ya rounso. Sa té fasil, paské mo pa té konnèt pyès ròt moun annan péyi-a. Gras a yé, mo vin kontan Jéova épi mo vin anvi fè so volonté.

Mo batizé an 1972. Roun lannen pita, mo divini pyonyé é mo alé annan roun toupiti asanblé a Newry, an Irlann di Nòr. Mo té ka louwé roun ti kaz ki té fèt an pyèr annan roun koté ki té lwen, asou roun montangn. Annan roun chan ki pa té lwen, i té gen plizyèr vach, é mo té ka répété mo diskour douvan yé. Toupannan yé té ka manjé, a kousidiré yé té ka kouté mo byen. Yé pa té pouvé bay mo pyès konsèy, mé o mwen, yé idé mo gen sa yé ka aplé contact visuel avec l’auditoire ! An 1974, mo divini pyonyé èspésyal. Mo travay ansanm ké Nigel Pitt. Nou rété zanmi jis jòdla.

A sa lépòk-a, i té gen roun patché vyolans an Irlann, annan nòr péyi-a. Roun ran moun té ka di ki Irlann di Nòr-a, a té « péyi koté i gen bonm ké bal », é a té vré. Souvan moun té ka briga annan lari-a, yé té ka tiré anlè moun, yé té ka mété bonm annan loto. Problèm-yan té ka vini di lapolitik, mé an menm tan di larélijyon. Mé ni sa-ya  ki té protèstan ni sa-ya ki té katolik té ka randé yé kò kont ki Témwen Jéova-ya pa té ka mélé annan lapolitik. Donk, nou té pouvé préché san problèm, nou té an sékirité. Souvan moun-yan té savé kitan é ki koté i té ké gen roun problèm. Donk yé té ka avèrti nou pou nou té pouvé évité sa koté-ya.

Mé détan, i té gen sèrten sitiasyon ki té danjéré kanmenm. Roun jou, mo té ké Dennis Carrigan ki té pyonyé li menm osi. Nou té ka préché annan roun vil koté i pa té gen Témwen. A té dézyèm fwa nou té ka alé la. Roun madanm akizé nou, i di ki nou té sa dé sòlda anglé é ki nou té sa dé èspyon. Pitèt i di sa paské nou pyès pa té gen aksan irlandé-a. Nou té savé ki si roun moun té zanmi ké sòlda anglé-ya, yé té pouvé tiré annan so jounou é menm tchwé li. Donk nou koumansé pran pè. Nou té tousèl ka antann kar-a dèrò annan frédi-a lò roun loto, ké dé mouché annan l’, arété douvan rèstoran madanm-an ki té akizé nou. I soti, i té enkyèt, é i palé pou yé toupannan i té ka montré nou. Apré sa, sa dé mouché-ya roulé tou dousman pou vini òbò nou é yé doumandé nou déztrwa enfòrmasyon asou kar-a. Lò kar-a rivé, yé palé pou chofèr-a, mé nou pa tandé sa yé di. Kou a té nou rounso ki té annan kar-a, nou té sir ki lò nou té ké andèrò vil-a, yé té ké manyen nou. Mé anyen pa rivé. Lò mo désann di kar-a, mo doumandé chofèr-a : « Boug-ya laba, yé pozé késyon asou nou ? » I réponn mo : « Mo savé kimoun zòt sa, é mo di yé. Pa enkyété zòt kò, yé pa ké fè zòt anyen. »

An 1976, pannan roun asanblé distrik a annan vil Dublin, mo kontré ké Pauline Lomax, roun pyonyé èspésyal ki té ka rété an Anglétèr. A té roun sò ki té gen imilité, i té èspirityèl, i té tou janti. Li ké so frè Ray té lévé annan lavérité-a. Roun lannen apré sa, mo ké Pauline, nou maryé. Nou kontinyé nou sèrvis pyonyé èspésyal a Ballymena, an Irlann di Nòr.

Pannan roun tan, nou rété annan sèrvis sirkonskripsyon-an é nou idé nou frè ké sò-ya ki té ka rété Belfast, Londonderry ké ròt koté ki té danjéré. Lò nou wè lafwa nou frè ké sò-ya ki té arété krè bagaj yé té anprann annan yé rélijyon, ki té arété pézé moun ké wéy é ki té arété rayi moun menm si sa té fò annan yé tchò, tousa pou sèrvi Jéova, sa touché nou. Jéova béni yé é i protéjé yé.

Sa té ka fè dizan mo té an Irlann. Apré sa, an 1981, yé envité mo ké mo madanm fè 72^è klas Lékòl Galaad. Lò nou pran nou diplonm, yé voyé nou an Syéra Léonn, roun péyi an Afrik di Lwès.

Nou té ka rété annan roun kaz misyonèr ké 11 frè ké sò ki té janti toubonnman. I té gen jis roun lakwizin, trwa twalèt, dé douch, roun téléfonn, roun machin a lavé ké roun machin pou séché lenj-a pou nou tout. Yé té ka koupé limyèr-a souvan san nou pa té ka antann. Laro twa-a té plen ké rat, épi détan sèrpan kobra té ka pronmennen anba kaz-a.

Koté nou té ka rété-a, a pa té gran bèt, mé prédikasyon-an té chwit ! Moun-yan té ka rèspèkté Labib-a é yé té ka kouté nou byen. Roun patché moun asèpté étidyé Labib-a é yé batizé. Moun-yan té ka aplé mo « mouché Robert » é yé té ka aplé Pauline « madanm Robert ». Mé apré roun ti moman, kou mo té gen bokou plis travay pou fè pou Bétèl-a, yé pa té ka wè mo souvan  ankò annan téritwar-a. Alòr moun-yan koumansé aplé mo madanm « madanm Pauline », é mo menm, mo divini « mouché Pauline ». Mo madanm té tou kontan !

I té gen roun patché frè ké sò ki té maléré, mé Jéova toujou té ka bay yé sa yé té bézwen, é détan, fason i té ka fè l’ té bèl toubonnman (Mat. 6:33). Mo ka sonjé ki roun jou, roun sò té gen soumaké jiskont pou achté manjé pou li ké so timoun. Pourtan, i bay roun frè ki pa té gen soumaké pou achté médikaman pou palidizm-an, tout so soumaké. Pita, annan lajournen-an, roun madanm vini wè sò-a é i péyé l’ pou i té pouvé penyen l’. Sa kalité bagaj-a té ka rivé souvan.

Apré nou fè nèf lannen an Syéra Léonn, yé voyé nou annan filyal Nijérya. A té roun gran Bétèl. Mo té ka fè menm kalité travay-a ki lò mo té an Syéra Léonn. Mé pou Pauline, a té roun gran chanjman é sa té rèd. I té toujou préché 130 lèr chak mwa é i té étidyé Labib-a ké moun ki té ka fè progrè. Aprézan, i té ka fè lakoutir, i té ka pasé so tan ka rakomodé lenj. Sa pran tan pou i adapté so kò. Mé finalman, i wè ki tout moun té kontan sa i té ka fè, é i koumansé chaché tout okazyon i té gen pou ankourajé ròt bétélit-ya.

Kiltir-a o Nijérya, a té roun nouvo bagaj pou nou, é nou té gen roun patché bagaj pou anprann. Roun jou, roun frè vini annan mo biro pou prézanté mo roun sò ki té fin rivé o Bétèl. Lò mo lonjé mo lanmen pou di li bonjou, i tonbé ajounou asou mo pyé. Mo rété èstébékwé ! Lanmenm, mo sonjé dé pasaj annan Labib-a : Actes 10:25, 26 ké Révélation 19:10. Mo doumandé mo kò : « Ès a pou mo di li ki i pa gen pou fè sa ? » Apré sa, mo di annan mo tchò ki si yé té asèpté i vini o Bétèl, a ki i té konnèt sa Labib-a ka di.

Pannan nou té ka kozé, mo té jennen. Mé apré sa, mo alé fè déztrwa réchèrch é mo konprann ki sò-a té fè sa paské a sa lépòk-a, i té gen roun tradisyon annan sèrten koté annan péyi-a. Mouché-ya té ka fè sa osi. A té pou montré ki yé té ka rèspèkté moun-an, a pa té pou adoré l’. Épi sa kalité bagaj-a rivé menm annan Labib-a (1 Sam. 24:8). Mo té byen kontan mo pa té di sò-a anyen ki té ké fè l’ ronté.

Nou kontré ké roun patché frè ké sò o Nijérya ki rété fidèl lannen apré lannen. Parèkzanp, i gen  Isaiah Adagbona b. I anprann konnèt lavérité lò i té jenn. Malérèzman, pita, yé di li ki i té gen lalèp. Alòr yé voyé li annan roun léprozri koté a li sèl ki té Témwen. Magré opozisyon-an, i anprann pasé 30 moun ki té gen lalèp lavérité é yé tout divini Témwen Jéova. Apré sa i vin gen roun asanblé annan léprozri-a menm.

An 1996, yé voyé nou annan filyal Kénya. A té prémyé fwa mo té ka routounen annan sa péyi-a dipi vwayaj mo té ka rakonté zòt o koumansman sa artik-a. Nou té ka rété o Bétèl. Détan, makak té ka vini wè nou. Sèrten té ka « ataké » sò-ya ki té gen frwi. Roun jou, roun sò bétélit té lésé so lafinèt louvri. Lò i routounen, i té gen tout roun fanmi makak ki té ka manjé tout manjé yé té trapé annan so chanm. I rélé épi i pran kouri. Makak-ya volé, yé rélé épi yé chapé pa lafinèt-a.

Mo ké Pauline, nou alé jwenn roun asanblé annan lang swayli. Vitman yé doumandé mo dirijé sa yé té ka aplé anvan l’étude de livre (jòdla, yé ka aplé sa « étid biblik asanblé-a »). Mé mo pa té ka palé lang-a pi byen pasé roun timoun. Kou mo té ka préparé mo kò alavans, mo té ka rivé li késyon-yan. Parkont, si roun moun pa té ka réponn èkzaktéman sa ki té marké, mo pa té ka konprann anyen. Mo té jennen é mo té dézolé pou frè ké sò-ya. Mé sa té ka touché mo bokou lò mo té ka wè ki yé té ka asèpté sa dispozisyon-an ké pasyans ké imilité !

Sa pa té ka fè roun lannen nou té o Kénya lò, an 1997, yé envité nou alé annan Bétèl Brouklin, a Nouyòrk. Aprézan, nou té ka rété annan roun péyi ki rich, é sa pouvé mennen sopa problèm osi (Prov. 30:8, 9). Mé menm annan roun péyi rich kou sa péyi-a, frè ké sò-ya ka montré ki yé gen bokou lafwa. Yé pa ka sèrvi ni yé tan ni sa yé gen pou vin rich, mé pou soutni travay òrganizasyon Jéova-a.

Donk, pannan tout sa lannen-yan, nou wè lafwa plizyèr Témwen fidèl annan plizyèr sitiasyon diféran : an Irlann magré lavyolans, an Afrik magré frè-ya té maléré é détan annan roun koté i pa gen ròt Témwen, épi Ozétazini, annan roun péyi ki rich. Jéova divèt kontan lò i ka gadé moun-yan ki ka montré li ki yé kontan l’ kèlkéswa yé sitiasyon !

Tan-an pasé pi vit pasé « machin moun-an ki ka tisé fil-a » (Job 7:6). Jòdla, nou ka kontinyé nou sèrvis annan syèj mondyal-a, a Warwik (a Nouyòrk). Nou kontan kontinyé travay òbò frè ké sò ki kontan yé konpanyen ké tout yé tchò. Nou kontan fè sa nou pouvé pou soutni nou Rwa Jézi Kris ki, titalò, ké rékonpansé so patché sèrvitèr-ya ki fidèl (Mat. 25:34).