Yesu kɛ ekaselɔi ejwɛ lɛ náaa deka kwraa yɛ Kapernaum gbi muu lɛ fɛɛ. Be ni je na lɛ, Kapernaumbii lɛ kɛ helatsɛmɛi ba eŋɔɔ koni etsa amɛ. Be fioo pɛ Yesu ná ehã ehe.

Enɔ jetsɛremɔ leebi maŋkpa be ni hiɛ gbeleko lɛ, Yesu te shi ni eje kpo. Etee he ko banee ní ekome too ebaanyɛ esɔle ehã e-Tsɛ lɛ yɛ. Shi be ni Yesu ye yɛ jɛmɛ lɛ sɛɛ etsɛɛɛ. Be ni amɛna akɛ Yesu bɛ amɛmasɛi lɛ, “Simon kɛ mɛi ni fata ehe lɛ” kpa shi amɛtao lɛ. Ekolɛ, Petro ji mɔ ni nyiɛ hiɛ kɛtaoɔ Yesu lɛ, ejaakɛ lɛ eshĩa Yesu yɔɔ lɛ.​—Marko 1:36; Luka 4:38.

Be ni amɛna Yesu lɛ, Petro kɛɛ lɛ akɛ: “Mɔ fɛɛ mɔ miitao bo.” (Marko 1:37) Eyɛ faŋŋ akɛ, Kapernaumbii lɛ miitao ni Yesu kɛ amɛ ahi shi. Amɛhiɛ esɔ nɔ ni efee lɛ waa, no hewɔ lɛ amɛka akɛ “amɛbaatsĩ enaa ni ekashi amɛ etee.” (Luka 4:42) Shi, ani nɔ titri hewɔ ni Yesu ba shikpɔŋ lɛ nɔ ji, ni ebatsa mɛi yɛ naakpɛɛ gbɛ nɔ tamɔ nɛkɛ? Agbɛnɛ hu, ani Kapernaum pɛ esa akɛ etsu enitsumɔi lɛ yɛ? Mɛni ewie yɛ enɛ he?

Yesu hã ekaselɔi lɛ hetoo akɛ: “Nyɛhãa wɔyaa he kroko, maji ni bɛŋkɛ lɛ amli, koni mayashiɛ yɛ jɛmɛ hu, ejaakɛ enɛ hewɔ miba.” Anɔkwa, Yesu kɛɛ mɛi ni miitao ni ekɛ amɛ ahi shi lɛ po akɛ: “Esa akɛ mayajaje Nyɔŋmɔ Maŋtsɛyeli lɛ he sane kpakpa lɛ matsɔɔ maji krokomɛi hu, ejaakɛ enɛ hewɔ atsu mi.”​—Marko 1:38; Luka 4:43.

Hɛɛ, yiŋtoo titri hewɔ ni Yesu ba shikpɔŋ lɛ nɔ ji, ni ebashiɛ Nyɔŋmɔ Maŋtsɛyeli lɛ he sane. Nakai Maŋtsɛyeli lɛ baatse e-Tsɛ gbɛ́i lɛ he, ni ebaahã adesai anaagbai fɛɛ sɛɛ afo kwraa. Naakpɛɛ gbɛi anɔ ni Yesu tsɔ etsa mɛi lɛ hã ana faŋŋ akɛ, Nyɔŋmɔ tsu lɛ. Afii ohai abɔ ni tsɔ be nɛɛ hiɛ lɛ, Mose hu tsu nitsumɔi ni sa kadimɔ waa kɛma nɔ mi akɛ Nyɔŋmɔ tsu lɛ.​—2 Mose 4:1-9, 30, 31.

Agbɛnɛ lɛ, Yesu shi Kapernaum ni eyashiɛ yɛ maji krokomɛi amli, ni ekaselɔi ejwɛ lɛ kɛ lɛ tee. Kaselɔi ejwɛ nɛɛ ji, Petro kɛ enyɛmi Andrea, kɛ Yohane kɛ enyɛmi Yakobo. Otsi ni tsɔ hiɛ lɛ mli lɛ, amɛji mɛi klɛŋklɛŋ ni Yesu fɔ̃ amɛ nine koni amɛbafata ehe yɛ egbɛfãa nitsumɔ lɛ mli.

Shiɛmɔ ni Yesu kɛ kaselɔi ejwɛ nɛɛ yashiɛ yɛ Galilea lɛ ye omanye waa! Anɔkwa, Yesu he sane jije kɛtee shɔŋŋ. “Ehe sane gbɛ shwã Siria fɛɛ,” kɛmɔ maji nyɔŋma kpokpaa ni atsɛɔ lɛ Dekapoli lɛ, kɛtee Yordan Faa lɛ sɛɛ. (Mateo 4:24, 25) Asafoku babaoo ni jɛ hei nɛɛ kɛ Yudea hu lɛ nyiɛ Yesu kɛ ekaselɔi lɛ asɛɛ. Mɛi babaoo kɛ mɛi ni miitao atsa amɛ lɛ ba eŋɔɔ. Yesu hãaa amɛnine anyɛ shi​—etsa helatsɛmɛi lɛ, ni efãmɔ mumɔi fɔji kɛje mɛi ni yɔɔ daimonioi lɛ amli.