Yɛ Hejɔɔmɔ Gbi kroko nɔ lɛ, Yesu tee kpeehe ko, eeenyɛ efee akɛ yɛ Galilea. Ena nuu ko ní ninejurɔ egbo yɛ jɛmɛ. (Luka 6:6) Woloŋmalɔi lɛ kɛ Farisifoi lɛ miikwɛ nɔ ni Yesu baafee. Mɛni hewɔ? Amɛhã ana nɔ tuuntu ni yɔɔ amɛjwɛŋmɔŋ be ni amɛbi lɛ akɛ: “Ani mla ŋmɛɔ gbɛ akɛ atsaa mɔ ko yɛ Hejɔɔmɔ Gbi lɛ nɔ?” lɛ.​—Mateo 12:10.

Yudafoi ajamɔŋ hiɛnyiɛlɔi lɛ heɔ yeɔ akɛ, ja mɔ ko wala yɛ oshara mli pɛ dani mla ŋmɛɔ gbɛ akɛ atsa lɛ yɛ Hejɔɔmɔ Gbi lɛ nɔ. No hewɔ lɛ, akɛ nɔkwɛmɔnɔ lɛ, mla eŋmɛɛɛ gbɛ akɛ ajaje wu ni eku loo wu ni eshane kɛjɛ talɔ mli yɛ Hejɔɔmɔ Gbi lɛ nɔ, ejaakɛ enɛ kɛ mɔ wala wooo oshara mli. Enɛ tsɔɔ faŋŋ akɛ, jeee dɔ ni woloŋmalɔi lɛ kɛ Farisifoi lɛ dɔɔ nuu ni nii yɔɔ mɔbɔ ní piŋɔ nɛɛ he lɛ hewɔ amɛbiɔ Yesu sane nɛɛ. Amɛmiitao nɔ ko nɔ amɛdamɔ amɛbu Yesu fɔ.

Shi Yesu le susumɔ kɔɔdɔŋ ni amɛhiɛ lɛ. Ena akɛ amɛhiɛ jwɛŋmɔ ni ejaaa kwraa, ní damɔɔɔ ŋmalɛ nɔ yɛ nɔ ni mla eŋmɛɛɛ gbɛ akɛ afeɔ yɛ Hejɔɔmɔ Gbi lɛ nɔ lɛ he. (2 Mose 20:8-10) Mɛi komɛi hu ewie ehiɛ momo yɛ gbɛ ni ejaaa nɔ yɛ nitsumɔi kpakpai ni etsuɔ lɛ ahe. Agbɛnɛ lɛ, Yesu fee nɔ ko ni kɛ naataamɔ ni mli wa baaba be ni ekɛɛ nuu ni nine egbo lɛ akɛ: “Tee shi ni obadamɔ teŋ” lɛ.​—Marko 3:3.

Yesu tsɔ ehe ehã woloŋmalɔi lɛ kɛ Farisifoi lɛ, ni ekɛɛ amɛ akɛ: “Kɛ́ oyɛ gwantɛŋ kome, ni nakai gwantɛŋ lɛ gbee bu mli yɛ Hejɔɔmɔ Gbi lɛ nɔ lɛ, namɔ yɔɔ nyɛteŋ ní emɔŋ emli ní ejie lɛ?” (Mateo 12:11) Gwantɛŋi ni amɛlɛɔ lɛ hãa amɛnáa shika, no hewɔ lɛ amɛshiŋ lɛ yɛ bu lɛ mli kɛyashi jetsɛremɔ; ekolɛ ebaagbo, ni no baahã amɛbɔ nyɔmɔ. Kɛfata he lɛ, Ŋmalɛi lɛ wieɔ akɛ: “Jalɔ nuɔ he ehãa eshĩa kooloo tete.”​—Abɛi 12:10.

Yesu kɛ sane to sane he yɛ gbɛ ni nilee yɔɔ mli nɔ be ni ewie akɛ: “Kwɛ bɔ ni gbɔmɔ jara wa kwraa fe gwantɛŋ! No hewɔ lɛ, mla ŋmɛɔ gbɛ akɛ afeɔ nɔ ko kpakpa yɛ Hejɔɔmɔ Gbi lɛ nɔ.” (Mateo 12:12) Enɛ tsɔɔ akɛ, kɛ́ Yesu tsa nuu lɛ yɛ Hejɔɔmɔ Gbi lɛ nɔ lɛ, ebuleko Hejɔɔmɔ Gbi lɛ. Jamɔŋ hiɛnyiɛlɔi lɛ nyɛɛɛ awie nɔ ko yɛ bɔ ni ejɛ musuŋtsɔlɛ mli ekɛ amɛ susu nii ahe yɛ nilee gbɛ nɔ nɛɛ he. Amɛtswaaa amɛsɛŋ po.

Yesu kwɛ amɛ kɛkpe ni emli fu, ni ewerɛ ho ehe waa yɛ susumɔ ni ejaaa ni amɛhiɛ lɛ hewɔ. Kɛkɛ ni ekɛɛ nuu lɛ akɛ: “Kpã onine mli.” (Mateo 12:13) Be ni nuu lɛ kpã enine ni egbo lɛ mli lɛ, ehi ekoŋŋ. Enɛ hã nuu lɛ mii shɛ ehe, shi te mɛi ni taoɔ Yesu naa sane lɛ nu he amɛhã tɛŋŋ?

Yɛ nɔ najiaŋ ni Farisifoi lɛ baaná miishɛɛ akɛ atsa nuu lɛ nine lɛ ekoŋŋ lɛ, amɛje kpo amrɔ nɔŋŋ ni “amɛkɛ Herode sɛɛfilɔi lɛ yabɔi [Yesu yi nɔ] apamtoo koni amɛgbe lɛ.” (Marko 3:6) Ekã shi faŋŋ akɛ, jamɔ kuu ni atsɛɔ amɛ Sadukifoi lɛ mli bii fata maŋkwramɔŋ kuu nɛɛ he. Sadukifoi kɛ Farisifoi kɛ amɛhe yeee, shi yɛ be nɛɛ mli lɛ, amɛfee ekome waa kɛte shi amɛwo Yesu.